སྤྱོད་གཙང་གི་རྒྱུད་དང་འགྲོགས་པའི་མཐུན་སྒྲིལ་གྱི་མེ་ཏོག་རྐང་གཅིག།

རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་བཟང་པ་སངས་སྒྲོལ་མའི་གནས་ཚུལ་རགས་བཀོད།

   སྤྱི་ཟླ9ཚེས27ཉིན། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན་པེ་ཅིང་དུ་འཚོགས་པ་དང་པ་སངས་སྒྲོལ་མར་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་བཟང་མི་སྒེར་གྱི་གཟེངས་བསྟོད་ཐོབ་པ་རེད།     ཉེ་བའི་ལོ་ཤས་རིང་། མི་རིགས་མཐུན་སྒྲིལ་ལ་སྐུལ་འདེད་དང་སྤྱི་ཚོགས་བརྟན་བརླིང་ལ་སྲུང་སྐྱོང་བྱ་ཆེད། པ་སངས་སྒྲོལ་མས་རང་འདོད་ཀྱིས་མཐུན་སྦྱོར་དང་སྣེ་ཁྲིད་དེ་ཡིག་བསྐུར་ངོ་བཅར་གྱི་ཐེར་ཞུ་བསྐྱར་ཟློས་ཡིག་རིགས་སྣ་ཚོགས་ཐག་གཅོད་བྱས་པ་དང་། ལས་སྒོའི་ཁྱབ་ཁོངས་སུ་མི་གཏོགས་པའི་གནད་དོན་བདག་སྤྲོད་མི་བྱེད་པའི་རྒྱུ་རྐྱེན་ལ་འགྲེལ་བཤད་ཡག་པོ་བརྒྱབ་པ། འབྲེལ་ཡོད་སྡེ་ཚན་དང་མཐུན་སྦྱོར་ཧུར་ཐག་བྱས་ནས་སྒྲུབ་གཉེར་གྱི་བྱེད་པོའི་འགན་འཁྲི་དོན་འཁྱོལ་བྱ་རྒྱུར་སྐུལ་འདེད་བཏང་བ་སོགས་བྱས་པ་རེད། མོས་རང་ཉིད་ཀྱིས་ངེས་པར་དུ་ཏང་དང་མང་ཚོགས་བར་གྱི“སྦྲེལ་ཐག”ཡག་པོ་ཞིག་བྱ་དགོས་པ་ནམ་ཡང་སེམས་ལ་བཟུང་ཡོད། 

   2000ལོའི་དབྱར་ཁར་པ་སངས་སྒྲོལ་མ་སློབ་གྲྭ་ནས་མཐར་ཕྱིན་ཏེ་སྤྱི་ཚོགས་སུ་བསྐྱོད་འགོ་ཚུགས། མོས་སྔ་རྗེས་སུ་སེར་ཤུལ་རྫོང་སློབ་འབྲིང་དང་། སེར་ཤུལ་རྫོང་མི་དམངས་ཞིབ་དཔྱོད་ཁང་། དཀར་མཛེས་ཁུལ་མི་དམངས་ཞིབ་དཔྱོད་ཁང་། དཀར་མཛེས་ཁུལ་སྒྲིག་ཁྲིམས་ཨུ་ལྷན་དང་ཞིབ་བཤེར་ལྟ་སྐུལ་ཨུ་ལྷན་སོགས་སྡེ་ཚན་མང་པོར་སྦྱོང་བརྡར་ཐེབས་ནས་ལས་ཀའི་ཉམས་མྱོང་ཕུན་སུམ་ཚོགས་པོ་བསགས་ཡོད་པ་རེད། ལྟ་སྐུལ་དང་སྒྲིག་ཁྲིམས་ལག་བསྟར་གྱི་འགག་སྒོ་དང་པོ་བརྟན་སྲུང་བྱས་ཏེ་ཏང་དང་མང་ཚོགས་ལ་ཁས་ལེན་བྱས་པའི་ལས་འགན་མོའི་སེམས་ལ་ནམ་ཡང་དམ་པོར་བཟུང་ཡོད། 

