གཡུ་ཆུང་དྲུག་དཀར་གྱི་དྲན་པ། །

སྤྲིན་པ་གཅིག་གཉིས་ཀྱི་གསེང་ནས། །

ཡང་ཡང་ཐོན་པ་རང་བྱས་ཏེ། །

སྙིང་ཉེ་འགྲམ་པ་རུ་ཐོན་སོང་། །

རྒྱང་རིང་ཟླ་བ་ཡི་འོད་མདངས། །

ལན་གཅིག་གསལ་བ་རང་གནང་དུས། །

ཆུང་འདྲིས་ཞལ་འཇམ་གྱི་འཛུམ་དམུལ། །

སྙིང་གའི་བར་སྲུབ་ན་འཛུལ་བྱུང་། །

ཆུང་འདྲིས་བྱམས་པ་དེ་མིན་ཡང་། །

བརྩེ་མཐུན་རོགས་ལོ་ཡི་སྣང་བརྙན། །

དྲན་པའི་སྣང་ངོགས་ལ་འཆར་བས། །

བརྗེད་པའི་རང་དབང་དེ་མི་འདུག །

ཕན་ཚུན་དུང་བ་ཡི་སེམས་པ། །

མི་གཅིག་བསམ་པ་དང་འདྲ་བས། །

དགའ་ཞེན་རྒྱ་མཚོ་ཡི་རླབས་རིས། །

སེམས་པའི་རང་རང་ལ་འཕྱུར་སོང་། །

ཐེངས་རེ་དྲན་པ་ཡི་སྣང་བ། །

རྒྱང་གི་ཟླ་བ་ལ་བཅོལ་ཏེ། །

དྲན་པའི་ཡིག་ཆུང་གི་འཕྲིན་པ། །

ཟླ་བའི་ཉེ་འགྲམ་ནས་བསྐུར་ཡོད། །

དྲན་པའི་སྣང་ངོགས་ཀྱི་མཛའ་མོ། །

སེམས་པའི་བར་སྲུབས་ལ་གནས་དུས། །

རྨི་ལམ་འཇའ་རིས་ཀྱི་ནང་ནས། །

ཐེངས་འགར་མཇལ་བ་དེ་གནང་བྱུང་། །

ཡིད་མཐུན་དགའ་མ་ཡི་ཞལ་རས། །

སྣང་བའི་འཆར་སྒོ་འདི་བརྡུངས་པས། །

བཟོད་མེད་དྲན་པ་ཡི་འཕྲིན་ཐུང་། །

བསིལ་རླུང་ངར་མ་ལ་བསྐུར་ཡོད། །

རྒྱང་རིང་གཡུ་ཆུང་གི་དྲུག་དཀར། །

དྲན་ངོགས་ཟླ་བ་ལ་རེག་དུས། །

སྙིང་གཏམ་ཡིག་ཆུང་ལ་བྲིས་ཏེ། །

སྤྲིན་ཕུང་དཀར་དཀར་དང་བསྡོངས་སོང་། །

ཡིད་འོང་འཛུམ་དཀར་དེ་དྲན་ཚེ། །

སྙིང་ཆུང་ཚིལ་ལུ་ཡང་འདར་ཡོང་། །

མཇལ་བའི་ལས་སྐལ་དེ་དབེན་པས། །

དྲན་གདུང་འགོག་ཐབས་རང་མི་འདུག །

དུང་སེམས་འོ་མ་ཡི་རང་མདངས། །

སེམས་དཀྱིལ་ལོང་ལོང་དུ་འཁྱིལ་ཏེ། །

ཕན་ཚུན་ཞེ་འཁྲེང་གི་ནང་ན། །

བསུབ་མེད་ལྷ་སྐུ་ལྟར་བཞེངས་ཡོད། །

འཛུམ་པའི་སོ་སྒོ་དེ་ཡངས་ལ། །

དམར་བའི་མཆུ་སྒྲོས་དེ་སྣུམ་པས། །

བདག་སེམས་རང་སྣང་གི་བརྩེ་བ། །

འགོག་མེད་ཁྱེད་རང་ལ་འཁོར་སོང་། །