རྫ་ཤུལ་བློ་བཟང་། 2022-12-21
འཁོར་བའི་སྒྱུ་འཕྲུལ་གྱི་གར་སྟབས་བོར་བའི། །
བསམ་གཏན་སྤྱིལ་ཆུང་གི་གཞིས་ཤག་ཆུང་ཆུང་། །
རྣལ་འབྱོར་ངེས་འབྱུང་གི་མེ་ཏོག་འཁྲུངས་ས། །
ལྷིང་འཇགས་དབེན་ཁྲོད་ཀྱི་གནས་ཁང་ཧྲུལ་པོ། །
སྐྱོ་ཤས་མུ་ཏིག་གི་རྨུ་ཐག་ཕྲ་མོ། །
སེམས་ཀྱི་གཏིང་རུམ་ནས་ཡོངས་སུ་སྤྲས་ན། །
ཉམས་མགུར་དྲུག་འགྱུར་གྱི་དབྱངས་རྟ་སྙན་མོས། །
མ་བཅོས་ཚིག་ཚོགས་ཀྱིས་བླ་མཁར་བརྩིགས་ཆོག །
ཚོགས་དྲུག་སྣང་བ་ཡི་སྣ་ལྔའི་ཁ་དོག །
འདུ་འཛི་མི་ཚོགས་ཀྱི་སྐྱོ་གར་བལྟས་ནས། །
སྙིང་ཆུང་དངུལ་དཀར་གྱི་རི་མོ་གསལ་ལེ། །
དྲན་པའི་མགུར་ཆུང་གི་གདངས་དབྱངས་སྙན་པ། །
མི་ཚེ་ཐེངས་གཅིག་གི་སྤོས་ཐུར་ཉག་མ། །
སྐྱིད་སྡུག་རླུང་ཁྲོད་ཀྱི་འཇག་སྐྱ་ཐེད་པོ། །
བརྩེ་འདང་སྦྲང་རྩི་ཡི་བཅུད་ལ་རོལ་བ། །
འཁོར་བའི་རྣམ་ཤེས་ཀྱི་རྨི་ལམ་རྨིས་འདུག །
རྣམ་རྟོག་རྟ་རྒོད་ཀྱི་རྒྱུགས་འདུར་མང་ཡང་། །
སྙན་ཚིག་མེ་ཏོག་གི་རྒུམ་འབུ་འཐུ་ཆོག།
ཚོར་བའི་གཞིས་ཁྱིམ་ན་སྤྲོ་སྐྱིད་མེད་ཀྱང་། །
བསླུ་བྲིད་ཚིག་ཚོགས་ཀྱིས་སྐྱོ་བ་སེངས་ཐུབ ། །
སྡུག་བསྔལ་མེ་སྟག་གི་སྐར་མདའ་ཆད་སོང་། །
ཕྱི་མའི་ས་མཚམས་ནས་བརྒལ་དགོས་བྱུང་ཡང་། །
འཇིགས་སྣང་སྤུ་ཉག་གི་རྡུལ་ཙམ་མེད་པས། །
འཇིགས་མེད་ང་རོ་ཡི་རང་སྒྲ་སྒྲོག་ཆོག །
མ་སྐྱེས་ཨ་མ་དེ་བྱམས་པ་གཤིས་ཡག །
ཡིད་འོང་ཉམ་ཆུང་གི་ཆུང་འདྲིས་འཛུམ་ཡག།
དྲན་པ་གཡུ་ཆུང་གི་དཀྱིལ་དུ་སྒོམ་པའི། །
འཕྱངས་རྒྱས་ཟླ་སྒྲོན་གྱི་ཐ་སྙད་གཉིས་པ། །
ཚངས་མགུར་སྙན་འཇེབས་ཀྱི་དུང་ཚིག་རེ་རེས། །
འཁོར་བའི་ནས་ཆང་གིས་དབང་མེད་བཟི་སོང་། །
འཁོར་འདས་ཆོ་འཕྲུལ་གྱི་ཟློས་གར་ཡོངས་རྫོགས། །
མ་ལྷག་དྲན་ངོས་སུ་ཇི་བཞིན་བསྒོམ་ཡོད། །
རྩོམ་གསར། 10