ལྷོ་སྤྲིན་ཁུག་པ་བཅོ་བརྒྱད་ཕར་ངོགས་ན། །

མཐིང་སྔོན་དབྱིངས་ཆེན་དགུང་གི་འགྲམ་ངོགས་ན། །

མཉེན་ལྕུག་གར་གྱིས་གཡོ་བའི་ཉམས་ལྡན་མ། །

མཛེས་སྡུག་འབུམ་གྱིས་སྤུད་པའི་མཚོ་བྱུང་མ། །

ཞལ་ཁྱིམ་ཉ་གང་ཟླ་བ་སུ་ཡིས་འགྲན། །

ཚེམས་དཀར་འོད་ཆགས་ཕུང་པོ་སྙིང་དུ་སྡུག །

ལྗགས་འཁྲུངས་སྙན་པའི་མེ་ཏོག་རབ་ཏུ་མཛེས། །

ཆགས་ལྡན་ར་ཡིག་གཉིས་པས་གཡས་གཡོན་བསྐོར། །

རབ་ཕྲ་མཛེས་མའི་སྐུ་ལ་ལང་ཚོས་བརྗིད།

རབ་འཇམ་གསུང་གི་ཚིག་དྲུག་སྙན་པས་ཁྱབ། །

རབ་ཡངས་མཁྱེན་པའི་ཐུགས་རྒྱུད་ཟླ་གཞོན་དཀར། །

རབ་མངའ་དཔལ་གྱིས་ཕྱུག་པས་རྨད་དུ་བྱུང་། །

ལུས་ཀྱི་སྟངས་སྟབས་མཛེས་པ་རྨ་བྱའི་གུར། །

ལྷ་མིའི་འགྲོ་བ་ཀུན་གྱི་ཡིད་འཕྲོག་མ། །

ཆགས་ཞེན་བན་བུན་ངོམ་པའི་སྒྱུ་རྩལ་གྱིས། །

མིག་ཟུང་རང་དབང་མ་བྱུང་ཡུད་ཀྱིས་འཕྲོག །

མཁས་གྲུབ་རྒྱལ་བ་ཡོངས་ཀྱི་བསྟི་གནས་ལ། །

འཆད་རྩོད་རྩོམ་པའི་གློག་ཞགས་མྱུར་བའི་ཚེ། །

མཚུངས་མེད་ཤེས་རབ་འབྲུག་གི་སྙན་པ་བཀྲོལ། །

རྒྱལ་དང་འགྲོ་བ་ཀུན་གྱི་ཡུམ་ཆེན་མོ། །

སྤྱན་ཟུང་བརྩེ་ཆེན་སྤྲིན་དཀར་གཡོ་བ་ལས། །

དུང་སེམས་གློག་གི་འོད་མདངས་བརྗིད་པ་འཁྱུག །

ཤེས་རབ་སྦྲང་ཆར་སིལ་སིལ་གཏོར་བ་ཡིས། །

སྲིད་གསུམ་ལྗང་སྨྱུག་མེ་ཏོག་འདབ་མ་གྲོལ། །

ངག་རིགས་ཚིག་གི་དབང་བྱེད་དབྱངས་ཅན་མ། །

གྲེ་འགྱུར་ཚིག་གི་རྒྱུ་བ་འགག་པའི་བདག །

སྣང་བ་དགུ་འགྱུར་སྒྱུ་འཕྲུལ་གཡོ་བའི་ཀློང་། །

སྙན་མགུར་དབྱངས་ཀྱི་འཕྲིན་ལས་སྩོལ་བར་མཛོད། །

རྩ་གསུམ་དགོངས་བཞེད་ཡོངས་འདུས་རྒྱལ་ཡུམ་མ། །

ཤེས་རབ་ཉི་ཟླའི་འོད་སྣང་གསལ་བ་ཡིས། །

ལས་ཉོན་མུན་པའི་སྡེ་དཔུང་བཅོམ་མཛད་ཀྱི །

སྣང་བྱེད་ཚངས་སྲས་ཁྱོད་ཉིད་དད་བརྒྱས་རོལ། །

ཡིད་གར་ལེགས་བཤད་གསུང་གསང་འོ་མའི་མཚོ། །

རོལ་འདོད་སྐལ་བཟང་བྱ་ཁྱུའི་བདེ་དགའི་དཔལ། །

བརྩེ་ཆེན་སྤྱན་རས་ཡངས་པས་ལེགས་གཟིགས་ནས། །

ངག་གི་དངོས་གྲུབ་འབུམ་ཕྲག་སྩོལ་བར་མཛོད། །

ཚོགས་དྲུག་ཡུལ་དུ་གཡེང་བའི་ཚོར་འདུ་ལ། །

སྡེབ་ལེགས་ཚིག་གི་དཔལ་ཡོན་རབ་རྫོགས་ཤིང་། །

དགའ་སྐྱོ་འདྲེས་མ་བཞེངས་པའི་རིག་བྱེད་ངག །

སྙན་པའི་བ་དན་གཡོ་ལ་གྲོགས་ཤིག་ཀྱེ། །

སྣང་བ་རྒྱ་ཡན་འཁྲུག་པའི་ཡིད་ཀྱི་སྒྲོམ། །

དགའ་སྐྱོ་ཚོར་བའི་གཟུགས་རིས་ངག་གི་ཉམས། །

སོར་མོ་རྡེག་པའི་བར་ནས་གཡོ་བའི་ཚེ། །

ངག་དབང་ལྷ་མོ་ཁྱེད་ཀྱིས་གཟིགས་སྐྱོངས་མཛོད། །

ངེས་དོན་ངག་གི་དཔལ་མོ་དབྱངས་ཅན་མའི། །

རིག་བྱེད་སྙན་པའི་མཆོད་ཕྲེང་བསྟར་བ་ལས། །

འདོད་ཡོན་ཡུལ་ལ་གཡེང་བའི་བན་ཆུང་བདག །

ཚིག་གི་སྤྲོས་པ་རྒྱ་ཆེའི་དབང་རབ་སྐུར། །

སྲིད་ཞིའི་ངག་རིགས་ཀུན་གྱི་སྙན་པའི་གདངས། །

དབྱངས་གསལ་ཚིག་གི་འདུ་བ་དཔྱིད་ཀྱི་དཔལ། །

ཐོས་འཛིན་བུ་ག་གསོ་བའི་ཁུ་བྱུག་མགྲིན། །

ཐུགས་རྗེས་དངོས་གྲུབ་སྦྲང་ཆར་སྩོལ་བར་མཛོད། །