བརྩེ་སེམས་སྤྲིན་དཀར་བཞུར་བའི་ནམ་མཁའི་དབྱིངས་སུ། །

དུང་བ་ངང་མོ་ཁྱེད་ཀྱིས་ལྡིང་སྐོར་རྒྱག་དུས། །

དབྱངས་ཅན་གློག་གི་འོད་ཆགས་འཚུབ་འཚུབ་བྱེད་ཀྱིན། །

ཐ་སྙད་ཚིག་གི་སྦྲང་ཆར་བདུད་རྩིས་རློན་ཤོག །

འཇིག་རྟེན་ཚིག་གིས་མཚོན་པའི་གཟུགས་རིས་ངོས་སུ། །

ལོ་ཟླའི་དཀྱོག་མཚམས་རིང་མོ་ཕྱག་ལ་བླངས་ཏེ། །

འཆར་ཡན་རྟོག་བཏགས་སྒྱུ་མའི་པིར་རྩེ་ཞིག་ལས། །

དགའ་སྐྱོ་ཚོར་བའི་རི་མོ་ཞིབ་ཀྱིས་འབྲི་ཡོང་། །

སྟོད་ན་གངས་རི་དཀར་པོའི་དབུ་རྩེ་མཐོ་བ། །

སྨད་ན་རྫ་རི་སྨུག་པོའི་ཁོར་ཡུག་སྐྱིད་པ། །

བར་ན་འཆད་རྩོད་སྙན་པས་རི་ལུང་གང་ས། །

སྔ་འགྱུར་བསྟན་པའི་འབྱུང་གནས་ཆོས་ཀྱི་སྡེ་རུ། །

ལུས་ལ་རས་གཟན་དམར་པོ་རླུང་གིས་རྡེག་ཡོད། །

ངག་ནས་ཆོས་ཕུང་བརྒྱད་ཁྲིའི་ཐ་སྙད་ཀློག་ཁུལ། །

སེམས་པ་རྣམ་རྟོག་རྒོད་པོ་རི་ལུང་ཤོར་ནས། །

ཕྱི་ཚུགས་ནང་སེམས་འཐོར་བའི་བན་ཆུང་དཀྱུས་མ། །

སྔོན་སྦྱོང་ཚོགས་གཉིས་ལེགས་པས་འཁོར་བ་འདི་ནས། །

ལུས་རྟེན་ཆོས་ཀྱི་སྡེ་རུ་ཁེན་ས་རྙེད་ཀྱང་། །

སེམས་ཀྱི་བརྩེ་མདུད་གྲོལ་ནས་ཚོར་བ་སིམ་པས། །

རྣམ་རྟོག་སྦྲང་མ་ངེད་གཉིས་རི་ལུང་འཁོར་སོང་། །

ལོ་ཟླའི་མཚམས་སྤྲིན་དུམ་བུ་རླུང་གིས་བདས་པས། །

ན་གཞོན་དུས་ཀྱི་སྣང་བ་རི་ལས་མཐོ་ཚེ། །

ཡིད་ཀྱི་དྲན་པ་མ་འདུག་དགའ་བས་ཚོར་ནས། །

སྤྲོ་འཛུམ་དགྱེས་པའི་ཐུ་འོག་སྐྱིད་ཉལ་བརྒྱབ་ཡོད། །

སེམས་པ་སྐྱིད་པོ་བྱས་ནས་གུ་ཡངས་ལྷོད་ཚེ། །

མིག་ཟུང་བུང་བ་མི་འདུག་རི་ལུང་ཤོར་ནས། །

ཨ་ཅེ་བྱམས་པའི་མེ་ཏོག་ཐུགས་དང་བསྟུན་ཏེ། །

ཚོར་བ་དགའ་སྐྱོ་གཉིས་ཀྱིས་བསུ་མ་བྱས་ཡོད། །

དབྱངས་གསལ་ཚིག་གིས་སྤུངས་པའི་དུར་ཁྲོད་ཅིག་ཏུ། །

གསང་བ་སེམས་ཀྱི་དབྱར་ཁ་རོ་བཞིན་སྦས་ཀྱང་། །

རྣམ་ཤེས་བར་དོ་འཁྱམ་པོ་རི་ལ་སོང་ནས། །

སེམས་སོང་ཡིད་ཀྱི་སྒྲོམ་ཁ་བུ་མོས་བཀང་ཐལ། །

ལྡབ་ལྡིབ་ཚིག་གི་སྤྲོས་པ་མང་བ་ལབ་ཀྱིན། །

དགའ་སྐྱོ་ཚོར་བའི་མགུར་གླུ་དབྱངས་སུ་གྱེར་ནས། །

རི་ཆུ་མཚམས་མེད་མང་བའི་ཕ་རོལ་ཞིག་ཏུ། །

དཀའ་སྡུག་ཟེགས་མ་རེ་རེའི་ཚོར་བ་བཞད་ཡོད། །

ཕར་བལྟས་རི་ཆུ་ས་གསུམ་ཡིད་དུ་འོང་བ། །

མྱོང་བཞིན་ཟང་ཟིང་སྒྱུ་མ་མི་རྟག་དྲན་གྱིན། །

ངེས་འབྱུང་སྤུ་སུད་ཅིག་གིས་རང་སེམས་བསྐྱོན་ཏེ། །

མིག་གི་ཆར་ཆུ་ཞིག་ཀྱང་ལྷུངས་མྱོང་ཡོད་ཨ། །