འདི་ནས་འདོད་ཞེན་རླབས་ཀྱི་ཕར་ནང་ན། །

སྲིད་འབྱོར་ཞགས་པས་དམ་བཅིངས་མི་མངའ་ཞིང་། །

ཟག་མེད་ཆོས་དབྱིངས་ནམ་མཁའ་ཡངས་པོ་རུ། །

བཞུགས་པའི་མཚོ་བྱུང་མགྲིན་པའི་རྩལ་ཕེབས་ཤིག །

ན་རྒ་རྒུད་པའི་རླུང་ཆེན་རྒོད་པོ་རུ། །

མི་ཚེ་དར་ལྕོག་ཡལ་འདབ་རླུང་གིས་ཟད། །

མི་རིང་ཁྱོད་ཞལ་འཛུམ་དཀར་ཟླ་བའི་མདངས། །

མངོན་གྱུར་མཐོང་བའི་བགོ་སྐལ་སྐྱེན་ན་བསམ། །

ཐུགས་རྗེ་ཆུ་འཛིན་གཡོ་བའི་ཉམས་ལྡན་མས། །

ཏིང་འཛིན་གངྒཱའི་ཆབ་བསིལ་གཙང་མ་ཡིས། །

རིངས་སྟབས་སྲིད་པའི་མྱ་ངམ་ཐང་ཆེན་དུ། །

འགྲོ་རྣམས་མཉེས་པའི་ཡོན་ཆབ་ད་ཕུལ་ཅིག །

གྲགས་སྐམ་འབྲས་པའི་ཆེར་རློམ་འགོག་པའི་ཆེད། །

བས་མཐའི་རི་སུལ་གཡང་རོང་བསྟི་བྱས་ཀྱང་། །

གཉིས་འཛིན་རྟོག་པའི་རླབས་ཕྲེང་མི་ཡལ་བས། །

ད་ནས་དབྱངས་ཅན་སྲི་ཞུ་ལེགས་པར་འཚལ། །

ཡིད་ཀྱི་རྟ་ཕོ་དུག་གསུམ་དབང་བསྒྱུར་ནས། །

ཟག་མེད་བདེ་དགའི་བརྒྱགས་ཆད་བྱུང་བས་ན། །

འཁོར་བའི་འདོད་རྔམས་བཙན་བླུད་བྱེད་པ་དག །

རིང་སར་བསྐྲད་པའི་ཚན་ཁ་ད་ཅིག་གནོངས། །