ཉིན་འདི་དག་ལ་ཁ་བ་བབས་རྒྱུན་ཆད་སོང་ལ། ཁ་བ་བབས་རྒྱུན་ཆད་པ་དང་དུས་མཚུངས་སུ་རྣམ་གཤིས་ཀྱང་ཇེ་དྲོར་སོང་། ཁ་བ་འབབ་རྒྱུན་ཆད་པའི་ཉིན་འདི་དག་ལ་ངས་ཕྱི་དྲོའི་མཚམས་སྤྲིན་གྱི་མཛེས་པ་ལ་ལྟ་བཞིན་ཁ་བ་འབབ་པར་རེ་ཞིང་སྒུག་གིན་ཡོད་ལ། ཁ་བ་མ་བབས་པའི་ཉིན་འདི་དག་ལ་ངའི་སེམས་པ་ཡང་ཤིན་ཏུ་སྨྲེང་བྱུང་། རྒྱུ་མཚན་འདི་རེད་ཅེས་གསལ་ཁ་ཆོད་པ་ཞིག་ང་ལ་བཤད་རྒྱུ་མི་འདུག་མོད། ཁ་བ་མ་བབས་པའི་ཉིན་འདི་དག་ལ། ངའི་ནང་སེམས་སུ་ང་ཁ་བ་དང་གཏན་ཏུ་ཐུག་རྒྱུ་མ་རེད་སྙམ་པའི་རེ་དོགས་ཀྱི་སྨུག་སྤྲིན་བན་བུན་ཞིག། ནང་སེམས་ཀྱི་ཟབ་ས་ཞིག་ནས་ཡང་ཡང་སྣང་བྱུང་། རེ་དོགས་ཀྱི་སྨུག་སྤྲིན་དེ་ཡིས། ང་ལ”འདུས་པ་བྲལ་ངེས་ཡིན་པས་མཐུན་པར་གྱིས”ཟེར་བའི་དོན་དངོས་ཀྱི་ཆོས་ཉིད་དེར་ངོ་གདོང་གཏད་དུ་བཅུག་སོང་ལ། ནང་དོན་དེ་ཤེས་སྟབས་ཀྱིས་ང་རྒྱུ་མཚན་མེད་པར་སེམས་གཅོང་ཡང་ཡང་བྱས།

ཁ་བ་འབབ་རྒྱུན་ཆད་སོང་། ངས་མཇུག་མཐའི་ཁ་བ་ནི་དུས་སྐབས་གང་ཞིག་ནས་བབས་པ་ཡིན་མིན་ཡིད་ལ་དྲན་གསོས་ཐུབ་ཀྱིན་མི་འདུག གལ་ཏེ་དོ་ནུབ་སིམ་སིམ་གྱི་མཇུག་མཐའི་ཁ་བ་མི་ཡུལ་འདིར་བབས་པ་ཡིན་ན། ངས་དྭངས་གཙང་གི་ལག་ཟུང་ནམ་མཁའ་ལ་སྲིང་གིན། སིམ་སིམ་གྱིས་ས་གཞིར་འཐོར་བའི་ཁ་བ་རེ་རེ་ཡི་མཛེས་སྡུག་མ་ལུས་པ་སྟོང་ཟད་མི་གཏོང་བར་ལོངས་སུ་སྤྱོད་ངེས། ས་རུ་བབས་ནས་མེད་པར་འགྱུར་བཞིན་པའི་ཁ་བ་རེ་རེ་ལའང་བདེ་མོ་ཡིད་ཚིམ་ཞིག་འཇོག་ངེས་ཡིན། དེ་ནི”འདུས་པ་བྲལ་ངེས་ཡིན་པས་མཐུན་པར་གྱིས”ཞེས་པའི་ལེགས་བཤད་དེའི་ནང་དོན་གོ་སོང་བས་ཡིན་ཡང་སྲིད་མོད། དེ་ཙམ་ཞིག་ཀྱང་མ་ཡིན་པར། “ཕལ་ཆེར་ཡོངས་སུ་འདྲིས་ལ་སྡང་། །རྟག་ཏུ་གསར་པ་གསར་པ་འཚོལ། །”ཞེས་པའི་འགྲེལ་བཤད་མི་ཕོག་པའི་སོ་སྐྱེས་ཀྱི་སྣང་བ་དེ་དང་རིང་དུ་བརྒལ་ན་འདོད་པའི་ཡིན། སྤྱིར་ན་ཡོད་ཚད་ནི་སྐད་ཅིག་གིས་འགྱུར་བཞིན་ཡོད་པ་ལྡོག་ཏུ་མེད། འོན་ཏང་། ང་འདྲིས་གོམས་སུ་སོང་བའི་བྱ་དངོས་དག་སྡང་མིག་གིས་ལྟ་བཞིན་རིང་དུ་འགྱེད་རྒྱུར་དགའ་བའི་མི་དག་ལ་ཤིན་ཏུ་སུན་བྱུང་།

