མཁའ་དབྱིངས་འཇའ་ཚོན་རྒྱུ་བའི་ཕར་ནང་ལ། ། རེ་འདུན་གཤོག་པ་ཁུར་བའི་ཟླ་བ་ལགས། ། མཚར་སྡུག་འོད་སྣང་རྒྱས་པའི་ལ་རྩེ་ནས། ། ང་ཡི་སེམས་འདི་ཁྱོད་ཀྱི་པང་ལ་ཤོར། ། ཚེ་སྲོག་མར་མེ་རྐོང་བུ་མ་གཟིམ་བར། ། ངག་རིག་དབྱངས་རྟའི་རྒྱུན་ཐག་ཆད་པ་མེད། ། སྡེབ་ལེགས་ཚིག་གི་འཁྲི་ཤིང་རྒུད་པ་མེད། ། སྙན་དབྱངས་པདྨའི་གཟི་མདངས་ཉམས་པ་མེད། ། ཉིན་ནས་རིང་དུ་མི་ཡི་ཁ་དོག་བྲིས། ། རི་མོ་ཁ་དོག་མང་བའི་དབྱངས་རྟ་འཚོལ། ། འཇའ་ཡི་ཟེར་ཐག་ངོམས་པའི་ཕ་མཐའ་ན། ། ང་ཡི་སྙིང་ལ་འཛུམ་པའི་རི་བོང་འཛིན། ། ཁྱོད་ཀྱི་གམ་དུ་ང་ཡི་དབྱར་ཁ་ཚེས། ། དབྱར་ཁའི་སྤང་ལ་བརྩེ་བའི་མེ་ཏོག་བཞད། ། ཁྱོད་ཀྱི་གམ་དུ་ང་ཡི་སྟོན་ཁ་ཚེས། ། སྟོན་གྱི་མཚམས་ལ་དུང་བའི་སྙིང་གཏམ་གླེང་། ། ཕྱི་མའི་ལམ་འཕྲང་བརྒལ་ཏེ་འགྲོ་ཉིན་དེར། ། ཡོད་ཚད་ཤུལ་དུ་ལུས་པར་མི་སྐྱོ་ཞིང་། ། རང་ཉིད་བདེ་བར་གནས་པའི་སྐབས་དུས་སུ། ། ངག་རིག་དབྱངས་རྟའི་འགྱུར་ཁུག་བརྩམས་པས་ཆོག ། རི་བོ་མཐོན་པོ་ཞིག་ལ་རྒྱང་སོ་བཙུགས། ། ཉི་ཟླའི་འཛུམ་ལ་སྒོམ་དེ་ཁེར་རྐྱང་ལུས། ། ཆུ་བོ་དྭངས་མོ་ཞིག་ལ་འདུན་མ་གཏད། ། རྒྱ་མཚོའི་འཇིངས་ལ་བསམས་ནས་དམིགས་འདུན་འཚོལ། ། འདི་ནི་ཚོར་བས་བསླས་པའི་མགུར་དབྱངས་ཤིག ། འདི་ནི་བརྩེ་བས་སླད་པའི་ལ་གཞས་ཤིག ། འདི་ནི་དབྱངས་ལ་བརྒྱུས་པའི་འགྱུར་ཁུགས་ཤིག ། འདི་ནི་སེམས་ལ་འཁྲུངས་བའི་རེ་འབྲས་ཤིག ། ༼ ཁམས་ཟླ་སྲས། ༽