ཨ་ཕ་ལགས།

ང་ཚོའི་མིག་ཆུ་ཡི་ཕྲེང་རྡོག་རེ་རེ།

སེམས་ཁོང་གི་ན་ཟུག་རེ་རེ་ཡིན།

མར་མེ་ཡི་འོད་སྣང་རེ་རེ།

དྲན་གདུང་གི་འབོད་པ་རེ་རེ་ཡིན།

ཚ་གསུར་གྱི་དྲི་མ་རེ་རེ།

སྐྱེལ་མ་ཡི་བརྒྱགས་བྲོ་རེ་རེ་ཡིན།

ལག་ཟུང་གི་སྙིམ་པ་རེ་རེ།

གསོལ་འདེབས་ཀྱི་ཡིག་དྲུག་རེ་རེ་ཡིན།

ཨ་ཕ་ལགས།

ལྷད་མེད་ཀྱི་ངོ་གདོང་རེ་རེ།

སེམས་ནང་གི་དྲན་ཤིང་རེ་རེ་ཡིན།

སྡུག་བསྔལ་གྱི་དོན་རྐྱེན་རེ་རེ།

བརྗེད་མེད་ཀྱི་གཏམ་རྒྱུད་རེ་རེ་ཡིན།

དུངས་སེམས་ཀྱི་སྐུལ་ལྕག་རེ་རེ།

སང་ཉིན་གྱི་བློ་སྤོབས་རེ་རེ་ཡིན།

གང་ལྟར།

ཡོད་ཚད་ཀྱི་ཡོད་ཚད་རེ་རེ།

ཨ་ཕགས་ལགས་བདེ་བར་བཞུད་ཅིག།