ཀ།

རྩྭ་སེར་པོ་དག

ཐང་སེར་པོ་རུ་ཁད་ཀྱིས་འཕྱོ་བ་ན།

ངའི་སེམས་སུ་སྟོན་ཁ་འཆར་འོང་།

སྟོན་ནམ་རིང་མོ་ཞིག་ཀྱང་དྲན་འོང་།

ཁ།

དབྱར་ཁ་དང་དགུན་ཁའི་ངོས།

འོད་ཟེར་དང་མུན་པའི་བར།

བདེ་སྐྱིད་དང་སྡུག་བསྔལ་གྱི་ནང་ན།

སེར་ལང་ལོང་དང་སྐྱ་འུར་འུར་འཕྱོ་བ།

སྟོན་ཁ་ཨེ་ཡིན་ལ་ཐེ་ཚོམ་མེད།

ག།

རི་ཐང་སེར་པོ་དག།

རྨི་ལམ་གྱི་ཞིང་ཁམས་སུ་འཁྲུལ།

རྨི་ལམ་གྱི་ཞིང་ཁམས་ལས།

མངོན་སུམ་གྱི་སྣང་བ་ཤེས་རྗེས།

གང་ཞིག་མངོན་སུམ་མ་ཡིན་པ་འདྲ།

ང་།

རྩྭ་གསེབ་ཏུ་གོམ་ཁ་ལྷོད་པ་ན།

“ཁྲོམ་ཁྲོམ”གྱི་སྒྲ་བར་མེད་དུ་ཚོར།

ཅ།

སྟོན་སྤྲིན།

སྟོན་ཟླ།

སྟོན་རླུང་།

ཚོར་ཐུབ་ཅིང་།

མྱོང་ཐུབ་པའི་དུས་ཚིགས།

ཆ།

རུ་སྟོན་སར་བབས་བྱུང་།

བྱིས་དུས་ཀྱི་སྣང་བ་གང་མང་ཞིག།

རས་ཡོལ་ངོས་ཀྱི་གློག་བརྙན་བཞིན།

འཆར་འོང་གིན་པ་འདི་དག་ཕྱིར་དྲན་ཡིན་ནམ།

ཇ།

ཚོར་བས་ཟིན་ཐུབ་པའི་དུས་ཤིག་ཡོད་ན།

དེ་ཡང་སྟོན་ཁ་ཡིན་པར་བསམ།

ཉ།

ངག་རྒྱུན་གང་མང་མང་ཞིག།

སྟོན་གྱི་ན་ཚོད་དང་ལང་ཚོ་ལ་བྲིས་ཤིང་།

ཕྱིར་དྲན་གྱི་གཏེར་དུ་སྦས།

ཏ།

སྟོན་ཁའི་ལོ་མ་སེར་པོ་དག།

ཇ་ལོ་རྙིད་པོ་རེ་དང་འདྲ་བར།

སྙན་ངག་ཅེས་པའི་ཕོར་བ་རུ་སྦངས།

ཐ།

ཇ་ལོ་སེར་པོ་དག།

སྟོན་གྱི་ལོ་མ་རེ་ལ་སྤྲུལ་རྗེས།

གདོང་དང་ལུས་ལ་རེག་གིན་ས་རུ་འཐོར།

ད།

ཇ་ལོ་དང་སྟོན་ཁ་མཉམ་དུ་གནས།

ཇ་ལོ་ཡིས་སྟོན་ཁ་བཤད་ཅིང་།

སྟོན་ཁས་ཇ་ལོ་གླེང་བའི་དུས་སུ།

མི་རྟག་པའི་མཐའ་ལ་རླུང་རྒྱུ་བཞིན་འདུག།

ན།

ལོ་རྒྱུས་ཤིག་གིས་སྟོན་ཁ་དྲན་གྱིན་འདུག།

མཚར་སྡུག་གིས་ཕྱུག་པའི་སྟོན་ཁ་ཞིག།

ཡང་ན་འདས་སོང་གི་རྨི་ལམ་གཞན་ཞིག།

པ།

ང་རང་སྟོན་ཁར་དགའ་བ་འདྲ།

སྟོན་ཁ་གླེང་བ་དང་ཕ་ཡུལ་དྲན་འོང་།

ཕ་ཡུལ་གྱི་སྟོན་ཁ་དྲན་འོང་།

ཐང་ཤིང་སེར་པོ་དང་།

ལོ་མ་དམར་པོ་དག་དྲན།

ཕ།

ཕ་ཡུལ་གྱི་སྟོན་ཁ་གླེང་བའི་འཕྲོར།

གོས་ཀྱིས་ཕྱུག་པའི་ཤོམ་པ་རེ་འགའ་དྲན་བྱུང་།

བ།

