གཞུང་ལམ་བདེ་ཁར། འཕྲུལ་རྟ་དལ་མགྱོགས་རན་པ་ཞིག་བྱས་ཏེ་སོང་ན། ཤིན་ཏུ་བསིལ་བའང་མ་ཡིན་པར་དྲོན་པོའང་མིན་པའི་རླུང་བུ་ཞིག་གིས། མཛའ་མོས་མཛའ་བོ་འགྲོ་ཁར་རྒྱབ་ཏུ་འཁྱུད་པ་བཞིན་ཕྱི་རུ་ཅུང་ཤུགས་ཀྱིས་འཐེན་དུས། འགོག་མེད་ཐུབ་མེད་ཀྱིས་མདུན་ནས་མདུན་དུ་བསྐྱོད་ཐུབ་པའི་ང་རྒྱལ་ཞིག་དང་། ལམ་འགྲམ་གྱི་དངོས་པོ་ཡོད་དོ་ཅོག་གིས་གུས་ཤིང་བརྩེ་བའི་སྒོ་ནས་སྐྱེལ་མ་བྱེད་བཞིན་ཡོད་པའི་ཚོར་བ་འདིས། རང་སྣང་ལ་སྔ་ན་མེད་པའི་ང་རྒྱལ་དང་རེ་འདུན་ཞིག་བསྩལ་ངེས།

ལུང་པའི་ཕུ་ནས་ལྷང་ལྷང་དུ་འབབ་པའི་ཆུ་ཕྲན་འགྲམ་ན། ཆུ་ངོགས་ཀྱི་ཉི་འོད་ལྡོག་འཕྲོ་བྱས་ཏེ་ངོ་གདོང་ལ་ཆེམ་ཆེམ་དུ་ཕོག་པའི་མོ་རང་། ཤིན་ཏུ་ལྷོད་ཅིང་བབ་ཆགས་པའི་སྒོ་ནས། “ཡར་འགྲོ། ཡར་འགྲོ། ཇ་ཞིག་འཐུང་ན”ཞེས་པས། ཡོད་ཚད་ནས་ཡོད་ཚད་མོ་རང་གིས་དང་ལེན་བྱས་སོང་བའི་སེམས་ཚོར་འདི་ཨང་། མོའི་མིག་ཟུར་ཡོམ་ཙམ་བྱས་ན་རྩྭ་དང་རྩི་ཤིང་། ཉེ་འགྲམ་གྱི་མེ་ཏོག་དག་ཀྱང་ངོ་ཚ་ཞིང་མགོ་བོ་གུག་གུག་བྱེད་ལ། རྐང་ཉྭའི་ངོས་སུ་ཆུ་ཐིགས་ཀྱི་ཟིལ་བ་ཁྲོམ་ཁྲོམ་བྱེད་ཅིང་སོར་མོའི་ཡལ་འདབ་ཀྱི་ལོ་མ་ཆུ་ནང་དུ་འཁྱུག་ཚེ། ཉ་དང་ཉ་མིན་གྱི་རིགས་ཤིག་ཡིན་ནའང་སྡུག་སྣང་མེད་ཅིང་དེ་བས་སྤྲོ་སྣང་ཤར། ལྷག་ཏུ་མོའི་སྐྲ་མདུད་ཀྱི་སྣེ་ལ་འཇུས་པའི་རྩྭ་ལྡུམ་དེ་དག་མཐོང་དུས། སུ་ཡང་མོའི་ཆེད་དུ་འཛིང་དང་རྩོད་བཞིན་ཡོད་པའི་ཉམས་སྣང་ཤིག་ཀྱང་ངང་གིས་འཁོར།

ལམ་བར་ནས། འབྲི་དང་མཛོ་མོ། རྟ་དང་ར་ལུག། སྦྲ་གུར་དང་འཕྲུལ་རྟ། ལྕི་ཕུང་དང་ཤིང་ར། ཡོད་ཚད་མདང་དགོང་གི་ཡིད་དུ་འོང་བའི་རྨི་ལམ་བཞིན། གཅིག་དང་གཉིས་སུ་མེད་པར་ལམ་ཐག་རིང་བའི་ང་ལ་གྲོ་ཁ་ཞིག་ཏུ་བྱིན་པའི་དགའ་ཚོར་དང་། ཆུ་འགྲམ་དུ་གཅེར་བུར་རྒྱུག་བཞིན་པའི་བྱིས་པ། ལག་ཏུ་བཞོ་ཟོ་ཐོགས་པའི་འབྲོག་མོ། ཁོད་ཡངས་ཀྱི་སྤང་སྟེང་དང་རྒྱུན་ཆགས་ཀྱི་གཙང་འགྲམ། མཐོན་པོ་སྒང་དང་དམའ་མོ་མཚེའུ་འགྲམ་གྱི་མི་དང་གནག་ཕྱུགས་ཀུན་ཀྱང་། རས་གཞི་ངོས་ཀྱི་ཡུལ་ལྗོངས་བཞིན་ཞི་ཞིང་བདེ་བའི་ངང་ཚུལ་འདིས། སེམས་ཀྱི་རྨ་ཤུལ་ན་སོས་པའི་དཔྱིད་ཀ་བཞད་ཅིང་རེ་བའི་ཁ་དོག་ལ་མེ་ཏོག་གི་འདབ་མ་རྒྱས་པར་མ་ཟད། དྭངས་གཙང་གི་ཨ་སྔོན་ལ་ཁྲི་གདུགས་ཀྱི་ཉི་གུར་དང་། སྤྲིན་དཀར་གྱི་འདབ་མ་རེ་རེས། ཡིད་ཀྱི་གཤོག་པ་ལ་སྔར་མེད་ཀྱི་རྩལ་ཤུགས་དང་སྤོབས་པ་ཡང་ཡང་བསྩལ།