    ལས་ཀ་སྒྲུབ་ཚུན་པ་སངས་སྒྲོལ་མས་བོད་རྒྱ་སྐད་གཉིས་དང་སྒྲིག་ཁྲིམས་བཅའ་ཁྲིམས་ཀྱི་ཤེས་བྱ་ཁོང་དུ་ཆུད་པའི་ལེགས་ཆ་གཉིས་འདོན་སྤེལ་གང་ལེགས་བྱས་ནས་གྱོད་གཞི་ཚོ་ཆུང་གིས་སྤྲད་པའི་ཡིག་བསྐུར་ངོ་བཅར་གྱི་ཐེར་འདོན་བདག་སྤྲོད་བྱེད་པའི་ལས་འགན་ཏན་ཏིན་སྒྲུབ་ཡོད། ལྷག་པར་དུ་ལྕགས་ཟམ་རྫོང་དུ“9·5”ས་འགུལ་གྱི་གནོད་འཚེ་བྱུང་རྗེས་མ་སྐུལ་དང་བླངས་ཀྱིས་གནོད་རྗེས་བསྐྱར་སྐྲུན་ལས་དོན་ནང་ཞུགས་རྒྱུའི་རེ་འདུན་ཞུས་ནས་གྲོང་ཚོ་དང་དུད་ཚང་དུ་བསྐྱོད་དེ་གནོད་སྐྱོན་ཐེབས་པའི་སྡོད་ཁང་ཐོ་འགོད་བྱེད་པ་དང་། མང་ཚོགས་ཀྱི་དཀའ་ངལ་ཡོད་པའི་རེ་ཞུ་བསྡུ་རུབ་བྱེད་པ། གནོདཐེབས་མང་ཚོགས་ལ་སེམས་གསོ་བྱེད་པ་སོགས་རང་ཉིད་གང་དུ་མཁོ་ན་དེ་རུ་མཆོངས་ནས་ཅི་འཇོན་གང་འཇོན་གྱིས་ལས་ཀ་བསྒྲུབས་པ་རེད། སྔ་རྗེས་སུ་གཏོར་བཤིག་ཐེབས་པའི་སྡོད་ཁང500ཙམ་ཐོ་འགོད་བྱེད་པ་དང་དེ་གའི་མང་ཚོགས་ཀྱི་རེ་ཞུ 500ལྷག་འཚོལ་བསྡུ་བྱེད་པ། མང་ཚོགས1000ཙམ་ལ་སེམས་གསོ་བཅས་བྱས་ནས་གནོད་འཚེ་ཐེབས་ཡུལ་མང་ཚོགས་ཀྱིས་ཏང་གི་ཐུགས་ཁུར་ཟབ་མོ་ཚོར་ཐུབ་པ་བྱུང་ཡོད། གཞན་ཡང 2017ལོར་མོས་ཆོས་ལུགས་ལས་དོན་ཁྲིམས་ལྟར་བཅོས་སྐྱོང་བྱེད་པའི་ཆེད་དོན་ལས་དོན་ནང་ཞུགས་པ་དང་འབྲེལ་རྒྱལ་ཁབ་ཡིག་བསྐུར་ངོ་བཅར་ཅུས་ཀྱིས་བསྒྲུབ་རྒྱུར་སྤྲད་པའི་ཡིག་བསྐུར་ངོ་བཅར་བསྐྱར་ཟློས་ཀྱི་ཐེར་འདོན་སྙན་ཞུ་སྣེ་ཁྲིད་ནས་སྒྲུབ་གཉེར་བྱས་ཏེ་མི་རིགས་མཐུན་སྒྲིལ་ལ་སྔར་བས་སྐུལ་འདེད་བཏང་བ་དང་སྤྱི་ཚོགས་བརྟན་བརླིང་དང་སྲུང་སྐྱོང་ཡོང་བར་ནུས་པ་ཆེན་པོ་ཐོབ་ཡོད། 

    དུས་རྒྱུན་གྱི་ལས་ཀ་དང་འཚོ་བའི་ཁྲོད་མོས་ཏང་གི་རིགས་པའི་གཞུང་ལུགས་དང་བྱེད་ཕྱོགས། སྲིད་ཇུས། སྒྲིག་བཤེར་ལྟ་ཞིབ་ཀྱི་ལས་སྒོའི་ཤེས་བྱ་བཅས་ལ་སློབ་སྦྱོང་ཧུར་ཐག་བྱས་པ་དང་། རང་གི་མཐའ་འཁོར་གྱི་ཉམས་མྱོང་ཕུན་སུམ་ཚོགས་པའི་བློ་མཐུན་རྒན་གྲས་ཀྱི་ཡོན་ཏན་ལ་ཁེངས་སྐྱུང་སྒོས་སློབ་སྦྱོང་བྱས་ཏེ་རང་ཉིད་ཀྱི་ཤེས་རྒྱ་དང་མཐོང་རྒྱ་ཆེ་རུ་གཏོང་བར་མ་ཟད། ལས་སྒྲུབ་ཆུ་ཚད་ཇེ་མཐོར་ཕྱིན་ཡོད། 

