ཀྱེ་ཀྱེ། སྐྱབས་ཆེན།

རླུང་བུས་མུན་པ་བསྒུལ།

མུན་པས་གཙང་པོ་འཇོམས་དུས།

ངས། ཁེར་རྐྱང་གི་ཐ་སྙད་གཤོམ་བཞིན།

ཡིག་ཚོགས་ཀྱི་ཁུ་སིམ་ཁྲོད་དུ་ཉལ་བའི་

སྙན་ངག་པ་དེ་དྲན་བྱུང་།

རི་ཆེན་རི་ཆུང་གི་ལ་མོའི་རྩེ་ནས།

ཟླ་འོད་སྙེག་བཞིན་སྐར་མ་བརྩིས་ནས་

ལོ་ཟླ་ག་ཙམ་འགོར།

བཞེས་ཆང་མེད་པའི་དམ་བེ་སྟོང་པས།

སེམས་ཀྱི་ལྷན་པ་བཟིས་ནས་ཡུན་རིང་ལུས།

ཀྱེ་ཀྱེ། སྐྱབས་ཆེན།

“ཆང་ཁང”མེད་པའི་བར་སྐོར་གྱི་ཆང་ཁང་།

ངས་གོ་བ་ལོན་ཐབས་མི་འདུག།

ང་ནི་སྙན་ངག་ལ་རྨོངས་པའི་“སྙན་ངག་པ”

ཞིག་ཡིན་པས།

ཁྱོད་ཀྱིས་ཤུན་སྐོགས་ཀྱིས་བརྩམས་པའི་

ཡིག་འབྲུ་དེ་ཚོ།

ངས་སྲོལ་རྒྱུན་དང་རང་མོས་ཅི་ཡིན་ལའང་

འཁྲུལ་བར་འགྱོད་བཤགས་མཛད་རོགས།

ཀྱེ་ཀྱེ། སྐྱབས་ཆེན།

ཁྱོད་ཀྱི་སྙན་ངག་ངས་བལྟས་ཟིན་པ་ཡིན།

བར་སྐོར་གསང་ལམ་ཡང་ངས་འགོ་མཇུག་

རོལ་མྱོང་།

ཡིན་ནས། ངས་བར་སྐོར་གྱི་ཁྲོམ་ལམ་ནས།

ཁྱོད་ཀྱི་སྙན་ངག་གི་ཁ་བྱང་མ་རྙེད།

“area18club,Canyon Town Bar”

ཁྲ་ཁྲ་སིལ་སིལ་དང་འ་འུར་ཆོམ་སྒྲ་ཡིས་

ཁེངས་པའི་ཁང་ཆུང་སྦུག་ནས།

གློག་གི་འགྱུ་བས་གོས་ཀྱི་ལྷན་པར་རང་

དབང་བཙལ།

ཆང་གི་རླངས་པས་སེམས་ཀྱི་ན་

ཟུག་རླུང་ལ་བསྐུར།

ཀྱེ་ཀྱེ། སྐྱབས་ཆེན།

ངས་དེ་དག་གི་ཁྲོད་ནས་ཁྱོད་ཀྱི་

སྙན་ངག་གི་ཁ་བྱང་བཙལ།

བཙལ་བཙལ་མཐར།

སྒྲོན་མེའི་འོག་གི་ཚིག་དང་ཐ་སྙད་མ་

རྙེད་གོང་།

ངའི་རྣམ་ཤེས་ཀྱི་བན་བུན།

ཐ་མག་གི་མེ་ལྕེ་དང་ལྷན་དུ་ཚིག་

རིལ་བཏང་།

དུས་དེ་ནས་བཟུང་།

ངས་ཁྱོད་ཀྱི་དཀར་ཆག་མེད་པའི་སྒྲུང་

རིང་གི་རྫོགས་ཤད་མ་རྙེད་ལ།

སྙན་ངག་རིན་ཆེན་གྱི་གོ་འཕང་འཐོབ་

དབང་མ་བྱུང་།

དེ་ནི། ངས་ནག་ནག་མུན་པའི་དཀྱིལ་

དུ་བླངས་པའི་སྨྲེང་གླུ་ཡིན།