བུ་མོ་ཆུང་ཆུང་ཁྱོད་ཆུང་འདྲིས་མིན་ཡང་། །

འཁོར་བའི་རི་འདབས་ནས་ལྷག་པ་ཚོར་བས། །

འཛུམ་མདངས་མེ་ཏོག་གི་རེག་བྱ་འཇམ་པོ། །

ཐོབ་པའི་སྨོན་འདུན་ཞིག་རུམ་ནང་སྦས་ཡོད། །

རི་འགོའི་སྨུག་སྤྲིན་དང་བསྡེབས་པའི་བུ་མོ། །

རྫི་གླུ་སྙན་མོ་ཞིག་མགྲིན་རྩེར་དྲངས་པས། །

འཁོར་བའི་དྲོད་ཁོལ་གྱི་བརྩེ་བའི་བདག་མོ། །

ཕྱི་མིག་ཡང་ཡང་གིས་གཟིགས་པ་གནང་ཤོག །

ལུག་ཁྱུ་སྤྲིན་དཀར་དང་འདྲེས་ནས་ཡོད་པ། །

སེམས་པ་གངས་དཀར་གྱིས་མཚོན་ཐབས་ཡིན་པས། །

ན་ཆུང་སྒེག་ལྡན་གྱི་ཡིད་འཕྲོག་གཞོན་ནུ། །

འཛུམ་མདངས་འོད་ཟེར་ལ་འགྱུར་བ་མེད་ཤོག །

རྨི་ལམ་དཀར་པོ་ཞིག་ལྷ་ཚོགས་ཕུལ་འདུག །

རེ་བ་ཕྱེད་ཀ་ཞིག་ཚུར་ལ་ངོམ་བྱུང་། །

མགུར་མའི་རང་མདངས་ལས་རྙེད་པའི་བུ་མོ། །

ཚིག་གིས་སྲུང་འཁོར་ཞིག་མགུལ་དུ་གདགས་ཤོག །

འུར་རྡོ་ཁྲ་ཁྲ་ཞིག་ལུས་ལ་བཏགས་ནས། །

བརྩེ་སེམས་དྲོད་ཁོལ་གྱིས་ཁེངས་པའི་གཞོན་ནུ། །

འཁོར་བའི་བྱ་གཞག་ལ་བྲེལ་ཚབ་ཆེ་བས། །

བུ་མོའི་གོམ་འགྲོས་ལ་བར་ཆད་མེད་ཤོག །

གཡུ་ཐོག་ཟམ་ཁ་ནས་སྐྲ་ལོ་ལྷག་སོང་། །

ཚངས་དབྱངས་རྒྱ་མཚོ་ཡི་མགུར་གླུ་དྲན་སོང་། །

ལྷོ་ཁའི་གྲོང་ཁེར་གྱི་རྟོག་བཏགས་བུ་མོ། །

ཏིང་འཛིན་མཉམ་བཞག་གི་ངོས་སུ་ཤར་བྱུང་། །

དབེན་པའི་ལྷིང་འཇགས་སུ་སྤྲོས་པས་གར་འཁྲབ། །

གཟུགས་མེད་ཚིག་འཁྲི་ཡིས་བཞེངས་པའི་བུ་མོ། །

རི་དང་གཙང་པོ་ཡི་སྨོན་འདུན་མཐའ་དག །

ཚོར་བའི་རླབས་རྒྱུན་དང་བསྡེབས་ནས་ཕུལ་ཡོད། །

ཁྲེལ་དང་ཕྱི་ཐག་ཅིག་ཡོད་མེད་ཅི་ཆ། །

གཟུགས་དང་ལང་ཚོ་ཡང་མཛེས་མིན་མི་ཤེས། །

བློ་ངོར་ཡུད་ཙམ་གྱིས་འཆར་སྣང་བཀོད་ནས། །

འདི་ཡིན་འདི་མིན་གྱི་དབྱེ་འབྱེད་མེད་ཤོག །

ཚིག་གི་བཟི་ཁ་ལ་འཁྲི་བའི་རྣམ་ཤེས། །

ངག་གི་ཆོ་ལོ་ལ་དུངས་པའི་ཨ་ཇོས། །

རྟོག་བཏགས་སྒྱུ་འཕྲུལ་གྱི་མགུར་ཚིག་བྲིས་པ། །

ནང་མཐུན་གཞོན་ནུ་ཚོས་ཐུགས་ཡངས་གནང་ཤོག །