ང་རང་སྐྱེས་པ་ནས་བཟུང་ད་ལྟའི་བར།། 

 མི་ལོ་མང་ཙམ་བྱ་བ་ཏག་ཏག་ཤོར།། 

 དཔེར་ན་ཞོགས་པའི་སྐྱ་རེངས་ལ་འགོར་ཟད།། 

 ཆར་ཞོད་ལྗང་སེར་སྤང་དང་འདྲེས་པས་འཐིམས།། 

 འདོ་བ་རྟ་ཕོའི་སྣ་གླུ་དྲངས་ཤིང་ཡོང་།། 

 ཁྱི་གུ་ཐག་མི་རིང་སར་ཁྲིད་པས་བོར།། 

 ཁ་བ་ཉིན་འབབ་མཚན་འབབ་ས་རུ་ཆགས།། 

 ཁང་སྟོང་ནང་དུ་ཉིན་གང་གཉིད་པས་ཡོལ།། 

 དེ་ལྟར་དུས་ཚོད་མང་པོ་ཆུད་ཟོས་མཐར།། 

 ང་རང་ལོ་ན་མཐོན་པོར་ལོན་འདུག་སྙམ།།

དེ་ལྟར་བསམ་གཞིག་བྱས་མཐར་དབུགས་རིང་བཏང་།། 

 ལས་དང་བྱ་བ་མང་པོས་དཀའ་ཡང་བྱུང་།། 

 ནམ་འཆི་ངེས་པ་མེད་ཀྱང་ད་དུང་འབད།། 

 སྐྱིད་ཚོད་ཐེག་པར་མི་བྱ་ཕུགས་བསམ་དྲན།། 

 དེ་ལྟར་གསོན་པའི་སྙིང་པོ་བྱེའུ་ཆུང་རང་།། 

 སྟོང་པའི་ནམ་མཁའི་དབྱིངས་སུ་ཡུན་རིང་འཕུར།། 

 སྡོང་པོའི་ལོ་མ་འཐོར་བའི་ཡལ་གའི་སྟེང་།། 

 དབུགས་ངལ་ཧལ་ཧལ་བྱས་ནས་འབབ་དགོས་བྱུང་།། 

 དེ་ལྟར་ཚེ་འདིའི་བྱ་བ་དོན་མེད་རྫོགས།། 

 སྙིང་པོ་དམ་ཆོས་དགའ་བ་རེས་ཙམ་བྱེད།། 

 དེ་ལྟར་ལང་ཚོའི་ཉི་མ་ལ་འགོར་སོང་།། 

 རྒས་པའི་སྡུག་བསྔལ་རྩོད་ཀྱང་དེ་འདྲ་རེད།། 

 སྐྱིད་པའི་ཁྱིམ་གཞི་དྲན་ན་ཕ་མ་ལགས།། 

 བྲལ་ཡོང་བསམ་པ་འཆར་བའི་བློ་ཁོག་མེད།། 

 དེ་ལྟར་འཇིག་རྟེན་མཛེས་པས་ཁྱབ་པའི་དུས།། 

 ང་རང་ལྷན་སྐྱེས་དགའ་བ་ཆེན་པོའི་ངང་།། 

 མི་རྟག་སྡུག་བསྔལ་དྲག་པོས་གཙེས་གྱུར་ན།། 

 མྱ་ངམ་འཆི་བའི་ལམ་ཡང་ཏག་ཏག་མཐོང་།། 

 དེ་ལྟར་འཇིག་རྟེན་རེས་སྐྱིད་རེས་མི་སྐྱིད།། 

 སོ་སོའི་ཕུང་པོ་ཡོལ་བའི་དུས་ཀྱང་ཐོན།། 

རྩོམ་པ་པོ། རི་སྤྱང་། 

རྩོམ་སྒྲིག་པ། མགར་རྒྱལ་སྲས།