དབྱར་གྱི་འདབ་ལོ་གཡུ་ཡི་ལྗང་མདོག་ཅན། ། 

སྟོན་ཁའི་ནམ་ཟླ་དལ་བུར་བྱུང་བའི་ལྷན། ། 

རླུང་གིས་འདབ་ལོ་ཐང་དུ་སྤུར་བཞིན་དུ། ། 

སྟོན་ཁའི་དུས་ཚིགས་རོལ་བའི་རྣམ་པ་སྟོན། ། 

རྩྭ་སྐྱ་འཇག་མ་རི་ལུང་ཐང་དུ་འདེད། ། 

ང་དང་བྱེའུ་ཆུང་འཇོལ་མོས་སྨྲེང་བའི་སྐད། ། 

ཐང་ཆེན་སྤང་གི་ངོགས་ཀྱི་དགའ་ཚལ་ན། ། 

སྒྲོག་པའི་རྣ་ལ་གཟན་བཞིན་ཚོར་བ་ཡིས། ། 

ང་དང་སྙན་ངག་གཉིས་ཀྱི་སྟ་གོན་བརྩོན། ། 

ལྕུག་ཕྲན་སྨྱུག་མའི་ལྡེམ་ལྡེམ་ལམ་འགྲམ་ན། ། 

འདབ་ལོས་ཉི་གྲིབ་གཡོ་བའི་ངང་ཚུལ་འོག ། 

སྟོན་ཁའི་འདབ་ལོ་ཐང་དུ་འཐོར་བའི་ཟུར། ། 

འདབ་ལོ་སྐྱ་བོས་ལམ་གྱི་གདན་དུ་བཏིངས། ། 

རླུང་བུ་བསིལ་བསེར་ཕ་གི་རི་སྒང་ནས། ། 

ལྡང་བའི་སྟོན་མཇུག་ཚོར་བ་མྱོས་པའི་ལྷན། ། 

དབྱངས་ལ་བསྡེབས་ཏེ་མི་སེམས་སྒུལ་ལ་ཡོད། ། 

རྔ་ཡབ་ཕང་ཕུང་ཕྱི་ཤུན་བརྗེ་བའི་དུས། ། 

ཁ་དོག་འགྱུར་བཞིན་སྟོན་ཁའི་ནང་རོལ་ན། ། 

ཚོར་བས་ལུས་སེམས་བ་སྤུ་ཅི་ཡང་རེག ། 

ང་དང་ཚོར་བ་གཉིས་ཀྱི་ཟློས་གར་འཁྲབ། ། 

ལྗོན་ཤིང་སྡོང་ལོ་འདབ་མའི་ཡངས་སྟེང་ན། ། 

བྱ་བྱེའུས་སྐད་ཅོར་སྒྲོག་བཞིན་འདབ་སྟེང་ནས། ། 

སྟོན་ཁའི་གྲང་རླུང་མནར་བས་བྱེའུ་ཆུང་གིས། ། 

ལུས་ཕུང་འདར་བཞིན་གཉའ་བ་ཐུར་དུ་དུད། ། 

ལྷག་ཏུ་ད་ལོའི་སྟོན་ཁའི་དུས་ཚིགས་འདི། ། 

བཞུར་པར་ཧ་ཅང་མགྱོགས་པའི་འཕྲུལ་རྟ་བཞིན། ། 

ཚོར་བའི་ལུས་སེམས་བཟི་ནས་སྣང་བའི་ངོགས། ། 

ཅི་ཡང་འཆར་ཡན་མང་བའི་ཚོར་བ་ཟབ། ། 

ཤ་གནའ་དགོ་གསུམ་བཟས་ལ་བྲེལ་ན་ཡང་། ། 

སྟོན་ཁའི་རྩྭ་སྐྱ་རི་ལུང་དབེན་བཞིན་ན། ། 

རི་དྭགས་རྫ་འདབས་སྟོད་སྨད་གཡོ་བའི་ལྷན། ། 

གོམ་ཁ་ཉམས་བཞིན་སྐྱོ་བའི་སེམས་སུ་བདོ། ། 

སྟོན་མཇུག་ཚོར་བ་ཡལ་བའི་ནམ་ཟླ་ནས། ། 

ཚོར་བས་འདེད་པའི་སེམས་ཀྱི་སྣང་ངོ་ལ། ། 

འཆར་ཡན་རྩེན་པའི་ཚོར་འདུ་བཞིན་རས་ལས། ། 

བྱུང་བའི་ཚོར་གསོན་སྣ་མང་འདི་ནས་བརྗོད། ། 

སྙན་པའི་དབྱངས་འགྲོས་ཇི་ལྟར་ཞན་ན་ཡང་། ། 

སྙན་ངག་ཞེན་པའི་འཁྲེང་སེམས་ཡུན་ནས་གསོས། ། 

དབྱངས་གསལ་ཟློས་གར་འཁྲབ་པའི་གསང་མདོ་ནས། ། 

སྟོན་མཇུག་ཚོར་སེམས་འདི་མོ་བགྲོ་བ་ཡིན། ། ༼ སྙན་རྐང་གླིང་། ༽