ཞིག་གསོ་ཁང་གི་ཟུར་ཞིག།

འདྲུད་འཐེན་འཁོར་ལོ་ཞིག་གསོ་བྱེད་བཞིན་པ།

དཔལ་ཡུལ་རྫོང་གཙང་མདོ་ཡུལ་ཤོག་ཨ་ཟེར་གྲོང་སྡེར་ལག་ཏུ་སྐམ་པ་འཁྱེར་བཞིན་ངོ་ལ་འཛུམ་གྱིས་ཁེངས་པའི་མི་ཞིག་གིས་སྨྱུག་འཛིན་པའི་བློ་ཁ་བཀུག་ཅིང་། ཁ་བརྡ་བྱས་པ་བརྒྱུད་ཁོའི་མིང་ལ་ཚེ་དབང་བདུད་འདུལ་ཟེར་ཞིང་། ཤེས་ཡོན་སྣ་འཛོམས་ཀྱི་ལག་ཤེས་པ་ཞིག་ཡིན་ལ།འདྲུད་འཐེན་འཕྲུལ་འཁོར་དང་སྦག་སྦག་འཁོར་ལོ། དེ་བཞིན་ཡོ་བྱད་སྣ་ཚོགས་ཞིག་གསོ་བྱེད་པའི་ལག་རྩལ་ཁྱད་པར་ཅན་ཞིག་ཡོད་པས་གྲོང་མི་ཚོའི་སེམས་ནང་གི་ཀུན་ནུས་ཞིག་གསོ་པ་ཞིག་ཡིན་པར་ཤེས།

ཚེ་དབང་བདུད་འདུལ་ཆུང་དུས་ནས་འཕྲུལ་ཆས་ཀྱི་གྲུབ་ཚུལ་ལ་མཚར་སྣང་གིས་ཁེངས་ཤིང་།གཞོན་ནུའི་དུས་ནས་བཟུང་རང་ཉིད་ཀྱིས་ཞིག་གསོ་ཤེས་བྱ་སློབ་སྦྱོང་བྱས་ཏེ་སྦག་སྦག་འཁོར་ལོ་ཉམས་གསོ་དང་ཚ་ལ་རྒྱག་པ་སོགས་ཀྱི་རྩལ་ནུས་མང་པོ་ཁོང་དུ་ཆུད་པ་རེད། དུས་དེ་ནས་བཟུང་ཁོས་རང་བདག་ལས་གཏོད་ཀྱི་ལམ་བུའི་ཐོག་སྐྱོད་འགོ་ཚུགས་པ་རེད།

སྔོན་ཆད་དཔལ་ཡུལ་རྫོང་གི་ཐག་རིང་ལུང་ཁུག་ཏུ་འདྲུད་འཐེན་འཁོར་ལོ་དང་སྦག་སྦག་འཁོར་ལོ་ནི་ཁྱིམ་ཚང་མང་པོའི་འགྲོ་སྐྱོད་ཡོ་བྱད་གལ་ཆེན་ཞིག་ཡིན་པ་དང་། རི་ལམ་ཀྱག་ཀྱོག་དང་བཟོ་བཅོས་ཁང་ཉུང་བ་སོགས་ཀྱི་རྐྱེན་པས་རླངས་འཁོར་ཞིག་གསོ་དང་བདག་སྐྱོང་ཧ་ཅང་སྟབས་བདེ་པོ་མེད། དེ་ལྟར་རླངས་འཁོར་གྱི་རྒྱུན་གཏན་བདག་སྐྱོང་ངམ་ཡང་ན་གློ་བུར་དུ་སྐྱོན་བྱུང་ཚེ་གྲོང་མི་ཚོས་ཚེ་དབང་བདུད་འདུལ་བཙལ་བ་དང་།ཁོས་རང་ནུས་ཡོད་ཚད་ཀྱིས་གནད་དོན་ཐག་གཅོད་བྱས་ནས་གྲོང་མི་ཚོའི་སེམས་འཚབ་བསལ་ཅིང་བློ་ཡིད་བདེ་པོར་བྱེད་ཀྱི་ཡོད།

