སྐབས་རེར་སྐྱོ་བའི་ན་བུན་འཐིབས་ཏེ་ཡོང་། །

དངན་པ་རིང་པོར་འབྱིན་པའི་དུས་ཀྱང་ཡོད། ། 

ལན་རེར་སྤྲོ་སེམས་འཕེལ་བའི་གཞས་ཆུང་བླངས། ། 

གདོང་གི་འཛུམ་ལ་མཛེས་སྡུག་འཁྱིལ་བ་ཡོད། ། 

འཚོ་བའི་ངོ་གདོང་འགྱུར་ལྡོག་ཧ་ཅང་མྱུར། ། 

ནང་སེམས་དགའ་སྡུག་དེ་ཡང་རྗེས་སུ་འབྲངས། ། 

རང་གཟུགས་ཆུ་ཟླར་འཆར་བའི་སྣང་བརྙན་ལ། ། 

ཡང་ཡང་བལྟས་ནས་མིག་ཆུ་གཙང་པོར་འདྲེས། ། 

ངལ་བ་འདི་དག་སེམས་ཀྱིས་གདེག་པར་དཀའ། ། 

ལས་ཀྱིས་སྐོས་ཐང་ཞིག་གིས་འགན་དུ་བླངས། ། 

རིང་ནས་གོམས་པའི་བག་ཆགས་མཐུག་པོ་དག ། 

འདི་ནས་བསྐྱུར་ཏེ་དབེན་པའི་ཚལ་ལ་མོས། ། 

འཆི་བ་དྲན་ཚེ་སྐྲག་པས་ལུས་ཀྱང་འདར། ། 

འཆི་ཆོས་མེད་པའི་ས་མཐའི་འཁྱམས་པོ་ང་། ། 

འཚོ་བ་ཐབས་ཆག་ཅིག་གི་ངོ་གདོང་ལ། ། 

ཡང་ཡང་བལྟས་ནས་ལྷག་པའི་ཚུལ་འདི་སྐྱོ། །

སྐྱོ་བའི་གཞས་ཆུང་ངག་ནས་ཤོར་མ་ཐག ། 

མིག་ཆུས་འཇིག་རྟེན་བསྐྲུན་པའི་སྣང་བརྙན་ངོམ། ། 

རྣལ་འབྱོར་མགུར་མའི་འགྱུར་ཁུགས་རེ་རེ་ཡིས། ། 

འཁོར་བའི་ཕྱི་ནང་སྟོན་པའི་གནས་ལུགས་མཐོང་། ། 

ངེས་འབྱུང་རེ་འགའ་སྨུག་སྤྲིན་འཐིབ་པ་འདྲ། ། 

སྐྱེ་ཤེས་ལ་ལ་འཇའ་ཚོན་འཆར་བ་བཞིན། ། 

ངེས་བརྟན་མེད་པའི་སྐྱོ་ཤེས་རེ་རེ་ཡིས། ། 

སེམས་ནས་རྡོལ་བའི་དབྱངས་རྟ་ལེན་དུ་བཅུག ། 

མི་ཡི་གཤིས་ལུགས་འདི་ཚོ་ཁྱད་མཚར་བས། ། 

འདུ་འཛི་འཁོར་བའི་གྲོང་ལ་སུན་སྣང་ཞིག ། 

ཞི་བ་ཐར་བའི་གནས་ལ་སྨོན་འདོད་པས། །

དབེན་པར་འགྲིམ་པའི་བློ་ཞིག་ངང་གིས་འཁོར། ། 

རང་སྣང་བཅོས་མིན་བློ་ཡི་མེ་ལོང་ངོར། ། 

ཞི་བའི་ལྷ་ཚོགས་བྲིས་ནས་རྒྱང་རིང་དུ། ། 

ངེས་མེད་ས་མཐར་འཁྱམ་པའི་འདུན་པ་ཡིས། ། 

ངེས་འབྱུང་ཐོལ་གླུ་སྙན་མོ་དུམ་གཅིག་ལེན། །

རྩོམ་པ་པོ། རྫ་ཤུལ་བློ་བཟང་།

རྩོམ་སྒྲིག་པ། མགར་རྒྱལ་སྲས།