གནས་རི་ལུང་གི་སྐྱེད་མོས་ཚལ་དུ། །

རྩི་མེ་ཏོག་གི་མགོ་ལྕོག་ལྡེམ་དུས། །

ངའི་དྲན་ཤིང་གི་གསེབ་ཏུ་བཞད་པའི། །

གྲོགས་དགའ་མ་ཡང་སེམས་ཀྱིས་དྲན་ཡོད། །

གནམ་སྔོན་པོ་ཡི་ལྡིང་ཁང་དབུས་སུ། །

སྤྲིན་དཀར་པོ་ཡི་བང་རིམ་རྩིག་དུས། །

ངའི་སྙན་ངག་གི་ཚིག་རྐང་རེ་རེར། །

ཁྱོད་ཅེས་པ་དེའི་བརྗོད་བྱ་བྲིས་ཡོད། །

ནགས་ཚང་ཚིང་གི་གཡུ་ལོའི་སྟེང་དུ། །

ཤིང་ཙན་དན་གྱི་དྲི་བསུང་འཐུལ་དུས། །

ཡུལ་རྒྱང་རིང་དུ་བཞུད་པའི་གྲོགས་ཀྱི། །

ལུས་རྒྱབ་གཟུགས་དེ་ཝ་ལེར་གསལ་ཡོད། །

མདོག་དམར་སེར་གྱི་འཇའ་གུར་དབུས་སུ། །

རྒོད་ཐང་དཀར་ཀྱང་འཕུར་རྩལ་ངོམ་དུས། །

ངའི་བསམ་གཞིག་གི་དྲན་པ་དབུས་ནས། །

སེམས་དམར་པོ་ཡང་འཕར་རྩ་ལྡིང་བྱུང་། །

གཞོན་མུ་ཏིག་གི་རྩེད་རའི་ནང་དུ། །

མིག་ཁྲ་ཆུང་གིས་ཟུར་མདའ་འཕེན་དུས། །

ངའི་ལས་དབང་གི་དར་སྐུད་སྣེ་རུ། །

ཆོས་མ་ཎི་ཡི་གཟུངས་སྔགས་བྲིས་ཡོད། །

སྟོད་གངས་དཀར་གྱི་གངས་རིའི་རྩེ་རུ། །

སེང་གཡུ་རལ་གྱིས་ངར་སྒྲ་གྲགས་དུས། །

ངའི་སེམས་མདུན་དེ་ངག་ལ་དྲངས་ཏེ། །

ཁྱེད་དྲན་པ་ཡི་གདུང་དབྱངས་འགུགས་ཡོད། །

ཞལ་འཛུམ་ཆུང་གི་མིག་ཟུང་ཅེར་ཞིང་། །

གཞོན་དར་མ་ཚོས་འཇོ་སྒེག་མངོན་དུས། །

ངའི་མིག་ཟུང་གི་མཆི་མ་རེ་རེ། །

སྤྲིན་དཀར་པོ་དང་རླུང་ལ་བསྐུར་ཡོད། །

ཚིག་ཐ་སྙད་ཀྱི་ཕོ་བྲང་བཞེངས་ཤིང་། །

དོན་ཟབ་ཆོས་ཀྱིས་རྨི་ལམ་དཀྲོགས་དུས། །

ངས་གཉུག་གཤིས་ཀྱི་བདེན་གྲུབ་ཀློང་དུ། །

གཏམ་སྙན་ཚིག་གི་རིན་ཐུང་འཚོལ་ཡོད། །