འཁོར་ལོ་ཞིག་གསོ་བྱེད་ཐེངས་གཅིག་ལ་སྒོར10ཡིན་པ་དང་འཁོར་བཀག་བརྗེས་ཐེངས་རེ་ལ་སྒོར18ཡིན་པ་སོགས་ཚེ་དབང་བདུད་འདུལ་གྱི་གླ་རིན་ཧ་ཅང་ཁེ་པོ་ཡོད་མོད། འོན་ཀྱང་ཉིན་གཅིག་དཀའ་ལས་ཀྱི་ཡོང་སྒོ་གླ་པ་གཞན་དག་ལས་ཆེ་བ་རེད། ཐོག་མའི་ཚོང་ཞན་པ་ནས་ད་ཆའི་ཚོང་ཡག་པོ་ཡོད་པའི་བར་དང་། ཆུང་བ་གཅུས་གཟེར་གཅིག་གི་སྒྲིག་སྦྱོར་དང་ཆེ་བ་སྒུལ་བྱེད་འཕྲུལ་འཁོར་ཞིག་གསོ་བྱེད་པའི་བར་བཅས་ནས་འཁོར་རིགས་སྐྱེལ་འདྲེན་བྱེད་དཀའ་བའི་གནད་དོན་ཚང་མ་ཚེ་དབང་བདུད་འདུལ་གྱིས་ཐག་གཅོད་ནུས་ལྡན་བྱེད་ཐུབ་ཀྱི་ཡོད། ད་ཆ་ཚེ་དབང་བདུད་འདུལ་གྱི་ལག་རྩལ་བྱང་ཆུབ་པར་གྱུར་ནས་གྲོང་མི་ཚོས་ཡིད་ཆེས་བྱེད་པའི་ཀུན་ནུས་ཞིག་གསོ་པ་ཞིག་ཏུ་གྱུར་ཡོད།

རྒྱུན་དུ་རླངས་འཁོར་ལས་སར་ཡོང་མཁན་འཆི་མེད་བཀྲ་ཤིས་ཀྱིས་ང་ནམ་རྒྱུན་ཚེ་དབང་བདུད་འདུལ་ས་ནས་རླངས་འཁོར་ཞིག་གསོ་བྱེད་དུ་ཡོང་བ་ཡིན། ཁོའི་ལག་རྩལ་བཟང་ཞིང་ངང་རྒྱུད་རིང་བ་དང་།ཉིན་ལྟར་གདོང་ལ་འཛུམ་གྱིས་ཁེངས་པས་ང་ཚོ་ཚང་མ་ཁོའི་སར་རླངས་འཁོར་ལས་སར་ཡོང་འདོད་ཡོད་ཅེས་བཤད་པ་རེད།

གྲོང་མི་ཚོའི་མིག་ལམ་དུ་ཚེ་དབང་བདུད་འདུལ་ལ་ཡ་མཚན་ཅན་གྱི་སྤྲུལ་པའི་ལག་ཟུང་ཞིག་ཡོད་པར་མཐོང་སྟེ།

འདྲུད་འཐེན་འཁོར་ལོ་དང་སྦག་སྦག་འཁོར་ལོ་སོགས་ཞིག་གསོ་ལེགས་པོ་བྱེད་ཤེས་པ་ཕུད།ད་དུང་འཚོ་བའི་ཡོ་བྱད་སྣ་ཚོགས་ལ་བཟོ་བཅོས་བྱེད་མཁས་པ་ཞིག་ཡིན། ཞིང་ཆས་དང་ཁྱིམ་སྤྱོད་གློག་ཆས། འཕྲུལ་ཆས་སྒྲིག་ཆས་ཆུང་གྲས་སོགས་ཀྱང་ཁོའི་ཉམས་མྱོང་དང་རྩེར་སོན་གྱི་ལག་རྩལ་ལ་བརྟེན་ནས་རེ་རེ་བཞིན་བསྐྱར་དུ་བེད་སྤྱོད་བྱེད་ཆོག་པ་བཟོ་བ་རེད།

ཚེ་དབང་བདུད་འདུལ་དང་ཁ་བརྡ་བྱེད་སྐབས་སྨྱུག་འཛིན་པས་ཚེ་དབང་བདུད་འདུལ་ནི་ཉིན་ལྟར་ལས་བྲེལ་ཧ་ཅང་ཆེ་ཞིང་། ཉིན་གཅིག་ལ་ཧ་ལམ་ཆུ་ཚོད12ཙམ་ལ་ལས་ཀ་བྱེད་དགོས་ཀྱི་ཡོད་པ་དང་སྐབས་རེར་ཉིན་གུང་ཆུ་ཚོད་གཉིས་པར་སླེབས་སྐབས་གཞི་ནས་ཁ་ལག་ཟ་རྒྱུ་རག་པ་ཤེས་བྱུང་། འོན་ཀྱང་ཁོས་རང་ཉིད་ཀྱི་ལས་ལ་བརྩོན་པའི་ལག་ཟུང་ལ་བརྟེན་ནས་འཚོ་རྟེན་གྱི་སྒོར་མོ་བཙལ་བ་འདི་ནི་བློ་ཡིད་བདེ་ལ་འཚོ་བ་ཕུན་སུམ་ཚོགས་པ་ཞིག་ཏུ་བསམ་བཞིན་ཡོད།

