དེ་དག་ལ་བརྟེན་ནས་རོང་ཡུལ་དང་ས་ཆ་གཞན་ལས་ཚོང་འགྲུལ་གྱི་ལམ་ནས་གྲོ་ནས་སྲན་གསུམ་སོགས་མཁོ་ངེས་ཀྱི་ཅ་དངོས་རྣམས་ཀྱང་བདེ་བླག་ཏུ་བསྒྲུབས་ཏེ་རྩྭ་ཐང་འདི་འདོད་ཡོན་ལོངས་སྤྱོད་འབེལ་བའི་བདེ་ལྡན་གྱི་ཞིང་ཁམས་ཤིག་ཏུ་བསྒྱུར་ཡོད།
གྲོགས་པོ་ལགས།   ཁྱེད་རང་རྩྭ་ཐང་དུ་ཉིན་ཤས་ཀྱི་འཚོ་བ་རོལ་བའི་བསྐལ་བཟང་ཞིག་བྱུང་ཚེ།   འབྲོག་མིས་ཚན་རིག་དང་མཐུན་པའི་ཕྱུགས་འཚོ་སྐྱོང་བྱ་ཚུལ་ལ་རྒྱུས་ལོན་བྱ་ཐུབ་ཅིང་།   མི་ཚང་སོ་སོའི་དགུན་མཚེར་གྱི་ཁྲོད་དུ་ལྕི་འབམ་ཞེས་བྱ་བ་ཕྱུགས་ཀྱི་ལྕི་བ་ཟླུམ་པོར་བརྩིགས་པའི་ནང་དུ་ཤིང་སྤེན་དམར་གྱི་བར་འཚང་དང་བཅས་སྟོན་དུས་སྒོ་བཤས་བྱེད་པའི་ཚེ་གཡག་ཤ་བཟང་གྲས་གཟུག་ཁ་ཤས་འཁྱགས་ཁེངས་སུ་བཞག་རྗེས་དཔྱིད་སྨད་དང་དབྱར་སྟོད་དུ་བེད་སྤྱོད་བྱེད་ཆོག་པའི་ཕྱིར་ཅུང་ཟད་རིད་ཅིང་ནང་དུ་ཤ་སྨུག་རོ་བཅུད་དང་ལྡན་པའི་ཤ་ཞིམ་པོ་ཞིག་དང་།   སྟོན་དུས་སུ་ཞོ་རྒན་ཞེས་བྱ་བ་ཞོ་བཟང་པོར་འོ་མའི་ཁ་སྤྲིས་མང་ཙམ་བླུག་ནས་ཟོ་བ་ཆེན་པོ་ཞིག་གི་ནང་གསོག་ཅིང་སྟོན་མཚེར་གྱི་ལྕི་འབམ་ནང་དུ་འཇོག་པའི་ཞིམ་མངར་འཛོམས་པའི་འོ་ཞོ་བཅས་ལོངས་སུ་སྤྱོད་པའི་བསོད་ནམས་ཀྱང་ལྡན་ཡང་སྲིད།   འབྲོག་ཡུལ་གྱི་བུད་ཤིང་གི་གཙོ་བོ་ཕྱུགས་ཀྱི་ལྕི་བ་ཡིན་པ་དང་ལྕི་བ་འབུད་པའི་ཚེ་དང་པོར་ཁྱེད་ལ་མི་གོམས་པའི་སྣང་བ་ཞིག་མཆིས་མོད་རིང་པོར་མི་དགོས་པར་དེ་ནི་ལུས་ཀྱི་དྲི་བཙོག་དག་ཅིང་ནད་འགོག་གི་ནུས་པ་ཆེན་པོ་ཡོད་པ་ཤེས་ཡོང་།   དཔྱིད་དབྱར་སྟོན་གསུམ་དུ་ཕྱུགས་རྫི་རྣམས་ཀྱིས་ངོས་འཇམ་རྒྱ་ཆེ་བའི་སྤང་ཐང་གི་ངོས་སུ་ཚྭ་ཡི་མ་ཎི་དང་གཡུང་དྲུང་གི་རི་མོ་བྲིས་ཏེ་སྒོ་ཕྱུགས་རྣམས་ཀྱིས་ས་ནག་ལ་ཐུག་གི་བར་དུ་གཙང་མར་བལྡགས་པས་རི་མོ་གསལ་པོ་དོད་པ་དག་ཀྱང་ང་ཚོའི་མིག་གི་དགའ་སྟོན་དུ་འཆར་ངེས།  
དེ་ནས་ཕྱུགས་རྫི་རྣམས་ཀྱིས་གྲོ་མ་དང་ལུག་ཞོ་བསྲེས་པའི་གྲོ་ཞོ་ཁྱེར་ནས་དམིགས་བསལ་གྱི་རྫི་ལུམ་ཞེས་ཟེར་བའི་སྤྲོ་སྐྱིད་གཏོང་བ་དང་།