ཕ་ཡུལ་གྱི་སྟོན་ཁ་བྲིས་པའི་ཚེ།

འོད་ཀྱིས་གང་བའི་གླིང་ག་མང་པོ་ཞིག།

མིག་ལམ་ལ་འོད་ཆེམ་ཆེམ་དུ་ཤར་འོང་།

མ།

ཕ་ཡུལ་གྱི་སྟོན་ཁ་གསལ་བའི་དུས།

རྨི་ལམ་གང་ཞིག་འཕྲོ་དང་འཕྲོ་རུ་བཀྲ་འོང་།

ཙ།

སྨུག་པའི་རྒྱ་མཚོ་བརྒལ་རྗེས།

སྦལ་ཡུལ་གཞན་ཞིག་མངོན་བྱུང་།

དུས་ཚོད་ཀྱི་བར་སྟོང་དང་།

འཚོ་བ་ཡི་གནས་བབ་ཡོད་ཚད།

གཞི་ནས་དྭངས་སོང་བ་འདྲ།

ཚ།

སྤྲིན་དཀར་གྱི་ལྭ་བ་གྱོན་ཞིང་།

ཨ་སྔོན་གྱི་མེ་ཏོག་དབུ་ལ་བཏགས་ཏེ།

གང་ཞིག་ལ་འགྲོ་འདང་ཡིན།

ཡིད་འོང་སེམས་ལ་བབས་པའི་སྟོན་ཁ།

ཛ།

གྲང་རླུང་ཞིག་དལ་གྱིས་རྒྱུ་བྱུང་།

སྨུག་པ་སྲབ་མོ་དག་རླུང་གིས་བསྐྱོད།

ཆར་ནག་དང་མཉམ་དུ་རླུང་རྒྱུ་བྱུང་།

རྒས་ཤིང་འཁོགས་པའི་གླུ་སྐད་ཅིག།

སྤྲིན་དཀར་གྱི་ཞྭ་མོ་མནབས་ཤིང་།

གང་ཞིག་ནས་གཉིད་འོང་བའི།

སྟ་གོན་བྱས་འདུག་པ་ཚོར།

ཝ།

རི་རྩེའི་སྨུག་པ་དག

ཀི་འདེབས་ཐེངས་ཤིག་གིས།

དགུན་གཞུང་ལ་ཆས་སོང་བ་འདྲ།

ཆར་ཞོད་དེའི་རྗེས་ལ་སྨུག་པ་དྭངས་སོང་།

ཞ།

ནས་འབྲུ་རེ་རེ་ས་ལ་ལྷུང་གིན་འདུག།

ཞིང་པ་དག་གིས་ཚོར་གྱིན་མེད་ཚོད་རེད།

ཟ།

སྟོན་རླུང་ཁམ་པ་རྒྱུ་བྱུང་།

ནས་འབྲུ་རེ་རེ་ས་ལ་ལྷུང་གིན་འདུག།

ཞིང་པ་དག་གིས་སེམས་ནས་ཚོར་གྱིན་མེད་ལ་འདྲ།

འ།

སྟོན་གྱི་ཁ་བའི་འདབ་མ་རེ་རེ་འཕུར་བྱུང་།

ནས་འབྲུ་རེ་རེ་ས་ལ་ལྷུང་གིན་འདུག།

ཞིང་པ་དག་གིས་དངོས་གནས་ཚོར་གྱིན་མེད་པ་འདྲ།

ཡ།

སྟོན་གྱི་ཡོད་ཚད་སླེབས་ཟིན་པ་འདྲ་བྱུང་།

འབྲི་མོ་རེ་རེས་ངུར་སྒྲ་གཏོང་གིན་འདུག།

ནས་འབྲུ་རེ་རེ་ས་ལ་ལྷུང་གིན་འདུག།

འབྲོག་པ་དང་ཞིང་པས་ད་དུང་ད་དུང་།

གང་ཡང་ཚོར་གྱིན་མེད་པ་འདྲ།

ར།

ད་ལྟ་ས་གཞི་ཆེན་པོ་འདིའི་མངལ་དུ།

སྟོན་ཁ་ཞེས་པའི་སྙིང་ཉེ་ཞིང་།

བརྗེད་དཀའ་བའི་ལུས་རྟེན་ཞིག་འཁོར་འདུག།

ལ།

ཉིན་མཚན་གྲངས་མེད་ཀྱི་སེམས་ཁུར།

དྲན་པ་ཙམ་གྱིས་ཡོང་བ་ཞིག་མ་རེད་ལ།

མདའ་ཐོགས་ཤིང་གཞུ་ཁུར་མཁན་ཞིག་ཀྱང་མ་རེད།