    པ་སངས་སྒྲོལ་མར་ལས་ཀའི་ཁྲོད་བརྗེད་དཀའ་བའི་བྱ་བ་མི་ཉུང་བ་ཞིག་འཕྲད་ཡོད། 2019ལོའི་ཉིན་ཞིག་ལ། མོའི་གཞུང་ལས་ཁང་དུ་ལྕགས་ཟམ་རྫོང་ནས་ཡོང་བའི་རྨོ་མོ་ཞིག་ཐོན་། ཡིག་བསྐུར་ངོ་བཅར་ཐེར་འདོན་བྱས་ཚར་རྗེས། པ་སངས་སྒྲོལ་མས་རྨོ་མོར་རླངས་འཁོར་གླ་རིན་སྒོར100བྱིན་ཡོད། ཉིན་ཁ་ཤས་སོང་རྗེས་རྨོ་མོ་དེས་ཁོང་ལ་ཆེད་དུ་རང་ཉིད་ཀྱིས་བསྙལ་བའི་རི་སྐྱེས་ཤིང་འབྲས་ཁུ་བ་བསྐྱལ་དུ་ཡོང་བ་རེད། ལས་ཀའི་སྒྲིག་ལམ་གྱི་རྐྱེན་གྱིས་ཁོས་རྨོ་མོའི་ཤིང་འབྲས་ཁུ་བ་མ་ལེན་མོད། འོན་ཀྱང་མོའི་སེམས་ནང་དྲོད་ཁོལ་ཟབ་མོ་ཞིག་སྐྱེས་ཡོད། ད་དུང་ཐེངས་ཤིག་ལ་པ་སངས་སྒྲོལ་མའི་གཞུང་ལས་ཁང་དུ་སྡེ་དགེ་རྫོང་དཔེ་ཡག་ཡུལ་ཤོག་གཟི་ཁོ་གྲོང་སྡེ་ནས་ཡོང་བའི་གྲོང་ཚོའི་རྩྭ་རིན་ནགས་རིན་དང་གྲོང་ཚོའི་ཐུན་མོང་མ་དངུལ་སྤྱོད་ཚུལ་ཡོངས་བསྒྲགས་མི་བྱེད་པ་སོགས་ཀྱི་གནད་དོན་ཐེར་འདོན་བྱས་པའི་རྒན་རྒོན་ཞིག་ཐོན། མོས་དོ་དམ་གྱི་དབང་ཚད་ལྟར་འབྲེལ་ཡོད་དཔྱད་ཡིག་འཕྲལ་མར་ལེགས་སྒྲིག་བྱས་ཏེ་སྡེ་དགེ་རྫོང་སྒྲིག་ཁྲིམས་ཨུ་ལྷན་དང་ལྟ་སྐུལ་ཞིབ་བཤེར་ཨུ་ལྷན་ལ་བརྒྱུད་སྤྲོད་བྱས་པ་དང་འབྲེལ་ཡིག་བསྐུར་ངོ་བཅར་དེ་ཐག་གཅོད་བྱ་རྒྱུར་རྗེས་འདེད་སྐུལ་འདེད་བཏང་ཡོད། ཞིབ་དཔྱད་བསྡུར་བཤེར་བྱས་པར་བརྒྱུད། རྒན་རྒོན་གྱི་གནས་ཚུལ་དེ་དོན་དངོས་ཡིན་པས། སྡེ་དགེ་རྫོང་སྒྲིག་ཨུ་དང་ལྟ་ཞིབ་ཨུ་ལྷན་གྱིས་གྲོང་ཚོ་དེའི་ཏང་ཀྲི་པུའུ་ཧྲུའུ་ཅིར་ཏང་ནང་གི་ཐ་ཚིག་སྒྲོག་པའི་ཆད་པ་བཅད་ཡོད། 

