ད་ལྟ་སྟོན་ཟླ་སླེབས་ནའང་། 

ང་རང་ད་དུང་དཔྱིད་ཀའི་པང་དུ་ཡོད། 

མེ་ཏོག་གི་དྲི་བསུང་དང་མཉམ་དུ་ཡོད། 

སྦྲང་མའི་གཤོག་འགྱུར་དང་ལྷན་དུ་ཡོད། 

ཁུ་བྱུག་ཡུལ་ལ་ལོག་ཚར་བས། 

ད་ལྟ་དཔྱིད་ཀ་ཁེར་རྐྱང་དུ་གྱུར། 

ཁེར་རྐྱང་གི་དུས་ཚོད་ནང་། 

རང་ཉིད་ཀྱིས་ཁ་དོག་ཀྱང་བོར་འདུག། 

སྟོན་ཁ་ནི་ཡུན་རིང་བྲལ་བའི་ཆུང་འདྲིས་ཤིག་ཡིན་ནམ། 

ཡང་ན་ཆུང་འདྲིས་དང་སྟོན་ཁ་གཉིས་འབྲེལ་བ་ཅི་ཞིག་ཡོད་དམ། 

སྟོན་ཁ་ཁོ་ན་མ་ཡིན་ཏེ། 

དགུན་ཁའང་ང་རང་ཁེར་རྐྱང་དུ་གཏོང་མཁན་ཞིག་ཏུ་གྱུར། 

སྟོན་ཁའི་ལོ་མ་ཐར་ཐོར་འདིས། 

བདག་སུ་ཞིག་དང་ཁ་བྲལ་བའི་རྣམ་པ་དེ་མཚོན། 

ལས་དབང་ཞིག་གིས་ཅིས་ཀྱང་ཁ་བྲལ་དགོས་པ་འདི། 

ངས་སུ་ལའང་འཁར་ར་བྱེད་ན་མི་འདོད།

རྩོམ་པ་པོ། དུ་སྤྲིན།

རྩོམ་སྒྲིག་པ། མགར་རྒྱལ་སྲས།