མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་ཡི་དྲ་ཚིགས་སུ་སྤེལ་བའི་གནས་ཚུལ་ལ་གཞིགས་ན། ཉིན་ཤས་གོང་ཀྲུང་གུང་ཀྲུང་དབྱང་རྩ་འཛུགས་པུའུ་དང་། མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ། སློབ་གསོ་པུའུ། སྤྱི་བདེ་པུའུ། རྒྱལ་སྲིད་སྤྱི་ཁྱབ་ཁང་གཞུང་ཁོངས་རྒྱུ་ནོར་ལྟ་སྐུལ་དོ་དམ་ཨུ་ལྷན་བཅས་ཀྱིས《མཐོ་རིམ་སློབ་གྲྭ་དཀྱུས་མའི་མཐར་ཕྱིན་སློབ་མའི་ལས་ཞུགས་ཐོ་འགོད་ལག་ཁྱེར་མེད་པར་བཟོ་བའི་འབྲེལ་ཡོད་སྦྲེལ་མཐུད་ལས་དོན་ཡག་པོར་སྒྲུབ་རྒྱུའི་སྐོར་གྱི་བརྡ་ཐོ》（གཤམ་དུ《བརྡ་ཐོ》ཞེས་བསྡུ་རྒྱུ）ཁྱབ་བསྒྲགས་བྱས། 《བརྡ་ཐོའི》ནང2023ལོ་ནས་བཟུང《རྒྱལ་ཡོངས་ཀྱི་མཐོ་རིམ་སློབ་གྲྭ་དཀྱུས་མའི་དངོས་གཞི་དང་ཆེད་སྦྱོང་ཚན་ཁག་གི་མཐར་ཕྱིན་སློབ་མའི་ལས་ཞུགས་ཐོ་འགོད་ལག་ཁྱེར》དང《རྒྱལ་ཡོངས་ཀྱི་ཞིབ་འཇུག་སློབ་མའི་ལས་ཞུགས་ཐོ་འགོད་ལག་ཁྱེར》（གཤམ་གསལ་སྤྱི་མིང་ལ“ལས་ཞུགས་ཐོ་འགོད་ལག་ཁྱེར”）སྤྲད་རྒྱུ་མིན་པ་དང་། ལས་ཞུགས་ཐོ་འགོད་ལག་ཁྱེར་གསབ་སྒྲུབ་དང་བསྒྱུར་གཏོང་འགྲོ་ལུགས་མེད་པར་བཟོས་ནས། ལས་ཞུགས་ཐོ་འགོད་ལག་ཁྱེར་དེ་མཐོ་རིམ་སློབ་གྲྭའི་མཐར་ཕྱིན་སློབ་མའི་ལས་བསྡུ་དང་ཁང་པ་ཉོ་བ། ཡིག་ཚགས་བསྡུ་ལེན་བརྒྱུད་སྤྲོད་སོགས་ཀྱི་འགྲོ་ལུགས་གཉེར་བའི་དགོས་ངེས་ཀྱི་དཔྱད་གཞིའི་ཡིག་རིགས་ལ་བརྩི་རྒྱུ་མིན་ཞེས་བཀོད་ཡོད།

      ཡིག་ཚགས་བརྒྱུད་སྤྲོད་འབྲེལ་མཐུད་ཐད《བརྡ་ཐོའི》ནང2023ལོ་ནས་བཟུང་། རྩ་འཛུགས་མི་བཀོལ་ལས་ཁུངས་དང་ཡིག་ཚགས་དོ་དམ་ཞབས་ཕྱིའི་སྒྲིག་གཞིས་མི་དོན་ཡིག་ཚགས་ཞིབ་བཤེར་དང་དོ་དམ་བྱེད་སྐབས། ལས་ཞུགས་ཐོ་འགོད་ལག་ཁྱེར་དེ་ངེས་པར་ཉར་ཚགས་བྱ་དགོས་པའི་དཔྱད་ཡིག་ལ་མི་བརྩི། དེ་སྔའི་ཡིག་ཚགས་དཔྱད་ཡིག་ནང་གི་ལས་ཞུགས་ཐོ་འགོད་ལག་ཁྱེར་ལ་མུ་མཐུད་དུ་ཉར་ཚགས་བྱ་དགོས་ལ། ལས་ཞུགས་ཐོ་འགོད་ལག་ཁྱེར་ཆད་ལུས་བྱུང་བའི་རིགས་ལ་གསབ་སྒྲུབ་བྱེད་མི་དགོས། ལས་ཞུགས་ཐོ་འགོད་ཀྱི་བརྒྱུད་རིམ་ཐད་མི་བཀོལ་ལས་ཁུངས་ཀྱིས་ངལ་རྩོལ་གན་རྒྱའམ་ཡང་ན་ལས་ཞུགས་གྲོས་མཐུན་ཡི་གེ（དྲ་རྟགས་ཀྱི་གྲོས་མཐུན་ཚུད་པ）ཡང་ན་མཐོ་རིམ་དཀྱུས་མའི་སློབ་གསོ་ཡོན་ཚད་ལག་ཁྱེར་རམ་ཡང་ན་ཕྱོགས་གཉིས་ཀྱིས་ཁ་ཆད་བཞག་པའི་དཔང་ཡིག་གཞན་དག་ལ་བརྟེན་ནས། མཐོ་རིམ་སློབ་གྲྭའི་མཐར་ཕྱིན་སློབ་མར་ལས་ཞུགས་འགྲོ་ལུགས་སྒྲུབ་དགོས།

     《བརྡ་ཐོའི》ནང་ས་གནས་ཁག་གི་འབྲེལ་ཡོད་ལས་ཁུངས་དང་མི་བཀོལ་ལས་ཁུངས། མཐོ་རིམ་སློབ་གྲྭ་བཅས་ཀྱིས་དེ་སྔའི་ལས་ཞུགས་ཐོ་འགོད་ལག་ཁྱེར་དང་འབྲེལ་བ་ཡོད་པའི་བྱ་བ་སྒྲུབ་པའི་སྒྲིག་སྲོལ་གོ་རིམ་ལེགས་སྒྲིག་ནན་མོ་བྱས་ནས་དུས་ཐོག་ཏུ་ཡོངས་བསྒྲགས་བྱ་དགོས་པ་དང་། དཔང་རྟགས་དང་དཔྱད་ཡིག་སྔར་བས་བསྡུ་རུབ་བྱས་ཏེ་ལས་ཞུགས་ཐོ་འགོད་ལག་ཁྱེར་མེད་པར་བཟོ་བའི་འབྲེལ་ཡོད་ལས་དོན་སྦྲེལ་མཐུད་ཡག་པོ་བྱ་དགོས།