ཉིན་འདི་འགར་ཟི་ལིང་ལ་ཆར་པ་ཟམ་ཟིམ་ཞིག་བབས་ནས་མཚམས་ཆད་ཀྱི་མི་འདུག་པས། ནམ་མཁའི་མཛེས་པ་ཡོད་ཚད་སྤྲིན་ནག་གིས་བསྒྲིབས་ཤིང་གྲོང་མཐའི་རི་བོ་དག་ཀྱང་ན་བུན་གྱིས་གཡོགས།

དཔྱིད་ཚུགས་ནས་དབྱར་ལ་ཉེ་བའི་སྐབས་འདིར། སྐྱེ་དངོས་ཡོད་ཚད་ལ་སྐྱེས་སྟོབས་ཀྱི་གསོན་ཤུགས་རྒྱས་བཞིན་ཡོད་མོད། ང་དེ་ཚོར་དེ་འདྲའི་སྤྲོ་བ་མི་འདུག། དེ་ཡང་རང་ཉིད་མི་ལྷུན་ཆགས་དང་ཞི་དུལ་ཞིག་ཡིན་ཏེ་ནམ་རྒྱུན་འདུ་འཛི་དང་ཟང་ཟིང་སྤངས་ཏེ་ལྷིང་འཇགས་ངང་སྡོད་པར་དགའ་བ་ཞིག་ཡིན་པ་ལས། ཚེ་སྲོག་ལ་མི་དགའ་བ་དང་རང་བྱུང་ཁམས་ལ་མི་དགའ་བ་ཞིག་ག་ལ་ཡིན། ཟི་ལིང་ན་ཉི་མ་མི་འདུག། ཟི་ལིང་གི་ཉི་མ་སྤྲིན་ནག་གིས་ཁྱུར་མིད་བཏང་སོང་། ངས་ཆར་པས་བརླན་པའི་གཞུང་ལམ་དང་རྣམ་རིག་མེད་པའི་ཐོག་ཁང་དག་ལ་བལྟས་ནས་ཀླད་རྒྱངས་ཤིག་བྱས་རྗེས་སློབ་ཁང་གི་སྒེའུ་ཁུང་ཁར་འགྲེངས་ཏེ་ཉི་མ་མེད་པའི་གྲོང་ཁྱེར་འདིའི་སྣོད་བཅུད་ལ་འཐིམ་ཅི་ཐུབ་བྱས། སྐབས་འདིར་ངའི་སེམས་ལ་ཡང་ཡང་འཆར་བ་ནི་ལྷ་བྱམས་རྒྱལ་གྱི་ལྷུག་རྩོམ《ཕྱིར་ལོག་མི་ཐུབ་པའི་མི།》ཞེས་པ་དེ་རེད། རྩོམ་པ་པོ་ཁོང་དང་འདྲ་བར་ང་ཡང་ཟི་ལིང་དུ་ལོ་གཅིག་རིང་བསྡད་ཅིང་ད་དུང་དུས་ཡུན་རིང་པོ་ཞིག་ལ་འདུག་དགོས་པས།རང་ཉིད་ཀྱང་འདི་གའི་སྲང་ལམ་དང་གླིང་ག། མི་ཚོགས། མཚན་ལྗོངས། མཁའ་རླུང་། ད་དུང་སྒྲིག་ལམ་དང་འཚོ་བའི་གོམས་གཤིས་སོགས་ཚང་མར་འདྲིས་དགོས་མོད། འདི་འདྲའི་དུས་ཚིགས་དང་གནམ་གཤིས་ཀྱི་འོག་ངས་ནམ་ཡང་ཐོག་མར་དྲན་འོངས་པ་ཕ་ཡུལ་རེད། ཕ་ཡུལ་གྱི་མཛེས་ཤིང་སྡུག་པའི་རི་ཆུ། ལྷོད་ཅིང་འཇགས་པའི་ཁོར་ཡུག། བག་ཡངས་རྒྱུ་བའི་ནོར་ལུག། གཟུགས་སྟོབས་ཆེ་བའི་སྒོ་ཁྱི། ཡུལ་མི་ཚོའི་བྲེལ་འཚུབ་མེད་པའི་འཚོ་བ། ད་དུང་ཕ་མ་དང་གཉེན་ཉེ་སོགས་ངའི་སེམས་ངོར་འཆར་ཐུབ་པ་ཐམས་ཅད་ཤར་བྱུང་། ཡིན་ནའང་། ད་ལྟ་ང་རང་ཡང་ས་མཐའི་གྲོང་ཁྱེར་འདིའི་ཆ་ཤས་སུ་གྱུར་ཚར་བས། ཕྱིར་འཚོ་བ་དངོས་སུ་བབས་ནས་འབྱུང་འགྱུར་ཡོད་ཚད་ལ་འཛུམ་གྱིས་བསུ་ཐུབ་དགོས།

