ལྷ་ས་ཞེས་གླེང་དུས།

སེམས་ལ་བྲེལ་འཚུབ་ཅིག་ཡོང་དོན།

ཧ་ཅང་དྲན་དྲགས་པས་ཡིན་ནམ།

པོ་ཏ་ལ་ནི་བེམ་གཟུགས་ཤིག་མ་རེད།

དེ་བས་ཀྱང་རྡོ་ཁང་ཞིག་མ་རེད།

དེ་ལ་ཕྱག་འཚལ་ཞིང་།

དགའ་དད་ཀྱིས་མིག་གོང་བརླན་པའི་མི་དག།

དོན་དུ་དེའི་པང་མཐིལ་ནས་ན་སོན་ཏེ།

བུ་སྟོར་མ་དང་འཕྲད་པའི་ཚོར་བ་ཞིག་སྟེར་གྱིན་འདུག།

རྒྱང་རིང་ས་ཞིག་ནས་མིག་ཅེར་བ།

དོན་དུ་ནམ་ཞིག་གི་ཚེ་ན་མཇལ་འདོད་པས་ཡིན།

ཡང་གཅིག་བཤད་ན།

ང་ནི་ཁྱེད་ཀྱིས་ཐུག་ན་འདོད་པའི་མི་ཞིག་ཡིན་ཡང་སྲིད།

དེ་ལྟར་མིན་རུང་།

ང་ནི་ཁྱེད་ལ་ཐུག་འདོད་ཤིན་ཏུ་ཆེ་བའི་མི་དེ་ཡིན་ངེས།

ལྷ་སའི་རྐང་ལམ་དེ་ལེ་དབར་ཚད་མེད་ཅིག་བཤད་ན།

སེམས་ཀྱི་དབུས་ལམ་འདི་སྒོ་ཐེམ་ལས་ཉེ་བས།

འདི་ནས་སྡེ་དགེ་དང་ཆབ་མདོ།

ཆབ་མདོ་ནས་ཀོང་པོ་སོགས་སུ་སྦྲང་མ་བཞིན།

རིམ་བཞིན་ལོ་རྒྱུས་ཀྱི་མེ་ཏོག་ཚལ་ནས།

ཞིམ་མངར་གྱི་རྗེས་ཤུལ་འཚོལ་བཞིན་ཡོང་ན་འདོད།

ཁྱེད་ནི་ལོ་རྒྱུས་ཀྱི་མེ་ལོང་གསལ་ཤོས།

དད་འདུན་གྱི་རྟེན་སྐལ་གཙང་ཤོས།

འཆི་གསོན་གྱི་འཇུ་ཐག་རིང་ཤོས།

འགྱུར་མེད་ཀྱི་ཀ་བ་བརྟན་ཤོས་ཏེ།

རྒན་པ་ཚོའི་ཡིད་དུ་སིམ་པའི་གཞས་ཚིག་དང་།

གཞོན་པ་ཚོའི་ངག་ན་འཁྱིལ་བའི་དབྱངས་རྟ་སྟེ།

ངས་ནམ་ཞིག་ལ།

ཁྱེད་ཉིད་སོས་དལ་ངང་མཇལ་འདོད་ཀྱི་རེ་བ་ཤིན་ཏུ་ཆེ།

མ་ཟད།

དྲང་བདེན་དང་ངོ་ཚ་བོར་བའི་གནས་ཡུལ་འདི་ནས།

ང་ལ་རྣམ་དག་གི་བརྩེ་བ་གཅིག་ཐོབ་བྱུང་ན།

ངས“སྙིང་ཉེ་མ”ཞེས་འབོད་ས་དེའང་།

ཁྱེད་ཀྱི་མདུན་ཐང་དུ་ཧ་ཅང་ཁྲིད་ན་འདོད།

རྒྱུ་མཚན་ཡང་།

ང་དང་འབྲེལ་བ་ཟབ་པའི་མི་ནི།

པོ་ཏ་ལ་ལ་ཤིན་ཏུ་དགའ་མཁན་ཞིག་ཡིན་ན་འགྲིག།

དེ་ལྟར་མིན་རུང་།

དབུས་ཕྱོགས་ནས་གཟི་འོད་ལམ་ལམ་དུ་འཕྲོ་མྱོང་མཁན།

ངའི་ཡབ་མེས་ཀྱི་ངོ་གདོང་དེ་དག།

ཅིས་ཀྱང་ཞིབ་འབྲི་ཞིག་བྱེད་དགོས་འདུག།

གང་ལྟར།

བློ་ཁེན་ན་ཆོག་ས།

སེམས་གཏད་ན་ཆོག་ས།

སྲ་ཁྲིགས་ཁྲིགས་ཀྱི་པོ་ཏ་ལ།