ཉིན་དེར་ཨ་ཕས་ང་རང་སློབ་གྲྭར་བསྐྱལ་དགོས་ཀྱང་དོན་དག་ཅིག་གིས་ཨ་ཕར་ཁོམ་པ་མ་བྱུང་བས་ཨ་མས་ང་རང་བསྐྱལ་རྒྱུ་བྱས།མོས་ཁ་སང་བཀྲུས་པའི་ཁ་ལད་པའི་བོད་ལྭ་སྨུག་ནག་སྟེ་གོན་པ་དང་།ལྷམ་ཡང་དེ་སྔོན་གྱི་ལྕི་དྲི་འཐིབ་པའི་རས་ལྷམ་དེ་མིན་པར་ཨ་ཕས་ཉིན་འགའི་སྔོན་དུ་རྫོང་ཐོག་ནས་ཉོས་ཡོང་བའི་རས་ལྷམ་གསར་བ་དེ་གྱོན་ཡོད།ངས་གོན་པ་གསར་པ་ཆ་འགྲིག་དེ་གྱོན་རྗེས་དཔེ་དེབ་དག་གྲ་སྒྲིག་བྱས།།

ངེད་གཉིས་རྫོང་ཐོག་ཏུ་ཐོན་རྗེས།ཐད་ཀར་སློབ་གྲྭའི་ཕྱོགས་སུ་སོང་བ་ཡིན།ཉིན་དེའི་ཉི་མ་ནི་ངོ་གནོང་དགའ་ཆེ་བའི་བུ་མོ་ཞིག་དང་འདྲ་བར་སྤྲིན་གསེབ་ནས་སྐབས་རེར་བསྐུངས་ཤིང་བར་རེར་ཕྱི་རུ་མངོན་ཏེ་ནུབ་ཕྱོགས་སུ་སྐྱོད་ཀྱིན་འདུག་ལ།རྒྱང་རིང་གི་རི་སྒང་དག་ནི་སྐྱ་ཐལ་ལེར་འདྲེན་བྱེད་མིག་གི་འཆར་སྒོ་རུ་ཤར་ཡོང་།ལམ་འགྲམ་གྱི་རྩྭ་དང་རྩི་ཏོག་རྣམས་འུར་འུར་གཡུག་པའི་བྱང་རླུང་ཁྲོད་སྐམ་རིད་དུ་གྱུར་འདུག། ལམ་བར་དུ་ཨ་མས་ལུས་ཕུང་ལ་བདག་བྱེད་དགོས་ཚུལ་དང་སློབ་སྦྱོང་ཡག་པོ་བྱེད་དགོས་ཚུལ་གྱི་ཉག་ཉོག་གི་གཏམ་མང་པོ་ཞིག་གླེང་སོང་།ཅུང་ཙམ་སོང་བ་ན།མོས་ང་ལ“ཁྱོད་ཀྱིས་དེ་ནས་ང་ལ་སྒུག་སྡོད་དང་ང་ལ་དོན་དག་ཅིག་ཡོད”ཟེར་བཞིན་ལམ་གྱི་ཕར་ཕྱོགས་སུ་བརྒྱུགས་སོང་།ངས་དེ་ནས་མོར་བསྒུག་བསྡད་པ་ཡིན།མོ་ཚོང་ཁང་འགའི་ནང་དུ་སོང་ཡང་ཅང་མི་འགོར་བར་སྒོར་བུད་ཡོང་།མོ་ཡང་བསྐྱར་ཚོང་ཁང་ཞིག་གི་སྒོ་འགྲམ་དུ་སོང་ནས་ཕར་བལྟས་ཚོད་ལ་ཚོང་དཔོན་དེར་དངོས་པོ་ཞིག་གི་རིན་གོང་འདྲི་བཞིན་པ་འདྲ།ལྷག་རླུང་གིས་ཡོམ་ཡོམ་དུ་སྒུལ་བཞིན་སྣང་བའི་ལུས་ཕུང་དེས་ཁྱིམ་ཚང་དང་བུ་རྒྱུད་ཀྱི་ཆེད་དུ་དཀའ་སྡུག་གང་མང་ཞིག་མྱངས་དང་མྱོང་བཞིན་ཡོད་པ་གཉོམ་ཞིང་རིད་པའི་རྒྱབ་གཟུགས་ལས་ཡོད་ཚད་མངོན་འདུག །ཅུང་ཙམ་འགོར་རྗེས།མོས་ལག་གཡས་པའི་ནང་དུ་འགྱིག་ཁུག་ཅིག་བཟུང་སྟེ་ཚོང་ཁང་ནས་ངའི་ཕྱོགས་སུ་དགའ་སྤྲོའི་ངང་ཡོང་བར་བལྟས་ན་ཕལ་ཆེར་དོན་དག་བསྒྲུབས་ཚར་སོང་བ་འདྲ།ཨ་མ་ངའི་གམ་དུ་སླེབས་པ་ན་ཧ་ཅང་ཡིད་ཚིམས་པའི་ངང་གདོང་ལ་འཛུམ་གྱིས་ཁེངས་བཞིན“ནམ་ཟླ་ཇེ་འཁྱག་རེད།ལག་པ་གྲང་དུ་མ་འཇུག”ཟེར་ཞོར་ནག་ཅིང་རྩུབ་པའི་ལག་ཟུང་གིས་འགྱིག་ཁུག་ལས་ང་ལ་ལག་ཤུབས་ཤིག་སྟེར་བྱུང་།སྐབས་དེར་ངའི་མགྲིན་ཁུག་ཏུ་བརྗོད་མི་ཤེས་པའི་ན་ཟུག་ལྕི་མོ་ཞིག་གིས་འཚང་ཁ་རྒྱབ་པས་ངག་ཀྱང་མི་འཁྱོལ་བར་གྱུར།མོས་རང་གི་གྲང་ངར་སེར་གསུམ་གྱིས་བཅོམས་པའི་ནག་ཅིང་རྩུབ་པའི་ལག་པ་དེར་ལག་ཤུབས་ཤིག་མི་ཉོ་བར་མ་ཟད།བསགས་བསགས་ཀྱི་དངུལ་སྒོར་གྱིས་ང་ལ་ལག་ཤུབས་ཤིག་དང་བྱིས་པ་གཞན་དག་ལ་རྩེ་ཆས་ཉོ་བ་ལས།རང་ལ་ཐ་ན་ལག་ཤུབས་གོང་རྩ་ཞིག་ཀྱང་ཉོས་མེད་ལ།རང་གི་ལག་པར་སེར་ཀ་དོད་ཡོད་ཀྱང་ངའི་ལག་པ་གྲང་བར་ཁོ་ནར་བསམ་འདུག། ངའི་མིག་ལམ་ཡང་ཅི་ཞིག་གིས་མག་མོག་ཏུ་བསྒྲིབས་སོང་།ཡིན་ཡང་ཨ་མས་མཐོང་བར་དོགས་ནས་མྱུར་དུ་ལག་པས་མིག་མཐའ་ཕུར།ཨ་མས“ཅི་རེད་ཐལ”ཟེར་བཞིན་གཟབ་ནན་ངང་ངའི་གདོང་ལ་ཅེར་བྱུང་།ངས“ས་རྡུལ་མིག་ནང་དུ་ཤོར་སོང་།”ཞེས་སྐད་གདངས་འདར་འདར་ངང་རྫུན་ཞིག་ལབ་དགོས་བྱུང་།གལ་ཏེ་དེ་ལས་ལྷག་ཅིག་བཤད་ན་ངའི་མིག་ཆུ་རང་དབང་མེད་པར་འཐོར་སྲིད་པས།ལག་ཤུབས་ཏེ་བླངས་ནས་སྔོན་ཏུ་བུད་སོང་།།

དགོང་མོ་གློག་གཟུམ་སྟེ་མར་ཉལ་རྗེས།ངས་ཨ་མས་བྱིན་པའི་ལག་ཤུབས་ཏེ་སྔས་མགོའི་འགྲམ་ནས་བླངས་ཏེ་བྲང་ཁར་གླན་དུས།མིག་ལམ་ཡང་བསྐྱར་མག་མོག་ཅིག་གིས་བསྒྲིབས་སོང་།དེ་སྨག་རུམ་ཡིན་ནམ་མིག་ཆུ་ཡིན་པ་མ་ཚོར།མག་མོག་དེའི་གསེབ་ནས་ངས་ཨ་མའི་ནག་ཅིང་རྩུབ་པའི་ལག་ཟུང་དང་ཁ་ལད་པའི་བོད་ལྭ་སྨུག་ནག། ད་དུང་འཛུམ་གྱིས་ཁེངས་པའི་བྱད་བཞིན་དག་མཐོང་བྱུང་།འཁྱག་སིབ་སིབ་ཀྱི་ཅི་ཞིག་མཁུར་ཚོས་བརྒྱུད་དེ་སྔས་མགོ་རུ་ལྷུང་བས།སྔས་མགོ་ཡང་བརླན་སོང་ངོ་།།