དག་པ་ཆུ་ཡི་ཀུན་གསལ་མ།།

རབ་དཀར་ཤེལ་གྱི་ཕོ་བྲང་ཆེ།།

རིན་ཆེན་སྣ་ལྔའི་གཞལ་ཡས་ནས།།

ཀླུ་རྒྱལ་འཁོར་བཅས་མགྲོན་ལ་བྱོན།།

སྡེ་བརྒྱད་རྒྱུ་སྐར་བྱེ་བའི་དཀྱིལ།།

རྟ་བདུན་ཀླུ་བརྒྱད་ལས་བཞི་ཡི།།

དབང་གི་ནོར་བུ་ལྷ་ལམ་ནས།།

འདོད་རྒུའི་འོད་ཟེར་དཔལ་འབར་ཅིག།

ཡིད་འོང་མཛེས་ལྡན་ཀླུ་སྨན་སྐྱིད།།

དགྱེས་འཛུམ་གཡང་གི་མདའ་དར་འཕྱར།།

སྣོད་བཅུད་རྩི་ཡི་བཀྲག་མདངས་དང་།།

ནང་བཅུད་གཡང་གི་མི་ནོར་ཁུགས།།

མངོན་མཐོའི་སྡེ་བཞིའི་ལོངས་སྤྱོད་ཀུན།།

ཉི་ཤར་ལོ་འགོའི་སྣོད་བཟང་དུ།།

འཛད་མེད་ཡུན་དུ་འཁྱིལ་བ་ཡི།།

བཀྲ་ཤིས་གང་གཱ་མ་ཡིས་སྲུངས།།

རང་ལུགས་གཙུག་ལག་ཆུ་གཏེར་ཁྱོན།།

ཚན་རྩལ་རིན་ཆེན་སྣ་ཚོགས་གླིང་།།

དེད་དཔོན་རིགས་མཐུན་ན་གཞོན་ཁྱུ།།

མཐུན་རྐྱེན་ཀླུ་དབང་མགོན་པོས་གཟིགས།།

བགྲེས་པོའི་སྐུ་ཐང་ཆུ་རྒྱུན་བསྲིངས།།

གཞོན་པའི་དགའ་ཕྱོགས་རླབས་ཀྱིས་རྩེན།།

དར་མའི་དཔྱོད་ཤེས་གངས་ཆུའི་མདངས།།

ཆུ་ལྷ་འཁོར་བཅས་དཔུང་གཉེན་བཞུགས།།

ཆུང་བ་ཡུལ་སྡེར་དགའ་སྐྱིད་འཛོམས།།

ཆེ་བ་རྒྱལ་ཁམས་བདེ་ཞིང་བརྟན།།

ཕོ་མོ་མཐུན་པའི་མཛའ་བཅུགས་ལ།།

མི་འཁྲུག་ཆུ་གཏེར་མ་མས་སྐྱོངས།།

མཉེན་ལྕུག་མཛེས་པའི་ཤིང་སྦྲུལ་མ།།

གཙུག་ན་རིན་ཆེན་ཡོན་ཏན་འཛིན།།

རྫོགས་ལྡན་བོད་ཀྱི་ལོ་སར་འཆར།།

དུས་བབས་གཡང་གི་སྣ་འདྲེན་མཛོད།།