ང་ནི་རྒྱང་རིང་ཕྱོགས་ཀྱི།།

ཆེམ་ཆེམ་བཀྲ་བའི་སྐར་མ།།

མི་ཚོས་ང་ཡི་མིང་ལ།།

བྱང་སྐར་སྤུན་བདུན་ཟེར་གྱི།།

ང་ནི་མཐོ་སྒང་བོད་པའི།།

དབུ་ཡི་མགུལ་རྒྱན་ཡིན་སོང་།།

ཁྱེད་རང་གང་སོང་ས་ལ།།

མགུལ་རྒྱན་བཞེས་རོགས་གནང་དང་།།

ང་ནི་རྩྭ་ཐང་ཡངས་པོའི།།

ཕྲ་རྒྱན་མེ་ཏོག་ཚོམ་བུ།།

ང་ལ་ཡོད་པའི་དྲི་ངད།།

ལྷ་ཡི་གཞུང་ནས་ལྡང་འོང་།།

ང་ནི་གཙང་ཆབ་སྔོན་མོའི།།

མཁའ་ལ་འཕྱུར་བའི་ཟིལ་པ།།

འཇམ་མཉེན་བསིལ་རླུང་ཡང་མོ།།

ང་ཡི་སྐྲ་ལོ་རླུང་སྐྱོད།།

ང་ནི་སྔུན་གྱི་ཚེ་ན།།

མེས་པོས་བཏགས་པའི་སྐར་མ།།

འཛམ་གླིང་སུམ་ཉིའི་ལྟེ་བ།།

བྱ་ར་བྱ་རུ་བཏང་བྱུང་།།

ང་ནི་གྲོགས་དང་སྤུན་ཟླས།།

མཁའ་རུ་བསླངས་པའི་དམ་ཚིག།

ས་ཐག་རྒྱང་པའི་དུས་སུ།།

གྲོགས་པོའི་ལ་རྒྱ་མི་བརྗེད།།

ང་ནི་ཨ་མ་སྐྲ་དཀར།།

ཕྱག་གཡོན་ནང་གི་ཕྲེང་བ།།

སྐྱེ་འཆི་མ་འཇིགས་བར་དུ།།

བུ་ཕྲུག་བཏབ་པའི་སྨོན་ལམ།།

ང་ནི་ཨ་ཕ་རྒད་པོའི།།

ཁ་ཕྱོགས་སྟོན་པའི་སྒྲོན་མེ།།

བུ་ཕྲུག་བཟའ་ཟླའི་སླད་དུ།།

ནང་དུ་ལོག་པའི་ལམ་བུ།།