ཞོགས་པར་ཡར་ལངས་དུས།

སའི་གོ་ལའི་གདོང་ལ་འཛུམ་གྱིས་ཁེངས་ཏེ།

སྤྲོ་ཉམས་ཤིག་དང་ལྷན་དུ།

དལ་བུར་ཤར་དུ་སྐྱོད་ཀྱིན་འདུག།

ང་རང་ཉི་མའི་སྟེང་དུ་ཙོག་ནས།

ལག་སྙོབ་ཅིག་བྱས་ཏེ།

སྐར་མ་ལྔ་བཟུང་རྗེས།

ལྷོད་འཇགས་ངང་འབའ་རྩེད་ཞོར།

སའི་གོ་ལའི་རྗེས་སུ་བལྟས་བསྡད།

ཟླ་བས་མིག་ཆུ་འདོན་ཞོར།

སའི་གོ་ལའི་རྗེས་སུ་བརྒྱུགས་ཏེ།

ང་གཅིག་པུ་བར་སྣང་སྟོང་པ་འདིར་མ་བསྐྱུར་ཞེས།

ཇི་ལྟར་ངུས་ཀྱང་། ཇི་ལྟར་བརྒྱུགས་ཀྱང་།

སའི་གོ་ལ་ཧོན་ལོག་མ། ཧོན་འཐོར་བ་བཞིན།

འདང་རྒྱག་ཅི་ཡང་མེད་པར་ཤར་དུ་ཆས་སོང་།

མུ་མཐུད་དུ་སོང་ནས།

རྒྱུ་སྐར་མང་པོ་ཞིག་གི་གསེབ་ཏུ་ཐོན་དུས།

ཕན་ཚུན་གྱི་འགུག་ཤུགས་ཀྱང་མེད་པར་གྱུར་ཏེ།

ཟླ་བས། རང་གི་མིག་ཆུ་ཕྱིས་རྗེས།

སླར་ཡང་རྒྱུ་སྐར་གཞན་ཞིག་ལ་བསྐོར་བ་བྱས་བྱུང་།

སོང་སོང་རྗེས། སའི་གོ་ལ།

ནག་ཁུང་ཆེན་པོ་ཞིག་ཏུ་འཛུལ་སོང་།

ང་ཡང་ཁོའི་རྗེས་བསྙེགས་ནས་ནང་དུ་འཛུལ།

གནོན་ཤུགས་གང་ཞིག་གིས་བཙན་གྱིས་བཙུར་ནས།

ངའི་གློ་བ། ངའི་སྙིང་། ངའི་མཆིན་པ།

ན་ཟུག་གིས་གདུང་བས་གཟིར་ཞིང་།

དོན་ལྔ་སྣོད་དྲུག་ལ་འགས་གཏོར་ཐེབས།

མིག་གཉིས་ཕྱི་རུ་ཕྱུང་།

དེ་གཉིས་ཀྱང་བྱེ་མར་བཏགས།

དབུགས་འཚང་འཚང་དང་།

རྔུལ་ཆུ་འཛགས་འཛགས་ཀྱིས།

ང་རང་སད་པར་བྱས།

འོ། མ་གཞི་དེ་ནི་རྨི་ལམ་ཞིག་གོ།