ཟི་ལིང་ན་ཉི་མ་མི་འདུག། ཟི་ལིང་གི་ནམ་མཁའ་རྫས་འགྱུར་གྱི་དུ་སྨུག་གིས་བཏུམས་ནས་ཕ་ཡུལ་ལྟ་བུའི་སྔོ་ལྗང་གི་ནམ་མཁའ་ཞིག་ནམ་ཡང་མཐོང་དུ་མེད། ཟི་ལིང་ན་ཉི་མ་མི་འདུག། མི་རྣམས་ལ་གྲིབ་མ་མི་འདུག། ངས་གློག་སྒྲོན་བཀར་ནས་ཅིས་ཀྱང་རང་ཉིད་ལ་གྲིབ་མ་ཞིག་བཟོས། ཟི་ལིང་ན་ཉི་མ་མི་འདུག མི་རྣམས་ལ་རྒྱབ་གཟུགས་མི་འདུག། ངས་འཇིམ་པ་བརྫིས་ནས་ཅིས་ཀྱང་རང་ཉིད་ལ་རྒྱབ་གཟུགས་ཤིག་བཟོས།

ཉི་མས་གྲོང་ཁྱེར་འདིའི་མཛེས་སྡུག་གི་ཁ་དོག་ཁུར་ནས་རྒྱང་དུ་བཞུད་པས། མཚར་སྡུག་བཀྲ་བའི་གྲོང་ཁྱེར་འདིའི་བཀྲག་མདངས་བོར་ཏེ་རབ་རིབ་དང་མག་མོག་ཏུ་སྣང་། རླངས་འཁོར་མང་པོ་ཞིག་ནམ་ལངས་པ་ནས་ས་རུབ་པའི་བར་དུ་གཙང་པོ་ལྟར་བཞུར་ཞིང་། ཡང་གཙང་པོ་དང་མི་འདྲ་བར་ཕར་སོང་ནས་ཕྱིར་ལའང་ཡོང་། དེ་དག་ཀྱང་མང་ཤོས་གླ་གཏོང་རླངས་འཁོར་ཆུང་བ་དག་རེད། ནམ་ཟླ་དབྱར་ལ་ཉེ་བས་མི་རྣམས་ཀྱིས་ཀྱང་དབྱར་གྱི་ངང་ཚུལ་བཟུང་ནས་ལྭ་བ་སྲབ་མོ་རེ་གྱོན་ཞིང་། རྒྱ་མོ་རེ་འགས་དོར་ཐུང་རེ་གྱོན་ནས་འགྲོ་བའང་མཐོང་སྲིད། འོན་ཀྱང་གྲང་ངར་ནི་སྔར་བཞིན་གདུག་རྩུབ་ཆེ་བའི་གཅན་གཟན་གཏུམ་པོ་ཞིག་གིས་ངར་སྐད་སྒྲོག་པ་ལྟར་ལམ་དུ་འགྲོ་བའི་མི་སུས་ཀྱང་གྲང་འདར་མི་རྒྱག་པ་གཅིག་ཀྱང་མི་འདུག། དེ་རིང་ནས་བཟུང་།གྲོང་ཁྱེར་འདིས་དགུན་གྱི་གྲང་ངར་གྱི་ལྭ་བ་ཕུད་ནས་དབྱར་གྱི་ལྗང་མདོག་གི་ན་བཟའ་མནབ་འགོ་བརྩམས། སྤྱིར་ན། འདི་འདྲའི་དུས་ཚིགས་ཤིག་ཏུ་ངས་ཀྱང་ལང་ཚོའི་ཁོ་ལག་རྫོགས་བཞིན་པའི་ས་གཞི་དང་སྔོ་ལྗང་དྭངས་གཙང་གི་ནམ་མཁའ། བག་ཕེབས་ཀྱི་ནོར་ལུག་དང་ནོར་ལུག་གི་རྫི་བོ། ད་དུང་ཞིང་ཐང་གི་རྨོ་འདེབས་སོགས་བྲིས་ནས་མཛེས་སྡུག་གི་དུས་ཚིགས་འདིར་བསྟོད་གླུ་ལེན་དགོས་མོད། ས་མཐའི་གྲོང་ཁྱེར་འདིར། ངས་མག་མོག་གི་ནམ་མཁའ་ཞིག་དང་ཐལ་མདོག་གི་ས་གཞི་ཞིག་ལས་ཅི་ཡང་མཐོང་མ་བྱུང་བས་སེམས་ཀྱི་འཆར་སྒོའི་ངོས་ལ་སྐྱོ་བའི་ཐལ་རྡུལ་ཆགས། དྲན་པའི་མིག་ཟུང་ལ་སྡུག་གི་མཆི་མ་འཁོར།