ངས་འདི་གར་བཟོ་བཅོས་ཁང་བཙུགས་ནས་ལོ་བརྒྱད་ཕྱིན་སོང་། གཙོ་བོ་ཁ་དན་ཚིག་གནས་ཀྱི་གཉེར་སྐྱོང་དང་ཁེ་ཆུང་བྲིན་མང་བྱེད་ཀྱི་ཡོད། དེར་བརྟེན་ཉེ་འགྲམ་ཀྱི་གྲོང་མི་དང་ཡུལ་ཤོག་གི་ལས་བྱེད་པ་སུ་ཡིན་རུང་།ཁོང་ཚོའི་རླངས་འཁོར་ལ་གནད་དོན་ཡོད་ཚེ་ཚང་མ་ངའི་སར་ཡོང་ནས་ཞིག་གསོ་བྱེད་པའམ་ཡང་ན་ཡོ་བྱད་ཉོས་པ་རེད། ལོ་གཅིག་ལ་དཀའ་ལས་བརྒྱབ་རྗེས་ཉུང་མཐར་ཡང་སྒོར་ཁྲི་གཉིས་གསུམ་ཙམ་གསོག་ཐུབ་ཀྱི་ཡོད། དེ་ལྟར་ངའི་ཁྱིམ་ཚང་གི་འཚོ་བ་ཇེ་བཟང་ནས་ཇེ་བཟང་དང་བཟོ་བཅོས་ཁང་ཡང་ཇེ་ཡག་ནས་ཇེ་ཡག་ཏུ་ཡོང་བ་རེད་ཅེས་ཚེ་དབང་བདུད་འདུལ་གྱིས་དགའ་སྤྲོའི་རྣམ་པས་ཁེངས་བཞིན་དེ་ལྟར་བཤད།

བྲེལ་འཚུབ་ཆེ་བའི་ཞོར་ལ་ཚེ་དབང་བདུད་འདུལ་གྱིས་ད་དུང་རྟག་ཏུ་མཐའ་འཁོར་གྱི་མི་རྣམས་ལ་ལྟ་རྟོག་དང་རོགས་རམ་བྱེད་ཀྱི་ཡོད། དབྱར་ཚ་གདུག་དང་དགོན་གྲང་རླུང་ལ་མ་འཛེམས་པར་གྲོང་མོ་ཚོར་དགོས་མཁོ་ཡོད་ཚེ། ཚེ་དབང་བདུད་འདུལ་གྱིས་ཡུལ་དུས་གང་དུའང་འཁང་ར་སྤུ་ཙམ་ཡང་མེད་པར་འཕྲུལ་འཁོར་ལས་བྱེད་ཀྱི་ལག་ཆ་འཁྱེར་ནས་རོགས་རམ་བྱས་པས་ཡུལ་མི་ཚོའི་བསྔགས་བརྗོད་དང་བརྩི་བཀུར་ཆེན་པོ་ཐོབ་པ་རེད།

ད་ཆར་ཚེ་དབང་བདུད་འདུལ་གྱིས་ཨ་ཟེར་གྲོང་སྡེར་ཁང་པ་བརྒྱབ་ནས་གཏན་འཇགས་ཀྱི་ཚོང་ཁང་ཡང་ཕྱེ་བ་རེད། ཉིན་ལྟར་རླངས་འཁོར་དང་འཕྲུལ་ཆས། སྒྲིག་ཆས་སོགས་ཞིག་གསོ་བྱས་ཤིང་། རང་ཉིད་ཀྱི་ལས་བརྩོན་དང་བློ་རིག་ལ་བརྟེན་ནས་ཕྱུག་འགྱུར་གྱི་ལམ་བུ་གསར་པ་ཞིག་བཏོད་པས་ལས་དབང་ལ་འགྱུར་ལྡོག་ཕྱིན་པར་མ་ཟད། གྲོང་སྡེ་འཕེལ་རྒྱས་ལའང་གསོན་ཤུགས་བསྣན་པ་རེད།།