སྤྲིན་ནག་ལྡང་བའི་ཤུལ་ན་གློག་ཞགས་མེད་ཅིང་།། 

 གྲུ་ཆར་འཇོ་བའི་རྗེས་སུ་འཇའ་ཚོན་དབེན་པ།། 

 དབྱར་གཞུང་ནམ་ཟླ་ཡལ་བའི་སྟོན་གྱི་དུས་འདི།། 

 དྲན་པའི་ཀློང་དུ་འཁོར་ན་ཞེ་རེ་སྨྲེང་ཨང་།། 

 སྔོ་ལྗང་སྤང་ཁའི་ཁ་དོག་གང་དུ་ཡལ་བས།། 

 རི་དྭགས་རྩྭ་ཆུ་འཛོམས་པའི་རྩེད་འཇོ་མི་མཐོང་།། 

 མེ་ཏོག་ལང་ཚོ་རྒས་པའི་སྟོན་གྱི་དུས་འདིར།། 

 གཡུ་སྦྲང་བུང་བ་མ་བཞུགས་གང་དུ་ཕེབས་སམ།། 

ཁུ་བྱུག་མོན་ཡུལ་ལོག་པས་འཇོལ་མོ་སྐྱོ་ཨང་།། 

སྤང་ལྗོངས་མཛེས་སྡུག་ཡལ་བས་བདག་ཡིད་མུག་སོང་།། 

སྡོང་ལོ་ས་རུ་ཐོར་བའི་སྟོན་གྱི་དུས་འདིར།། 

ང་དང་འཇོལ་མོའི་སྐྱོ་གདུང་སུ་ཡིས་སེལ་ཨང་།། 

མཚན་དགུང་རླུང་འཚུབ་ལྡང་བས་སྐར་ཚོགས་འདར་བྱུང་།། 

ལྷ་ལམ་ཟླ་བ་མཐོང་ཡང་སྐྱོ་སྣང་འདྲེན་ཡོང་།། 

ཡོད་ཚད་གདུང་བ་འདྲེས་པའི་སྟོན་གྱི་དུས་འདིར།། 

སེམས་ཆུང་ངུ་བའི་ཟུག་གཟེར་ཇི་ལྟར་བཟོད་ཨང་།། 

སྤང་གཞུང་ནོར་གྱིས་ཁེངས་རུང་མིག་དབང་མི་འཕྲོག། 

ལུག་ཁྱུའི་འབའ་སྒྲ་མོད་རུང་ཡིད་སེམས་མི་བསྒུལ།། 

སུན་སྣང་ན་བུན་སྟུག་པའི་སྟོན་གྱི་དུས་འདིར།། 

ཕྱི་ནང་གང་ལ་བལྟས་རུང་སྐྱོ་ཉམས་ཆེ་བ།། 

སྤྲིན་དཀར་ཚོམ་བུ་ཚོམ་བུར་རྒྱུ་བའི་དབུས་ནས།། 

ཉི་ཟེར་ས་རུ་འཕྲོས་པ་དྲོད་འཇམ་མིན་པས།། 

སྤང་ལ་བ་མོ་ཆགས་པའི་སྟོན་གྱི་དུས་འདིར།། 

གྲང་ངད་དལ་གྱིས་བསླེབས་པས་སེམས་པ་འཁྱག་སོང་།། 

དཔྱིད་ཀྱི་དཔལ་ཡོན་བསུ་དུས་སྣང་བ་སྐྱིད་ཨང་།། 

དབྱར་གྱི་མཛེས་སྡུག་རོལ་དུས་སྤྲོ་བས་ཁེངས་ཡོང་།། 

དགུན་ཟླ་རིང་མོ་བསུས་པའི་སྟོན་གྱི་དུས་འདིར།། 

སེམས་ཆུང་སྨྲེང་བའི་གླུ་འདི་ངང་གིས་ཤོར་སོང་།།

རྩོམ་པ་པོ། དམར་ཁ་ཚ།

རྩོམ་སྒྲིག་པ། མགར་རྒྱལ་སྲས།