དྲན་དང་དྲན་བཞིན་པའི་ཨ་ཕ་ལགས།

ཁྱེད་ཀྱིས་མི་ཚེ་ཞིག་གི་གཏམ་རྒྱུད་ས་ལ་བྲིས་ནས།

མི་ཚེ་ཞིག་གི་ཞེན་ཆགས་ནམ་མཁར་གཏོར་ཏེ།

རྒྱང་རིང་རྒྱང་རིང་ཞིག་ལ་ཆས་སོང་བས།

ང་ཚོའི་གྲང་ཤུར་ཤུར་གྱི་སེམས་པ་དང་སྐྱོ་སྡུག་གི་མཆི་མ།

གསེར་མདོག་གི་མཆོད་རྐོང་ནང་དུ།

མར་ཁུ་བཞིན་ལྟེམ་མེར་འཁྱིལ་འདུག།

དྲན་དང་དྲན་བཞིན་པའི་ཨ་ཕ་ལགས།

ཉིན་དེའི་ཕྱི་དྲོ་དེ་ནས་བཟུང་སྟེ།

གཞིས་ཁྱིམ་གྱི་དྲོལ་ཁོལ་བོར་བའི་ངེད་མ་བུ་ཚོས།

མིག་ཆུ་ཡི་མཚོ་མོ་བསྐྱིལ་ནས། ངུ་ངག་གི་བྲག་ཅ་བསྐྱིལ་ནས།

ཕ་ཡུལ་དང་ཡུལ་མི་ཚོའི་ལྷིང་འཇགས་དཀྲོགས་སོང་།

དྲན་དང་དྲན་བཞིན་པའི་ཨ་ཕ་ལགས།

དབྱར་ཟླ་ཡིན་ཡང་འཁྱགས་སིབ་སིབ་ཀྱི་ཉིན་འདི་ཚོར།

ང་ཚོས་ཚ་བསུར་དང་མཆོད་མེ་ཡི་ཀློང་ནས།

མ་ཎི་དང་སྐྱབས་འཇུག་གི་ཁྲོད་ནས།

མིག་ཆུ་དང་སྐྱོ་གདུང་ལས་གཞན་ཅི་ཡང་མེད།

དྲན་དང་དྲན་བཞིན་པའི་ཨ་ཕ་ལགས།

དེ་ལྟར་བསམ་དབང་དྲན་དབང་མེད་པའི་བཞུད་སྟངས་དེས།

ང་ཚོར་རི་བོ་ལས་ལྕི་བའི་སེམས་ངལ་བསྐྱུར་བྱུང་།

མཚོ་མོ་ལས་ཟབ་པའི་སྡུག་བསྔལ་བསྩལ་བྱུང་།

གང་ལྟར། ཡོད་ཚད་ཀྱི་ཡོད་ཚད་མིག་ཆུས་བརླན་བྱུང་།

དྲན་དང་དྲན་བཞིན་པའི་ཨ་ཕ་ལགས།

གང་ལྟར་ཀྱང་།

ང་ཚོས་རང་ཉིད་ཀྱི་སེམས་པ་འཁྱགས་པོ་དེ།

མཆོད་རྐོང་རེ་རེའི་ནང་ཁུ་སིམ་མེར་མེ་རུ་སྒྲོན་བཞིན་ཡོད།

མ་ཎིའི་དབྱངས་རྟ་ཁྲོད་སྐྱོ་ལྷང་ངེར་རླུང་ལ་སྐུར་བཞིན་ཡོད།