གྲྭ་ཤག་གི་ནང་ནས་ཕྱིར་བུད་དེ།

རྒྱ་ཕིབས་ལ་མིག་ཟུར་ཅེར་ཐེངས་རེར།

རང་གི་གྲྭ་ཤག་རང་གི་སྲུང་བ་དེའོ།།

ངས་རྒྱ་ཕིབས་ཀྱི་ཁ་ཕྱོགས་རྙེད་ཀྱི་མེད་ནའང་།

དབེན་གྲོང་དང་ཉམ་ཉེས་པ་དེ་དག།

འཇིག་ཉེན་དང་ཕམ་ཁ།

མ་འོངས་པར།

གསེར་མདོག་གི་རྒྱ་ཕིབས་ལས་ལོགས་སུ།

དྭངས་གཙང་ངམ་མཐར་ཐུག་ཅིག།

དབེན་གྲོང་འདིར་གཏན་ནས་མེད་ཚོད།

བློར་བཟུང་མྱོང་བའི་གཞུང་ཆེན་ཁག་གི་རྩ་བ་དང་

དོགས་གནས་དག།

རིམ་བཞིན་བརྗེད་ཀྱིན་འདུག།

འོན་ཀྱང་། རྒྱ་ཕིབས་ཀྱི་གདགས་གཞི་ཆར་ནང་གི་

རི་མོ་བཞིན་བསུབས་ཏེ།

ཏོག་དང་ཟུར་ངོས་ནས་རེ་རེ་བཞིན་ཕྲལ་ནས།

ཆ་ཤས་ཡང་ཤས་བྱས་མཐར།

ཁྱོད་ནི་བྲིས་མི་ཚར་བའི་སྙན་ངག་ཅིག།

ཁྱོད་ནི་གླེང་མི་ཐུབ་པའི་གཞུང་བརྒྱའི་དཀའ་གནད་ཅིག།

ང་ནི་ནམ་ཡང་རྒྱ་ཕིབས་ཀྱི་འོག་ཏུ་ཙོག་པུར་སྡོད་འོས།

མི་ལུས་གསེར་གྱི་རྟེན་བཟང་གི་རིན་ཐང་ཁྱོད་ཀྱི་འོག་ནས་ཤེས།

མི་རྟག་པའི་ངོ་བོ་ཁྱོད་ཀྱིས་གསལ་བར་བྱས།

མུན་པའི་ཀློང་ཡངས་པོའི་ཕ་རོལ་ནས།

ཁྱོད་ཀྱི་བཀྲག་མདངས་ཟ་ཟི་ཞིག་ཏུ་གྱུར་ཀྱང་།

བྱམས་བརྩེ་དང་བདེན་པའི་མེ་ཕུང་གིས་ཁྱོད་ཀྱི་བཀྲག་

མདངས་འོད་དུ་འཚེར།