ད་ནི་མཚམས་སྤྲིན་གྱི་མཛེས་པ་ཉི་ནུབ་ཏུ་བསྡུས་ནས་མག་མོག་གི་ཡོལ་བས་ཡོངས་སུ་བཟུང་བྱུང་། ང་སྨྲ་བ་མེད་པར་ལྷིང་འཇགས་ཀྱི་གཞིས་

ཀ་ནས་ལྷོད་ཀྱིས་བསྡད། ནང་སེམས་འདི་ཤིན་ཏུ་སྟོང་སང་ངེར་བསམ་ན་ང་ལ་སྐྱོ་སྣང་གང་ཡང་མེད་པ་འདྲ་བྱུང་། འོན་ཏང་སྒེའུ་ཁུང་གི་གློད་འོད་ལ་ཅེར་གྱིན། ཅི་ཞིག་ལ་ངང་སྒུག་བྱེད་ཀྱིན་པའི་དོན་ལ་བསམ་ན། ངའི་ནང་སེམས་སུ་སུས་ཀྱང་སྨྲ་མི་ཤེས་པའི་སྐྱོ་སྣང་ཞིག་གིས་ཡོངས་སུ་བཟུང་ཡོད་པ་འདྲ། སྐྱོ་སྣང་དེ་ནི་ཅི་ཞིག་ཡིན་ནམ། ཁ་བ་ལ་རེ་ཞིང་སྒུག་པའི་ངང་སྒུག་དང་འདྲེས་པའི་སྐྱོ་སྣང་ཡིན་ནམ། ཡང་ན་སྙིང་ཉེ་ཞིག་དྲན་པའི་དྲན་གདུང་རིང་མོ་ཞིག་ཡིན་སྲིད། ངས་དེ་དག་ལ་འགྲེལ་བཤད་ཐུབ་ཀྱིན་མི་འདུག། ཅིག་བྱས་ན་སྙིང་ཉེ་ཞིག་ང་ལ་དགའ་ཆེ་བའི་རྒྱུ་མཚན་གྱིས་ཡིན་ཡང་སྲིད། དེ་ལྟར་ཡིན་ན། ངས་སེམས་གཅོང་བྱེད་དོན་མི་འདུག་ཨང་། དོ་ཞག་ངའི་ནང་སེམས་འདི་སྟོང་སང་ཡིན་པ་བཞིན་མཚན་མོའི་རྨི་ལམ་ཡང་སྟོང་སང་ངེ་སྟེ་ཅི་ཡང་ཤར་རྒྱུ་མི་འདུག། དེ་ནི་བྱ་བའི་བྲེལ་འཚུབ་ཀྱི་དབང་གིས་མཚན་མོར་ངལ་གསོ་ཡི་དུས་ཚོད་ཉུང་བས་ཡིན་ནམ། གྲོགས་པོ་ཞིག་གིས་རྨི་ལམ་ནི་གཉིད་རྒྱུན་རིང་བས་རྨིས་པ་ཡིན་ཟེར། དོན་དེར་བསམ་ན་ང་མཚན་མོར་གཉིད་པའི་དུས་ཚོད་ནི་ཤིན་ཏུ་ཉུང་བ་འདྲ་བྱུང་།