ཀྲུང་གོའི་ཕྱི་འབྲེལ་པུའི་མགྲིན་ཚབ་པ་ལིན་ཅན་གྱིས་ཚེས་22ཉིན་རྒྱུན་ལྡན་གྱི་གསར་འགོད་པའི་ཚོགས་འདུ་གཙོ་སྐྱོང་གནང་བ་རེད། གསར་འགོད་པ་ཞིག་གིས་ཀྲུང་གོ་དང་རྒྱ་གར་གྱི་ས་མཚམས་ཀྱི་འབྲེལ་ཡོད་གནད་དོན་ཐད་དྲི་བ་བཏོན་པ་རེད། ལིན་ཅན་གྱིས། ཉེ་བའི་དུས་སྐབས་ཤིག་རིང་། ཀྲུང་གོ་དང་རྒྱ་གར་ཕྱོགས་གཉིས་པོས་ཕྱི་འབྲེལ་དང་དམག་དོན་གྱི་ཐབས་ལམ་བརྒྱུད། ཀྲུང་གོ་དང་རྒྱ་གར་ས་མཚམས་ཀྱི་འབྲེལ་ཡོད་གནད་དོན་ཐད་འབྲེལ་གཏུག་དམ་ཟབ་བྱ་རྒྱུ་རྒྱུན་འཁྱོངས་བྱས་པ་དང་། མིག་སྔར་ཕྱོགས་གཉིས་པོས་འབྲེལ་ཡོད་གནད་དོན་ཐད་ཐག་གཅོད་ཇུས་གཞི་བཟོས་ཟིན་པས་ཀྲུང་གོ་ཕྱོགས་ཀྱིས་དེར་གདེང་འཇོག་ཡག་པོ་བྱེད་བཞིན་ཡོད། གོམ་སྟབས་རྗེས་མར། ཀྲུང་གོ་ཕྱོགས་ཀྱིས་རྒྱ་གར་ཕྱོགས་དང་གོང་གསལ་གྱི་ཐག་གཅོད་ཇུས་གཞི་དོན་འཁྱོལ་ཡག་པོ་བྱ་རྒྱུ་ཡིན་ཞེས་བཤད།