《ཕྱིར་ལོག་མི་ཐུབ་པའི་མི།》ཞེས་པའི་ནང་རྩོམ་པ་པོས་ཡུལ་གྱར་བ་དང་ཕ་ཡུལ་གྱི་འབྲེལ་བ་ནི་ཤོག་བྱ་དང་ཤོག་བྱ་གཏོང་མཁན་གྱི་འབྲེལ་བ་དང་མཚུངས་ཤིང་། ཤོག་བྱ་བར་སྣང་དུ་ཇི་ལྟར་མཐོ་རུ་འཕུར་ཀྱང་སྲད་བུས་བཏགས་ཡོད་ཅིང་། མཐོ་ནས་མཐོ་རུ་འཕུར་བའི་ཨུ་ཚུགས་དེ་ནི། ཕ་ཡུལ་དང་རིང་ནས་རིང་དུ་གྱེས་བའི་རྣམ་པ་ཞིག་ཡིན་ངེས་ཞེས་བརྗོད་ཡོད་དེ། ད་ལྟ་ང་ཡང་དེ་ལྟ་བུའི་ས་མཐའ་ཉུལ་བའི་ཡུལ་གྱར་བ་ཞིག་ཏུ་འགྱུར་ཉེན་འདུག ། རྩོམ་པ་པོ་ཁོང་དང་ངེད་གཉིས་མི་འདྲ་ས་ཞིག་ལ། ང་ནི་གྲོང་ཁྱེར་འདིར་ཐོན་ནས་ཡུན་རིང་འགོར་མེད་པས། ངའི་སེམས་སུ་ད་དུང་ཕ་ཡུལ་གྱི་ཟུངས་ཁྲག་དག་རྩ་ལམ་སོ་སོ་ན་ལྷོག་ལྷོག་ཏུ་གདུ་བཞིན་འདུག ། གནས་འདི་འདྲ་ཞིག་ཏུ་ང་ཚོ་སུ་ལ་ཡང་ཡུལ་གདུང་དང་རུས་གདུང་སོགས་སྐྱོ་བ་དང་དྲན་པ་ཡོད་སྲིད་མོད། འོན་ཀྱང་། ཡུལ་གྱར་བ་ལ་ཡུལ་གྱར་བའི་རྨི་ལམ་དང་ཕུགས་བསམ་ཡོད། ང་ཚོ་ནམ་རྒྱུན་གང་ཞིག་གི་ཆེད་དུ་བྲེལ་འཚུབ་ཀྱིས་རྒྱུག་པ་ལས་སེམས་ལྷོད་ལ་བབས་ནས་ང་རྒྱལ་མེད་པ་དང་། ཕྲག་དོག་མེད་པ། འགྲན་སེམས་དང་གནོད་སེམས་མེད་པར། འཆམ་མཐུན་དང་སྤྲོ་སྐྱིད་ཀྱི་ངང་འཚོ་བར་འཛུམ་གྱིས་བསུས་ན་དེ་ལས་དོན་སྙིང་ཡོད་པ་མ་རེད་དམ།

ནམ་མཁའི་སྤྲིན་པ་སྨུག་པོ་དག་རིམ་གྱིས་རྒྱང་ཏུ་གྱེས་ཏེ་དྲང་ཤུར་ཤུར་གྱི་ལམ་ཞིག་དབང་སྔོན་གྱི་མཐོངས་ནས་ས་གཞིའི་པང་དུ་འཐེན། དེར་མཐུད་ཉི་འོད་ཕྲ་མོ་རེས་ཀྱང་སྤྲིན་པ་ཡལ་ཟིན་པའི་ཤུལ་ནས་བདེ་སྐྱིད་ཀྱི་མགོ་བོ་ཕྱི་རུ་བཏོན་ཏེ་ལྷུག་པར་བགད་སོང་། ད་ལྟ། ཟི་ལིང་ལ་ཉི་འོད་འཕྲོས་སོང་། མི་རྣམས་ཀྱི་གྲིབ་མ་དང་རྒྱབ་གཟུགས་ཀྱང་ཕྱིར་ཐོན་བྱུང་། ཟི་ལིང་ལ་ཉི་འོད་འཕྲོས་སོང་། འོད་ལམ་ལམ་གྱི་བཀྲག་མདངས་འོག་གི་ཟི་ལིང་ལ་ངོ་གདོང་མི་འདུག ། དགོད་སྒྲ་མི་འདུག ། འཛུམ་མདངས་ཀྱང་མི་འདུག །