    པ་སངས་སྒྲོལ་མས་གཞི་རྩའི་ལས་དོན་ལེགས་པོ་སྒྲུབ་པར་ཕུད། མོས་ད་དུང“མཐུན་སྒྲིལ་གྱི་ལམ་བུའི་ཐོག་བསྐྱོད། བདེ་སྐྱིད་ཀྱི་མེ་ཏོག་མཉམ་དུ་བཞད”ཅེས་པའི་འདུ་ཤེས་ཕྲུ་གུ་ཚོའི་སེམས་སུ་འཐིམ་པར་འབད། གྲོང་ཚོ་ནས་ཕྱིར་ཕྱོགས་སུ་འགྲོ་མཁན་སྔ་ཤོས་ཀྱི་སློབ་གྲྭ་ཆེ་མོ་བ་པ་སངས་སྒྲོལ་མས་རང་ཉིད་ཀྱི་ཕ་ཡུལ་བརྗེད་མེད་ཅིང་། མོས“རང་ཉིད་ཞིང་འབྲོག་པའི་ཁྱིམ་ཚང་ནས་ལས་གནས་ཐོག་བསྐྱོད་ཐུབ་པ་དེ་ནི་ཡུལ་མི་ཚོའི་གཅེས་སྐྱོང་དང་རྒྱབ་སྐྱོར་ལ་ཁ་འབྲལ་ཐབས་མེད་ལ། ཏང་གི་སློབ་གསོ་དང་གསོ་སྐྱོང་ལས་དེ་བས་འབྲལ་ཐབས་མེད”ཅེས་རྟག་ཏུ་ཤོད་ཀྱི་ཡོད། དེས་ན་མོས་གུང་གསེང་སོགས་ཀྱི་དུས་ཚོད་བེད་སྤྱད་ནས་ཕ་ཡུལ་སེར་ཤུལ་རྫོང་བཙན་མདའ་ཡུལ་ཤོག་དགོན་སྲུང་གྲོང་ཚོར་ལོག་ནས་ཕྲུ་གུ་ཚོར་ཟུར་ཁྲིད་བྱས་དང་བྱེད་བཞིན་ཡོད། དགོན་སྲུང་གྲོང་ཚོའི་ཞིང་འབྲོག་མང་ཚོགས་ཀྱི་རིག་གནས་ཆུ་ཚད་མཐོ་པོ་མེད་པ་དང་ཕྲུ་གུ་ཚོར་སློབ་སྦྱོང་བྱེད་པར་ཟུར་ཁྲིད་བྱ་རྒྱུ་ནི་ཡུལ་མི་མི་ཉུང་བ་ཞིག་ལ་མཚོན་ན་འཕྲལ་ཕུགས་གཉིས་ཀར་ཕན་ཐོགས་པའི་གནད་དོན་ཆེན་པོ་ཞིག་རེད། དེ་ནས་པ་སངས་སྒྲོལ་མས་ལས་ཞོར་དུས་ཚོད་སྤྱད་དེ་གྲོང་ཚོའི་ཕྲུ་གུ40ཙམ་ལ་སློབ་ཚན་ཟུར་ཁྲིད་བྱས། 2020ལོར་མོ་དང་ནང་མི་ཚོས་འགྲོ་སོང་བཏང་ནས་ཕྲུ་གུ་ཚོར་སློབ་ཁང་སྨི་གྲུ་བཞི་མ70ཙམ་ཡོད་པའི་སློབ་ཁང་དང་སྨི་གྲུ་བཞི་མ50ཙམ་ཡོད་པའི་དཔེ་དེབ་ཁང་ཞིག་བསྐྲུན་ནས་ཕྲུ་གུ་ཚོར་སློབ་སྦྱོང་ཟུར་ཁྲིད་བྱ་གནས་ཤིག་བསྐྲུན་ཡོད། པ་སངས་སྒྲོལ་མས“ང་ནི་གྲོང་ཚོ་འདི་ནས་འཚར་ལོངས་བྱུང་བ་ཡིན། ཡུལ་མི་ཚོའི་ཆེད་དུ་ལས་ཀ་ཏོག་ཙམ་བྱེད་ཐུབ་པས་ངའི་སེམས་ཧ་ཅང་དགའ་པོ་འདུག”ཅེས་བཤད། 