རྣམ་ཤེས་ཀྱི་གཏིང་ལ་སྐྱིད་སྡུག་སློང་བའི།

སྤྲང་པོ་ན་ཟུག་ཅན་དེའི་མིང་ལ་སྟོན་ཁ་འབོད།

ཤ།

མིག་ཆུ་རྡོག་གཅིག་ས་གཞིའི་བྲང་ཁ་ནས་བརྡོལ།

ཤུགས་ཀྱིས་བཏེགས་པའི་རྫ་འགོའི་སྨུག་པ།

མགྲིན་པའི་སྦུ་གུ་ལས་དཀྲོལ་བྱུང་།

སྙན་ངག་ཅེས་པས་དཀྲོལ་བ་ཨེ་ཡིན་ལ་ཐེ་ཚོམ་འཕྱོ།

ས།

སྒྲ་སྙན་གྱི་རྒྱུད་སྐུད་སྟེང་ལ་ཕེབས་པའི་

རྣམ་ཤེས་གྲངས་མེད་ཅིག།

ཏི་སེའི་དབུ་རྩེ་རུ་ཁད་ཀྱིས་འཕྱོ་པའི་

ལྷོ་སྤྲིན་སྨུག་པོ་ཨེ་ཡིན་ནམ།

ཡང་ན་སྒེའུ་ཁུང་ཕྱི་རོལ་གྱི་འཇིག་རྟེན་

དང་འཇིག་རྟེན་ལ་རེ་བའི།

ཤི་གསོན་མ་ངེས་པའི་གངས་རིའི་ནང་

རོལ་གྱི་ཆོམ་སྒྲ་དང་ཁ་སྤུ།

ཐང་དཀར་རྒོད་ཀྱི་གཤོག་པ་ལ་

སྨོན་པའི་འདས་ཟིན་ཀྱི་རྣམ་ཤེས།

བཤད་ཚོད་མ་ངེས་པའི་འཇིག་རྟེན་ཆེན་

པོ་ཞེས་པའི་ནམ་མཁར།

དབྱར་མཇུག་གི་དྲན་པ་རླུང་ལ་སྤུར་

བའི་སྟོན་གྱི་བུ་ཡུག་འཚུབ།

“ཁྲོམ་ཁྲོམ”ཞེས་པའི་སྒྲ་དང་མཉམ་

དུ་སྒྲུང་གཏམ་བྲིས་བྱུང་།

ཧ།

གོམ་མཚམས་བཞག་རྗེས།

སྟོན་ཁ་སླེབས་འདུག།

ཨ།

སེམས་ཀྱི་དྲོད་ཁོལ་མཐའ་དག།

སྒེའུ་ཁུང་བརྒྱུད་དེ།

གངས་རི་ལ་དཀྱུས་སྐོར་ཞིག་བྱས།

ཐེངས་གཅིག་བལྟས་པ་ན།

ཚོར་བའི་ཁམས་སུ་སྟོན་ཁ་ཚེས་འདུག།

ཨི།

ཁྲོམ་ཁྲོམ།

སྟོན་ཁ་དང་སྟོན་ཁའི་མི།

ཁྲོམ་ཁྲོམ། ཁྲོམ་ཁྲོམ།

སྟོན་ཁ་དང་སྟོན་ཁའི་སྤུན་ཟླ།

ཁྲོམ་ཁྲོམ། ཁྲོམ་ཁྲོམ།

ཨུ།

ཁྲོམ་ཁྲོམ། ཁྲོམ་ཁྲོམ།

སྟོན་ཁ་དང་སྟོན་ཁའི་སྤྲིན།

ཁྲོམ་ཁྲོམ། ཁྲོམ་ཁྲོམ།

སྟོན་ཁ་དང་སྟོན་ཁའི་ཁ་བ།

ཁྲོམ་ཁྲོམ། ཁྲོམ་ཁྲོམ།

ཨེ།

ཁྲོམ་ཁྲོམ། ཁྲོམ་ཁྲོམ།

སྟོན་ཁ་དང་སྟོན་ཁའི་ཟླ་བ།

ཁྲོམ་ཁྲོམ། ཁྲོམ་ཁྲོམ།

སྟོན་ཁ་དང་སྟོན་ཁའི་རླུང་བུ།

ཁྲོམ་ཁྲོམ། ཁྲོམ་ཁྲོམ།

ཨོ།

ཁྲོམ་ཁྲོམ། ཁྲོམ་ཁྲོམ།

སྟོན་ཁ་དང་སྟོན་ཁའི་རྣམ་ཤེས།

ཁྲོམ་ཁྲོམ། ཁྲོམ་ཁྲོམ།

སྟོན་ཁ་དང་སྟོན་ཁའི་སེམས་ཚོར།

ཁྲོམ་ཁྲོམ། ཁྲོམ་ཁྲོམ།

རྩོམ་པ་པོ། ཧུན • དུར་རོ།

རྩོམ་སྒྲིག་པ། མགར་རྒྱལ་སྲས།