དགོང་དྲོའི་བྱ་ཁྱུ་ཚང་མལ་བསྙེགས་ནས་སོང་།།

མུན་པའི་ཡོལ་བ་རིམ་བཞིན་ཇེ་མང་གྱུར།།

སྐྱོ་སྣང་འུབ་ཀྱིས་བསྡུས་པའི་ང་རང་ལ།།

གང་ཞིག་དྲན་པས་གདུང་བཞིན་ངང་སྒུག་བྱས།།

རྒྱང་ལ་བལྟས་ཀྱང་བྱ་ཁྱུའི་རྗེས་ཤུལ་ལས།།

རི་དང་ནགས་ཚལ་རྒྱང་མིག་ཆད་ནས་སོང་།།

སེམས་ཀྱི་རྟ་ཕོ་སྡོད་མེད་ཟེང་ངེ་བར།།

ལས་ཀྱི་སྙིང་ཉེ་དྲན་གྱིན་རྒྱང་རིང་བཀླགས།།

སྙིང་ཉེའི་སེམས་པ་དགུན་དང་ཁ་བ་བཞིན།།

དཀར་ཞིང་གཙང་ལ་འཁྱག་པའི་ངང་ཚུལ་ཡོད།།

སྙིང་ཉེའི་སེམས་པ་དབྱར་དང་མེ་ཕུང་སྟེ།།

མཛེས་ཤིང་དྲོ་ལ་སྲེག་པའི་སྒུལ་ཤུགས་ཡོད།།

གནམ་གྱི་རྒྱུ་སྐར་རིམ་དང་རིམ་གྱིས་འཆར།།

ལས་འཕྲོའི་སྙིང་ཉེ་དྲན་པ་སྔར་བཞིན་གནས།།

ཐག་རིང་ཐག་རིང་མིན་ཡང་ཐག་ཉེ་ཡི།།

སྙིང་ཐུབ་བྱམས་པའི་ཡིད་ལ་སུ་ཞིག་དྲན།།

ཁྱོད་ལ་དབང་བའི་ལྷིང་འཇགས་སྒེའུ་ཁུང་ལས།།

གནམ་གྱི་རྒྱུ་སྐར་ལྟ་བཞིན་འདུག་ཡོད་དམ།།

ཡུན་ཐུང་མི་ཚེའི་བགྲོད་ལམ་མྱུར་བས་ན།།

ཁྱོད་ལ་དབང་བའི་མཛེས་སྡུག་ཉུང་སོང་ཨང་།།

ནམ་ཞིག་ལས་ཀྱི་སྟབས་ཀ་སླར་ལྡན་ན།།

ང་རང་ཁྱོད་ཀྱི་གྲིབ་གཟུགས་བྱ་ཡང་ཆོག།

ནམ་རྒྱུན་འཕྲད་པའི་སྐལ་བ་ཡོད་ལགས་ན།།

མི་ཚེའི་རེ་འདུན་ཤོར་ཡང་བློ་འགྱོད་ཅི།།

ད་ནི་ཁྱེད་རང་དྲན་ཚད་མང་དྲགས་པས།།

གནག་སྣུམ་སྐྲ་ལོའི་ཁ་དོག་འགྱུར་བར་དོགས།།

ཁྱེད་རང་བསམ་པའི་བརྡ་ཐབས་ཁྲི་མ་འབུམ།།

མགྲིན་པ་རྣོང་བའི་གཏམ་འདི་སུ་ལ་གསང་།།

མཚན་མོའི་ཟླ་བ་ཁེར་རྐྱང་མཐོངས་ཁུང་ནས།།

ལྷོད་ཀྱིས་འཆར་བཞིན་སྙིང་ཉེ་ཡིད་ལ་བསླངས།།

སྙིང་ཉེས་གནང་བའི་ལེགས་སྐྱེས་ཉེར་ལྔ་ལས།།

གང་ཞིག་སེམས་ལ་སྦྱར་ནས་གཉིད་པར་བརྩོན།།

རེ་ཞིག་གཉིད་པས་རྨི་ལམ་ཟ་ཟིའི་ནང་།།

སྙིང་སྡུག་བོར་བའི་འཁྲུལ་སྣང་ཅི་ཡང་ཤར།།

ཧད་ཀྱིས་སད་དུས་ལུས་ཡོངས་རྔུལ་ཆུས་སྦངས།།

སླར་ཡང་གཉིད་པའི་བློ་ཁ་རྨེག་མེད་བཏང་།།

དེ་ལྟར་མཚན་མོར་རང་ཁྱིམ་གྲུ་བཞི་ནས།།

དྲན་པའི་མགོ་ལྕོགས་སྙིང་ཉེའི་ཕྱོགས་སུ་སྒུལ།།

སྙིང་ཉེས་མཚན་མོའི་ཞེད་སྣང་མ་འཛེམས་པར།།

ང་ཡི་ཁེར་རྐྱང་དཀྲོགས་པར་ཕེབས་ན་སྙམ།།

ཉམས་དགའི་བསིལ་རླུང་ཤུགས་ཀྱིས་ལྡང་བྱུང་སྟེ།།

མཚན་མོའི་ཀློང་ནས་སྙིང་ཉེའི་གོམ་འགྲོས་ཐོས།།

གོམ་འགྲོས་ཡར་ལ་མཐོ་བས་ཚོགས་དྲུག་གི།།

སྐྱོ་ཤེས་སྨུག་རླུང་རབ་རིབ་ཕར་ཕར་དེད།།