    བརྩོན་འགྲུས་བྱས་ན་མི་འགྲུབ་ཅི་ཡང་མེད་ཅེས་པའི་དཔེ་ལྟར། ད་ཆར་མོ་ནི་དཀར་མཛེས་ཁུལ་སྒྲིག་ཨུ་ཞིབ་བཤེར་ཨུ་ལྷན་དཀར་མཛེས་འཐབ་ཕྱོགས་གཅིག་གྱུར་པུའུ་རུ་བཅའ་སྡོད་བྱེད་པའི་སྒྲིག་ཁྲིམས་ཞིབ་བཤེར་ལྟ་སྐུལ་ཨུ་ལྷན་གྱི་ཚོ་དཔོན་གཞོན་པ་དང་། རིམ་པ་གཉིས་པའི་ལྟ་ཞིབ་དཔོན་པོ། སི་ཁྲོན་ཞིང་ཆེན་ཡིག་བསྐུར་ངོ་བཅར་ལས་དོན་གྱི་སྔོན་ཐོན་མི་སྒེར་དང་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་མི་སྒེར་གྱི་མཚན་སྙན་ཐོབ་མཁན་ཡང་ཡིན་པ་རེད། 

    པ་སངས་སྒྲོལ་མས“རང་ཉིད་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན་ནང་ལ་ཞུགས་ཐུབ་པ་ནི་ཅི་འདྲའི་བསོད་ནམས་ཆེན་པོ་རེད་འདུག། མཚན་སྙན་དེ་ནི་ཏང་དང་མི་དམངས་ཀྱིས་ང་ལ་གནང་བ་ཞིག་རེད། རྒྱལ་ཡོངས་མི་རིགས་མཐུན་སྒྲིལ་ཡར་ཐོན་དཔེ་བཟང་མི་སྒེར་གྱི་གཟེངས་བསྟོད་ཐོབ་པ་ནི་ང་ལ་མཚོན་ན་གཟི་བརྗིད་ཆེན་པོ་ཞིག་ཡིན། དེ་ནི་རང་ཉིད་ཐེབས་པའི་སྐུལ་ལྕག་ཡིན་ལ་འགན་འཁྲི་ཡང་ཡིན”ཞེས་བཤད། པ་སངས་སྒྲོལ་མས་དུས་དང་རྣམ་པ་ཀུན་ཏུ་ཐོག་མའི་བསམ་འདུན་མ་བརྗེད་པར་དཀར་མཛེས་ཁུལ་གྱི་མིའི་རང་གཤིས་མི་བརྗེད་པར་བྱས་ཏེ་སྤྱིར་བཏང་གི་ལས་གནས་ཐོག་འགན་འཁྲི་འཁུར་ཕོད་པ་དང་། མི་རིགས་མཐུན་སྒྲིལ་གྱི་རྒྱང་སྐྱོད་ལམ་བུའི་ཐོག་མིག་དཔེ་དང་སྣེ་ཁྲིད་ཀྱི་ནུས་པ་མུ་མཐུད་དེ་འདོན་རྒྱུ་དང་། རང་ཉིད་ཀྱི་བྱ་སྤྱོད་དངོས་ལ་བརྟེན་ནས་ཉེ་འགྲམ་གྱི་མི་ཚང་མར་སེམས་འགུལ་ཐེབས་སུ་འཇུག་རྒྱུ་དང་། རིགས་ཁག་གི་མི་རིགས་མཐུན་སྒྲིལ་གྱི་བྱེད་སྒོའི་ནང་ཧུར་ཐག་ཞུགས་པ། མི་རིགས་ཁག་བར་གྱི་འགྲོ་འོང་དང་སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བ་བཅས་བྱས་ཏེ་མི་རིགས་མཐུན་སྒྲིལ་གྱི་མེ་ཏོག་དཀར་མཛེས་ཁུལ་གྱི་ས་གཞི་ཆེན་མོར་སྔར་བས་རྣམ་པ་བཀྲ་བར་བཞད་ཐུབ་ངེས་རེད་ཅེས་བཤད་པ་རེད།།

སྐལ་བཟང་རྒྱ་མཚོས་བྲིས།

རྩོམ་སྒྲིག་པ། མགར་རྒྱལ་སྲས།