སྤྱི་ཟླ6པའི་ཚེས12ཉིན་གསར་འགོད་པས་དཀར་མཛེས་ཁུལ་རྒྱུགས་ལེན་གཞུང་ལས་ཁང་ནས་ཤེས་རྟོགས་བྱུང་བར་གཞིགས་ན།2025ལོའི་འབྲིང་རྒྱུགས་དེ་སྤྱི་ཟླ6པའི་ཚེས13ཉིན་ནས་ཚེས15ཉིན་བར་སྤེལ་བ་རེད། ཁུལ་ཡོངས་སུ་རྒྱུགས་གནས33དང་རྒྱུགས་ར470བཙུགས་ཡོད་པ་དང་། རྫོང（གྲོང་ཁྱེར）18ལ་ཁྱབ་ཡོད། 

   རྒྱུགས་ཞུགས་སློབ་མ13319འབྲིང་རྒྱུགས་བསྒྱུར་བཅོས་རྗེས་ཀྱི་རྒྱུགས་ལེན་དུ་ཐེངས་དང་པོར་ཞུགས་པ་རེད། དཀར་མཛེས་ཁུལ་གྱི་སློབ་ཆེན་དང་འབྲིང་རིམ་ཆེད་ལས་སློབ་མ་བསྡུ་ལེན་ཨུ་ཡོན་ལྷན་ཁང་གཞུང་ལས་ཁང་གི་ཀྲུའུ་རེན་ཁྲེན་མེ་ཡིས་ངོ་སྤྲོད་བྱས་པར་གཞིགས་ན། ད་ལོར་དཀར་མཛེས་ཁུལ་གྱིས་འབྲིང་རྒྱུགས་ལ་ལེགས་སྒྲིག་གལ་ཆེན་བྱས་ཡོད་པ་སྟེ། རྒྱུགས་ལེན་སྤྱིའི་སྐར་གྲངས850ནས་སྐར་གྲངས750ལ་ལེགས་སྒྲིག་བྱས་པ་དང་། རྒྱུགས་ལེན་བསླབ་ཚན6ནས་བསླབ་ཚན7བར་མང་དུ་བཏང་ཡོད། དེ་སྔོན་གྱི“ཀུན་སྤྱོད་ཁྲིམས་སྐྱོང་དང་ལོ་རྒྱུས”མཉམ་འདུས་རྒྱུགས་ཤོག་དེ“ཀུན་སྤྱོད་ཁྲིམས་སྐྱོང”དང“ལོ་རྒྱུས”གཉིས་ཁེར་རྐྱང་གི་བསླབ་ཚན་གཉིས་སུ་ཕྱེ་ཡོད།       

   རྒྱུགས་ལེན་རིང་ཁུལ་དང་རྫོང(གྲོང་ཁྱེར)རིམ་གཉིས་རྒྱུགས་ལེན་ཨུ་ལྷན་གྱི་མགོ་ཁྲིད་གཙོ་བོས་བརྒྱུད་རིམ་ཧྲིལ་པོར་བཀོད་འདོམས་བྱེད་བཞིན་ཡོད་པ་དང་། སྤྱི་བདེ་དང་གསང་སྲུང་། འཚུབ་བསྟུན་སོགས་སྡེ་ཚན་བརྒྱད་ཀྱིས་མཉམ་འབྲེལ་ལས་དོན་ཚོ་ཆུང་བཙུགས་ནས་ས་ཚུགས་སུ་བཅའ་སྡོད་གཞུང་དོན་སྒྲུབ་པ་དང་། གློག་ཤུགས་དང་འཕྲིན་གཏོང་སྡེ་ཚན་གྱིས་ཆུ་ཚོད24ཡི་འཚུབ་བསྟུན་འགན་སྲུང་ལག་ལེན་བསྟར་བཞིན་ཡོད། རྒྱུགས་ར་ཚང་མར་ཚད་ལྡན་ཅན་གྱི་སྒྲིག་བཀོད་དང་བརྒྱུད་རིམ་ཧྲིལ་པོར་བརྙན་ལམ་ལྟ་སྐུལ་ཚོད་འཛིན་བྱེད་བཞིན་ཡོད། 

ལོ་ཙཱ། རྟ་མགྲིན་རྡོ་རྗེ།

རྩོམ་སྒྲིག་པ། རྟ་མེ།