ལྗང་ཐིང་ངེའི་སྤང་ལྗོངས་ཡལ་རྗེས། ཁྲ་ཐ་རེ་མེ་ཏོག་གི་རྣམ་ཤེས་འཁྱམ་སོང་། གྱེས་བྲལ་གྱིས་མནར་བའི་སྡིག་སྒྲིབ་དེ་དག སྐྱེ་བ་གོང་མར་ཆད་པའི་བུ་ལོན་ཡིན་ནམ། སྟོན་ཁ་ཚེས་མ་ཐག། ཉི་འོད་ཀྱི་ཚ་བས་སྟོན་ལོ་སེར་པོར་བཏང་། བསིལ་རླུང་ལྡང་ནས་སྟོན་ལོ་རྒྱང་དུ་སྤྱུགས། ཆར་ཟིམ་རྗེས་མས་སྟོན་ལོ་སྐྱེལ་མ་བྱས། སེམས་ཚོར་སྟོང་བས་སྟོན་ལོ་སྙན་ངག་བྲིས། ནམ་ཟླས་བླངས་པའི་གདུང་གླུ་དེ། མི་ཚོས་སྙན་པོ་མི་འདུག་ཅེས་མང་པོ་བརྗོད་ཀྱང་། དགའ་བསུའི་ཐལ་སྒྲ་ཆད་མ་མྱོང་བའི་ལོ་ངོ་འདི་དག ཁ་ཁོག་འཛོལ་བའི་སྐད་ཆས་ནམ་ཟླ་དམ་ལ་བཏགས། སེར་ཀ་ཤོར་བའི་སྟོན་ཟླ། གསེར་ཚོན་གྱིས་བྲིས་པའི་བྱེ་མའི་ཕུང་པོ། ཆེས་སྤྱིར་བཏང་ཞིག་གིས་ས་མཐའི་སྨྲེང་སྐྱོ་ཁུར་ནས། ཆེས་སྤྱིར་བཏང་མ་ཡིན་པའི་འཚོ་བ་ཞིག་ལ་འཁྱུད་དང་། རྨི་ལམ་ནང་གི་དབྱར་གཞུང་། དབྱར་གཞུང་དུ་རྨིས་པའི་རྨི་ལམ། སྟོན་འགོ་མའི་ཤིང་ལོ་དབང་མེད་འཐོར་དུས། གྲང་ཤུར་ཤུར་གྱི་གནམ་གཤིས་ཉེ་སར་ཐོན་དུས། ས་ཁ་ཞེང་འདབས་ཁ་སེར་ཐིག་ཕོག་དུས། ངས། དབྱར་ཟླས་བཞག་པའི་དྲན་ཤིང་རུམ་ནས། སྟོན་ཟླས་གནང་བའི་ལག་ཟུང་གཉིས་བསྲོ་དགོས། ༼ གངས་ཆབ་ལྷ་སྲས། ༽