ཁྲོ་ལ།

མ་གཅིག་ཀུན་དཔལ།        2021-11-08

སྟོད་གངས་རིའི་དབུ་རྩེ་དགུང་ལ་ཟུག །

མཐོ་ཉི་ཟླའི་རྣ་རྒྱན་དཔྱང་འདྲ་མཛེས། །

རི་གན་ཚོ་ཁྲོ་ལའི་རི་རྒྱུད་རེད། །

བོད་སྲིད་པ་ཆགས་པའི་བླ་རི་ཡིན། །

རྫ་སྨུག་པོ་མཆོང་གི་ཁ་དོག་ཅན། །

དགུང་ལྷོ་སྤྲིན་དཀར་པོའི་དབུ་ཞྭ་གསོལ། །

རི་གན་ཚོ་ཁྲོ་ལའི་རི་རྒྱུད་རེད། །

བོད་མགོ་ནག་དར་གི་ལྷ་གཉན་ཡིན། །

རི་དཀར་གསལ་ཤེལ་གྱི་ལྷུན་པོའི་ཟླ། །

རྗེ་རྒྱལ་པོ་ཁྲི་ལ་བཞུགས་འདྲ་ཡོད། །

རི་གན་ཚོ་ཁྲོ་ལའི་རི་རྒྱུད་རེད། །

གླིང་ཕུ་ནུའི་སྲོག་གི་ཀ་ཆེན་ཡིན། །

ལྷོ་འཛམ་གླིང་འཛིན་མའི་ལྟེ་བ་ན། །

རི་རྔམ་ཆེན་བྱུ་རུའི་ཁང་བཟང་འདྲ། །

རི་གན་ཚོ་ཁྲོ་ལའི་རི་རྒྱུད་རེད། །

མ་སྲིང་མོའི་ཁྱིམ་གྱི་གཡང་མཛོད་ཡིན། །

ས་གསེར་ལྡན་གསེར་གྱི་པང་ལྟེབ་ན། །

རི་ཟུར་གསུམ་སྲིན་པོ་ཁྲོས་འདྲ་ཡོད། །

རི་གན་ཚོ་ཁྲོ་ལའི་རི་རྒྱུད་རེད། །

བུ་དཔའ་བོའི་ཚེ་ཡི་སྲས་མཁར་ཡིན། །

ཕྱི་མི་འགྱུར་བྲག་རིའི་བ་གམ་བརྩིགས། །

ནང་མི་འགྱུར་རིན་ཆེན་གཏེར་གྱིས་གསོས། །

རི་གན་ཚོ་ཁྲོ་ལའི་རི་རྒྱུད་རེད། །

ས་སྡེ་དགེའི་ཕུན་ཚོགས་ཕོ་བྲང་ཡིན། །

འདིའི་རྩ་བ་འོག་ཤོད་ཀླུ་ན་ཡོད། །

འདིའི་རྩེ་མོ་གོང་མ་ལྷ་རུ་ཡོད། །

རི་གན་ཚོ་ཁྲོ་ལའི་རི་རྒྱུད་རེད། །

རི་མི་འགྱུར་ལྷ་ཀླུའི་རྟེན་མཁར་ཡིན། །

ཕྱི་བྲག་དཀར་རྡོ་རྗེའི་ཐེམ་སྐས་འདྲ། །

དཔའ་དགྲ་ལྷས་མཐུ་དཔུང་འདི་ནས་ངོམས། །

རི་གན་ཚོ་ཁྲོ་ལའི་རི་རྒྱུད་རེད། །

བོད་རོང་འབྲོག་གཉིས་ཀྱི་གནས་རི་ཡིན། །

བུ་ཇོ་རིའི་ཕ་རི་ཁྲོ་ལ་ཡིན། །

དཔའ་རྒྱ་ཚའི་བླ་རི་ཁྲོ་ལ་ཡིན། །

བོད་མགོ་ནག་སྲུང་མི་ཁྲོ་ལ་ཡིན། །

གནས་ཁ་བའི་རྒྱན་གཅིག་ཁྲོ་ལ་ཡིན། །

  • ལེ་ཚན་སྔོན་མ།:གངས་ཅན་སྙན་ངག་པ་ཟུར་ཙམ་གླེང་བ་དྲན་པ་ཆུ་མིག་དགུ་སྒྲིལ།
  • ལེ་ཚན་རྗེས་མ།:ཚིག་ལ་སྦྱར་བའི་སྣང་སེམས།