དྭངས་གསལ་མེ་ལོང་གི་ངོས་སུ།།

ཡིད་དབང་ངོ་མཚར་གྱི་ལྷ་མོ།།

ལྡེམ་ལྡེམ་ཕྱག་སོར་གྱི་ཡོ་ལང་།།

གཞོན་པའི་ནང་སེམས་ཀྱི་ཆོམ་རྐུན།།

སྙན་འཇེབས་གླུ་ངག་གི་མཆོད་པ།།

ཨ་སྔོན་ཆུ་འཛིན་ལ་སྤྲིངས་པས།།

དྲི་མེད་སྤྲིན་དཀར་གྱི་ལང་ཚོ།།

བུ་མོའི་སྐྱེས་གཟུགས་ལ་འཁོར་ཡོད།།

རྨད་བྱུང་ལང་ཚོ་ཡི་འདབ་མ།།

སྨིན་ལེགས་ལྗོན་བཟང་རྩེར་བཞད་པས།།

ནམ་ཟླ་སྟོང་དུས་ཀྱི་རླུང་བུས།།

འཐོག་པའི་སྐལ་དབང་རང་མི་འདུག །

ང་ཡི་སྙིང་ཆུང་གི་གཤོག་པ།།

བུ་མོའི་སྙིམ་པ་རུ་ལྷུང་བས།།

བརྩེ་འདང་འོ་ཆུ་ཡི་རི་མོ།།

ལག་པའི་མཛུབ་རིས་དང་འདྲེས་སོང་།།

ཡིད་འཕྲོག་པདྨ་ཡི་གེ་སར།།

གཡུ་སྦྲང་བུང་བ་ཡི་འཁོར་ས།།

མི་ཤི་གསོན་ཐབས་ཤིག་མེད་རུང་།།

ཤི་ཡང་མཉམ་ཤི་ཡི་ལས་དབང་།།

ཆུང་འདྲིས་ན་ཆུང་གི་བུ་མོ།།

དཀར་ནག་ངོས་གཉིས་ཀྱི་ཉི་ཟླ།།

ཕྱི་མའི་དམྱལ་བ་ལ་འགྲིམས་རུང་།།

མི་འགྱུར་སྙིང་ཆུང་གི་ལོ་མ།།