མར་མར་ཡོང་ན། མི་ཆེ་ཆུང་གང་དང་གང་ཞིག་ཡིན་ན། ལག་བརྡ་བྱེད་ཞོར་སྒྲ་དུང་རྒྱག་ཞོར་ཡོང་ན། ཀུན་གྱིས་ཤིན་ཏུ་འདྲིས་པའི་མི་བཞིན་དགའ་བའི་འཛུམ་དང་དྭངས་བའི་སོ་དཀར་ངོམ་སྟེ། ལན་དུ་ལག་བརྡ་གྲངས་མེད་གནང་བའི་རྣམ་པ་འདིས། ལམ་གྱི་དཀའ་ངལ་ཡོད་ཚད་ཤུལ་དུ་བསྐྱུར་ནས་སྤྲོ་བའི་ཉི་ཟེར་གྱིས་རྒྱབ་ནས་སྐྱོར་བའི་དྲོད་ཁོལ་ཡང་ཡང་སྟེར་ཞིང་། ཉེ་བའི་མི་དང་ལྷན་དུ་བསྡད་དེ་སྦྲ་ནག་གི་གྲིབ་བསིལ་འོག་ཏུ་སྙིང་གཏམ་གྱི་རོལ་དབྱངས་དཀྲོལ་ཚེ། འོ་མའི་རང་མདངས་ཀྱིས་ཁ་ཞག་འཁྱིལ་བའི་ཇ་དང་ཇ་སྣེ་མང་ཙམ་འདྲེན་པས། རི་ལུང་གི་ཕུན་ཚོགས་ཉམས་སུ་མྱོང་ཞིང་རྫ་ཆབ་ཀྱི་ཞིམ་མངར་ཡིད་དུ་སིམ་ལ། འདས་མ་ད་གསུམ་གྱི་ལོ་རྒྱུས་དང་ཕྱི་དྲན་གྱི་གླེགས་བམ་རེ་རེར། གཞི་ནས་ཁ་འབྱེད་ཀྱི་སྤོབས་པ་དང་གླེང་སློང་གི་ནམ་སྐལ་དུ་འགྱུར་ལ། རྣམ་པ་དེ་ནི་དགོད་ཅིང་མགོ་བོ་གཡུག་ཞོར་ཕན་ཚུན་ལ་ལྟ་ཞོར་ཅི་འདྲ་སྙན་འཇེབས་ཀྱི་སྙན་ངག་གི་དཀར་ཆག་ཅིག་རེད་ཨང་།

ནུབ་ཁའི་ཉི་མའི་གྲིབ་མ་མདུན་ཕྱོགས་སུ་བསྲིངས་ཏེ། ལམ་གྱི་དམིགས་ཡུལ་རང་ཁྱིམ་དུ་ཕྱོགས་དུས། རྒྱབ་ཁུག་ནང་དུ་འོ་མ་འགྱིག་དམ་འགའ་དང་ཟིན་བསྐྱོད་ཀྱི་དཔེ་དེབ་རལ་བོ་ཞིག་ལས་མེད་ཀྱང་། དོན་དག་ཆེ་ཆེ་ཞིག་འགྲུབ་པའི་ཚོར་བ་དང་བསམ་པའི་འདོད་པ་ཞིག་གང་སོང་བའི་སེམས་བྱུང་ཞིག་འགོག་མེད་དུ་འཁྲིགས་བྱུང་། མ་ཟད་རྩོམ་གྱི་ཁ་བྱང་དུ། འབྲི་ཟླའི་སྒང་རྒྱུད་ཀྱི་ལ་རྩེ་དཀར་རིལ། །ས་རྒྱུས་ལོ་རྒྱུས་ཀྱི་མེས་པོའི་ཞབས་རྗེས། །ཞེས་པའི་ཟིན་བྲིས་དེ་ཉིད། ཧ་ཅང་རྫིག་སྣང་དང་བརྟན་ཆ་ཞིག་ཡིད་ལ་ལྗིད་ཏིག་གེ་བྱུང་།