མཛེས་སྡུག་རྣམ་པར་བཀྲ་བའི་བོད་ལྗོངས་ཀྱི་ཡུལ་གྲུ།།

སྔོན་མེད་འཇིག་རྟེན་གསར་པའི་བཞིན་རས་དེ་མཐོང་ཚེ།།

མི་མངོན་ནམ་མཁའི་དབྱིངས་ནས་རབ་གསལ་གྱི་ཉི་མས།།

འོད་སྟོང་ཕྱོགས་བཅུར་འགྱེད་བཞིན་ལྟད་མོ་ལ་ཆས་སོང་།།

སྣང་བ་རི་ལ་རྩེན་པའི་བརྗིད་ཉམས་ཀྱི་གངས་རི།།

ཐོས་པ་ཙམ་གྱིས་རང་སེམས་ཀློང་རྡོལ་དུ་འདོར་ཡང་།།

སེམས་ཀྱི་གསོས་སུ་སྨིན་པའི་འཁོར་འདས་ཀྱི་གྲོང་བ།།

ལྟ་བ་དཀར་ནག་གཉིས་ཀྱི་དོན་གནད་དུ་གནས་འདུག།

རང་སེམས་འཇིགས་སྐྲག་བྱུང་བའི་སྡུག་ཡུས་ཀྱི་རྣམ་པ། །

སྒོ་ཆུང་བྲག་གིས་སྦྱར་བའི་སྒྲུབ་ཕུག་ཏུ་སོང་དུས། །

བྲག་སྒོ་ཉི་མར་ལྡེ་བའི་མཉམ་བཞག་གི་ཁ་དན། །

འོད་གསལ་གནས་ལུགས་བཅུ་ཡི་རང་སྣང་གིས་སྦྲིད་སོང་། །

ལོ་ཟླའི་རྒྱང་དུ་བཞུད་པའི་ཡ་ཆུང་གི་ཟུག་གཟེར། །

ངེས་མེད་རླུང་ལ་བསྐུར་བའི་འབྱུང་འགྱུར་གྱིས་བསུམས་ནས། །

ཐ་སྙད་བྲང་ལ་སྦྱར་བའི་ཉམ་ཆུང་གི་གར་སྟབས། །

ན་བུན་སེམས་སུ་བསྙལ་བའི་ལྷིང་འཇགས་ཀྱིས་གནས་འདྲ། །

ལྷུན་ཆགས་རྫིག་པོས་གྲུབ་པའི་ཡབ་མེས་ཀྱི་དཔའ་གདེང་། །

སྤྱང་གྲུང་རྣོན་པོ་འཛོམས་པའི་བསིལ་ལྗོངས་སུ་འཁྱིལ་ན། །

མཐོན་མཐིང་དགུང་ལ་བརྟོལ་བའི་ཡིད་བརྙན་གྱི་ངོ་བོ། །

བྱིན་རླབས་ནུས་མཐུ་བསྩལ་བའི་བཀའ་ལུང་གིས་དྲངས་ཡོད། །

སྤྲོས་བྲལ་མངོན་སུམ་སྐྱེས་པའི་རང་བྱུང་གི་ཆོས་ཉིད། །

ཆགས་སྡང་མེ་ལྕེ་འཕྱོ་བའི་གཡབ་མོ་རུ་བརྡུལ་ཀྱང་། །

བྱ་ངན་གཟིངས་ནས་བགྲོད་པའི་རེ་དོགས་ཀྱི་མཐའ་རྒྱ། །

གཉུག་མའི་རང་བབས་སྐྱོང་བའི་བདེན་པ་ལ་འཁྲི་ཡོང་། །

ཞེན་ཆགས་རྣམ་རྟོག་འགྱུ་བའི་དྲན་ཤེས་ཀྱི་ཡིད་ཀ །

མ་བཅོས་ཤིག་གི་སྐྱེས་བོའི་དབུ་རྐེད་ལ་འཛར་བས། །

བག་ཡོད་འཚོ་བ་བསྡམས་པའི་གཤིས་འཇམ་གྱི་ཕྱི་ནང་། །

སྤྲང་པོ་ཟས་ལ་གཏད་པའི་ལམ་ཡིག་ཏུ་བརྫིས་ཡོད། །

འདུ་བྲལ་འཁོར་བའི་རང་གཤིས་ཆར་རླུང་གིས་བཙས་ནས། །

ཚེ་ཡི་ནོམ་པ་མོད་པོ་ལས་སྨོན་ལ་བསླངས་ཀྱང་། །

ཕྱག་རྒྱ་གྲོལ་བའི་ཐུགས་རྗེ་མཁའ་མཐའ་ནས་མཆེད་པས། །

ཟུང་འཇུག་ཉི་ཟླའི་དཀྱིལ་ལ་འཇའ་ཚོན་བཞིན་འཐིམ་འགྲོ། །

གནས་ལུགས་སྤྲོས་པའི་བུ་རམ་ཅུང་ཙམ་ནི་ལྷོད་དེ། །

དོན་དང་དམ་པའི་བརྗོད་ཆེན་འདི་བདེན་དང་གན་བདེན། །

ཅིས་ཀྱང་ཞེ་བློ་ཚིམ་པའི་བདེ་བ་རུ་འདོད་ན།།

གནས་ལུགས་ཟབ་ཆེན་ཟེར་ནའང་དེ་ག་ཙམ་མི་འདུག །

འདི་ལྟར་ཆོས་ཉིད་ཟབ་མོའི་གཏིང་མཐའ་ལ་བརྙབས་དུས། །

རང་དང་གཞན་རིག་དབྱེ་བའི་རིག་པ་ནི་བན་བུན། །

མྱོང་བ་གནད་ལ་འབེབས་བའི་ཚད་ཐིག་ཏུ་ཁེལ་ན། །

དྲན་པས་རླུང་ལ་སྐུར་བའི་དུས་ཚིགས་ཀྱང་ཡོང་ངོ་། །