རྒྱང་རིང་ཕ་ཡུལ་ཕྱོགས་ནས།།

གཏམ་ངན་རླུང་གིས་ཁུར་ཡོང་།།

རིགས་དང་རུས་པ་གཅིག་པའི།།

གཅེན་མོར་ཆས་ཚུལ་ཁུར་ཡོང་།།

མ་གཅིག་སྤུན་མཆེད་མིན་ཡང་།།

རུས་མདངས་མ་ལས་ལྷག་སོང་།།

ཤ་དང་རུས་པའི་བར་ན།།

རྐང་དང་ལྷ་བ་གསོན་ཡོད།།

སྙུན་གཞི་འཇོག་ཡུན་རིང་པས།

སྨན་གྱིས་གསོ་ཐབས་མ་བྱུང་། །

འཆི་བདག་མདུན་དུ་སླེབས་པས།།

ལུས་པོ་རང་དབང་མ་བྱུང་།།

ན་ཟུག་ལུས་ཀྱི་མྱངས་ཏེ།།

གསོན་པའི་བསྐལ་པ་མེད་སོང་།།

ཤེས་པ་ལུས་དང་བྲལ་ནས།།

བར་དོའི་འཕྲང་ལམ་འགྲིམས་སོང་།།

སྐད་ཅིག་ཆས་པ་སྔ་སོང་།།

ལས་འཁྱུར་ངལ་གསོ་འགྱངས་སོང་།།

ལས་གྲོགས་གཏན་བྲལ་གནང་སོང་།།

ནང་མིར་སྐྱོ་བ་བསྐྱུར་སོང་།།

གཅེན་མོ་བཞུད་པ་སྔ་པས།།

ཡ་ཆུང་སྡུག་གིས་ཁེངས་སོང་།།

སྡུག་ལ་དྭངས་མཐའ་མེད་སོང་།།

མིག་མཐར་མཆི་མས་གང་སོང་།།

འཇིག་རྟེན་ས་ཁམས་ཡངས་ཀྱང་།།

བགྲོད་པའི་ལམ་ཞིག་མ་རྙེད།།

འཆི་བ་ལུས་ཀྱི་མྱངས་ཏེ།།

ཁྱིམ་མི་གཏན་དུ་གྱེས་སོང་།།

སྐྱེས་ནས་ལང་ཚོ་རྒྱས་ཏེ།།

རྒྱས་ནས་ན་ཚོད་རྒས་ཏེ།།

རྒས་ནས་འཆི་ལམ་བསྙེགས་པ།།

འགྲོ་བ་ཡོངས་ཀྱི་ལམ་རེད།།

མ་རྒས་དར་མའི་དུས་ལ།།

གཅེས་སྲོག་ནད་ཀྱིས་བཅོམ་ན།།

ཆོས་རྒྱལ་ཁྲིམས་མེད་མཐོང་ཡོང་།།

སྨན་རྒྱལ་ནུས་མེད་བསམ་ཡོང་།།

མི་རྟག་འཆི་བས་ཟིན་ན།།

ཕན་པ་དགེ་ལས་མི་འདུག།

ལས་ཀྱི་རླུང་རྟ་ཆག་ན།།

སྐྱབས་གནས་ཆོས་ལས་མི་འདུག།

མ་ཎི་ཡིག་དྲུག་མགུར་དབྱངས།།

འདས་པོའི་རྣ་བར་སྙན་ཡང་།།

གཏན་བྲལ་མཇལ་མེད་བསམས་ན།།

བདག་གི་རྣ་བར་གཟན་བྱུང་།།

སྐྱབས་གནས་དཀོན་མཆོག་གསུམ་པོར།།

བརྒྱ་མཆོད་སྟོང་མཆོད་བཤམས་ཡོད།།

མ་གྱུར་འགྲོ་བ་ཡོངས་ལ།།

བདེ་སྡུག་བཏང་སྙོམས་སྒོམ་ཡོད།།

ཀྱེ་མ་འགྲོ་བའི་མགོན་པོ།།

རྣམ་ཤེས་བར་དོར་འཁྱམས་ན།།

བདེ་བའི་ལམ་ཞིག་གནངས་ཏེ།།

བདེ་བ་ཅན་དུ་འཁྲིད་ཅིག།