ད་ལོའི“ཟླ་མཆོད་དུས་ཆེན”གྱི་གུང་གསེང་རིང་དཀར་མཛེས་ནི་མི་རྣམས་ཀྱིས་ཆེས་དགའ་བསུ་ཐོབ་པའི་ཡུལ་སྐོར་གནས་མཆོག་ཅིག་ཏུ་གྱུར་ཡོད། གསར་འགོད་པས་ཁུལ་རིག་གནས་རྒྱང་སྒྲོག་བརྙན་འཕྲིན་དང་ཡུལ་སྐོར་ཅུས་ནས་ཤེས་རྟོགས་བྱུང་བར་གཞིགས་ན། སྤྱི་ཟླ9པའི་ཚེས15ནས་ཚེས17ཉིན་བར་རང་ཁུལ་གྱིས་ཁྱོན་ཡུལ་སྐོར་བ་ཁྲི58.31（དེའི་ནང་རིམ་པAལྗོངས་ཁུལ་གྱི་མི་ཁྲི14.78）ལ་སྣེ་ལེན་ཞུས་པར་ཡུལ་སྐོར་ཡོང་འབབ་སྒོར་ཁྲི61588.26བྱུང（དེའི་ནང་སྒོ་འཛིན་ཡོང་འབབ་སྒོར་ཁྲི188.74）། ཁུལ་ཡོངས་ཀྱི་ཡུལ་སྐོར་ཁྲོམ་རའི་སྒྲིག་ལམ་སྤྱིའི་ཆ་ནས་ཡག་པོ་ཡོད་པ་དང་བདེ་འཇགས་ཀྱི་ལས་འཛོལ་ཆེན་པོ་དང་ཡུལ་སྐོར་ཞུ་གཏུག་བྱུང་མེད།

    གུང་གསེང་སྔོན་དུ་ཁུལ་ཨུ་དང་ཁུལ་སྲིད་གཞུང་གི་འགོ་ཁྲིད་ཀྱིས་ཡུལ་སྐོར་ཉེན་མེད་དང་ཞབས་ཞུའི་སྤུས་ཚད་སོགས་ཀྱི་ཐད་བཀོད་སྒྲིག་དང་ལས་ཀའི་བླང་བྱ་བཏོན་པ་རེད། རིག་གནས་ཡུལ་སྐོར་སྡེ་ཚན་གྱིས་སྣེ་ཁྲིད་དེ་སྤྱི་ཡོངས་ལ་དམ་འཛིན་དང་སྤྱི་འདོམས་བཀོད་སྒྲིག་ཡག་པོ་བྱས་ཏེ་ཁུལ་དང་རྫོང་གི་རིག་གནས་ཡུལ་སྐོར་སྡེ་ཚན་ལ་འགོ་ཁྲིད་ཀྱིས་ལས་རེས་སྣེ་ཁྲིད་དང་ཆེད་མི་དུས་ཚོད24རིང་ལས་རེས་ལམ་ལུགས་ལག་བསྟར་བྱ་རྒྱུ་བཀོད་སྒྲིག་བྱས། ཡུལ་སྐོར་ལྗོངས་ཁུལ་དང་ཡུལ་སྐོར་འགྲོ་ལམ་གྱི་གལ་ཆེ་བའི་མཚམས་ཚིགས་སུ་དང་བླངས་ཕྱོགས་བསྡུས་ཞབས་ཞུའི་ས་ཚུགས23བཙུགས་ནས་ཡུལ་སྐོར་བར་བློ་འདྲི་སོགས་རྨང་གཞིའི་ཡུལ་སྐོར་ཞབས་ཞུ་མཁོ་འདོན་བྱས། ཡུལ་སྐོར་ལྗོངས་ཁུལ་དང་ཡུལ་སྐོར་ལས་དོན་མི་སྣས་ཤུགས་ཡོད་རྒུས་ཡུལ་སྐོར་ཞབས་ཞུའི་ལས་དོན་འགན་ལེན་བྱས་ནས་ཕན་འབྲས་ཆེ་བའི་འཁོར་སྐྱོད་འགན་ལེན་བྱས།

        སྡེ་ཚན་གྱིས་སྤྱི་འདོམས་མཉམ་འགུལ་བྱས་པས་ཡུལ་སྐོར་བའི་བློ་ཡིད་ཚིམ་ཚད་སྔར་བས་ཆེ་རུ་ཕྱིན། གནམ་གཤིས་དང་སྤྱི་བདེ་འགྲིམ་འགྲུལ་སོགས་སྡེ་ཚན་གྱིས་སྔ་སྣུར་དུ་གནམ་གཤིས་སྔོན་བརྡ་དང་འགྲིམ་འགྲུལ་དྲན་སྐུལ་ཁྱབ་བསྒྲགས་བྱས་ནས་ཡུལ་སྐོར་བར་གནམ་གཤིས་འགྱུར་ལྡོག་དང་འགྲིམ་འགྲུལ་དོ་དམ་གྱི་གནས་ཚུལ་དུས་ལྟར་དོ་ཁུར་བྱེད་དུ་བཅུག་ནས་འགྲོ་སྐྱོད་བཀོད་སྒྲིག་ལུགས་མཐུན་བྱ་རྒྱུར་ཁྲིད་སྟོན་བྱས། འཚུབ་བསྟུན་དོ་དམ་དང་ཁྲོམ་རའི་ལྟ་སྐུལ་དོ་དམ་སོགས་སྡེ་ཚན་གྱིས་ཡུལ་སྐོར་ཁྲོམ་རའི་ཟང་ཟིང་གི་སྣང་ཚུལ་དང་ཉེན་མེད་ཐོན་སྐྱེད་སོགས་ཀྱི་གནས་ཚུལ་ལ་ཞིབ་བཤེར་བྱས། སྡེ་ཚན་གཞན་དག་གིས་འགན་ནུས་དང་འགན་འཁྲིར་གཞིགས་ནས་ཁྲོམ་རའི་མཁོ་སྤྲོད་འགན་ལེན་དང་རྨང་གཞི་ཆ་བསྒྲིགས་སོགས་ཀྱི་ཞབས་ཞུའི་འགན་ལེན་ཧུར་ཐག་བྱས་ཏེ་རྒྱ་ཆེའི་ཡུལ་སྐོར་བར་ཉེན་མེད་དང་གོ་རིམ་ལྡན་པ། སྤྲོ་སྐྱིད་ལྡན་པ་བཅས་ཀྱི་ཡུལ་སྐོར་ཁོར་ཡུག་བཏོད་པ་རེད།།