ལ་གླུ་ཞེས་པའི་ལ་ནི་རི་སྒང་ངམ་ལ་མགོ་ལ་གོ་ཞིང་། བོད་མི་ཚོས་ཕྱུགས་རིགས་རྟ་ནོར་ལུག་གསུམ་དག་རི་མགོ་ནས་འཚོ་སྐྱོང་བྱེད་སྐབས་སུ་ལེན་པའི་གླུ་ཡིན་པས་དེ་ལྟར་ཐོགས། ད་དུང་དེ་ནི་དམངས་ཁྲོད་ཀྱི་རྩོམ་རིག་གི་རྣམ་པ་ཞིག་ཡིན་ལ་གླུ་ཚིག་མང་ཤོས་ནི་ཚེག་བར་བརྒྱད་པ་ཡིན།དཔེར་ན།བྲག་འགོའི་ཡུལ་གྱི་རྒན་གཞོན་ཚང་མའི་ངག་ལ་བྱང་བའི་གླུ་ཚིག་ནི་འདི་ལྟར་ཏེ། ཁྱོད་ཁ་མཚར་གླུ་ལ་དགའ་ནི་བོ།། ཁྱོད་སེམས་རྩ་སྐྱིད་ལ་འཁོར་བར་ཤོག། ཁྱོད་འདོ་ཆུང་ཐོ་རུར་དགའ་ནི་བོ།། ཁྱོད་ཕྱོགས་ལ་རྟ་བརྒྱ་འཁོར་བར་ཤོག། ཁྱོད་གནག་ཆུང་ནོར་ལ་དགའ་ནི་བོ།། ཁྱོད་ཕྱོགས་ལ་འབྲི་བརྒྱ་འཁོར་བར་ཤོག། ལྟ་བུའོ།། སྤྱིར་ལ་གླུར་དབྱེ་ན་འབྲོག་གླུ་དང་རོང་གླུ་གཉིས་སུ་དབྱེ་བར་འདོད་དེ། དེའི་དབྱེ་བ་འབྱེད་སྟངས་ནི་དབྱངས་ཀྱི་འགུགས་སྟངས་དང་ཚིག་གི་མཚོན་སྟངས་ལས་མངོན་པར་གསལ་ལ། ལེན་སྟངས་ལའང་རྐྱང་ལེན་དང་མཉམ་ལེན་གཉིས་སུ་འདུས་པར་འདོད་མོད། འོན་ཀྱང་གཙོ་བོ་དབྱངས་འགྲོས་བབ་ཆགས་ཤིང་རང་དབང་ལྡན་པ་ཞིག་ཡིན། ནང་དོན་ལ་དབྱེ་ན་བསྟོད་གླུ་དང་སྨད་གླུ། གླུ་མདུད། སྐྱེ་ཁམས་སྲུང་སྐྱོབ། མི་རིགས་མཐུན་སྒྲིལ་སོགས་ཀྱི་བརྗོད་བྱའི་དོན་ཕུན་སུམ་ཚོགས་ཤིང་རྗོད་བྱེད་ཚིག་གི་ཕྲེང་བར་བརྡ་རྙིང་དང་མངོན་བརྗོད། སྙན་ངག་སོགས་ཀྱིས་སྐྱེ་བོ་ཡོངས་ཀྱི་ཡིད་དབང་འགུགས་པའི་ནུས་པ་ལྡན། བྲག་འགོ་རྫོང་ལ་ཀྲུང་གོའི་ལ་གླུའི་ཕ་ས་ཞེས་པའི་ཆོ་ལོ་བསྩལ་བ་ནས་བཟུང་རང་རྫོང་གིས་ལ་གླུའི་རྒྱུད་འཛིན་མཁན་རྒན་དར་གཞོན་གསུམ་རྣམས་གསོ་སྐྱོང་ལེགས་པོ་མཛད་ལ། བདག་གིས་ཀྱང་ཐེངས་འདིའི་གོ་སྐབས་དང་བསྟུན་ནས་ཕ་ཡུལ་ལི་ཁོག་ཡུལ་གྱི་ལོ་ན་ལྔ་བཅུ་ནས་དགུ་བཅུ་བར་གྱི་རྒན་པ་ཚོའི་མདུན་དུ་བཅར་ནས། ལ་གླུའི་ཚིག་དང་དབྱངས་ལ་རྒྱུས་ལོན་བྱས་པ་ཡིན། ལ་གླུའི་གླུ་ཚིག་རེ་རེ་ཡིས་སྐབས་དེའི་སྤྱི་ཚོགས་ཀྱི་འཚོ་བ་རྟོགས་ལ། སྲོལ་རྒྱུན་གྱི་རིག་གནས་རེ་རེ་ཡིས་ང་ཚོས་ལོ་རྒྱུས་ལ་ཕྱིར་རྟོག་ཟབ་མོ་ཞིག་བྱེད་ཐུབ་པ་བྱུང་། ཇི་ལྟར་ཉན་ཡང་སུན་པ་མེད་ཅིང་ཇི་ལྟར་བྲིས་ཀྱང་ད་དུང་འབྲི་བར་འདོད་པའི་དམངས་ཁྲོད་རིག་གནས་ནི་འུ་ཅག་གི་རིག་གནས་ཀྱི་ཡང་སྙིང་དང་བསམ་པའི་དཔལ་ཡོན་དུ་སྣང་བས་བདག་གིས་ཉེ་ལམ་རྩོམ་སྒྲིག་བྱེད་བཞིན་པའི་ལ་གླུ་སྲིད་པའི་འགྱུར་ཁུགས་ལས་རེ་འགའ་ཁོལ་དུ་ཕྱུང་ནས་བཀོད་པ་གཤམ་གསལ་ལྟར། ༡ སྟོད་གན་ན་ན་ཞིག་རིག་རྒྱུ་དེ།། གཙང་ཨ་ཆེན་ན་བཀྲ་གོང་མ་རེད།། འབྲོང་བྲེ་ལོའི་ཕ་ས་མ་ཡུལ་རེད།། རྭ་སྨུག་པོའི་ཆ་དར་འཛོམས་ས་རེད།། བར་གན་ན་རི་ཞིག་རིག་རྒྱུ་དེ།། ཤར་རང་ཡུལ་རང་སྡེ་ཕྱུག་མོ་རེད།། སྨན་བུ་མོའི་ཕ་ས་མ་ཡུལ་རེད།། མགོ་གཡུ་བྱུར་ཆ་དར་འཛོམས་ས་རེད།། སྨད་གན་ན་ཤིང་ཞིག་རིག་རྒྱུ་དེ།། ཤིང་ཤིག་ལོའི་ཡལ་ག་གོང་མ་རེད།། བྱ་ཁུ་ལོའི་ཕ་ས་མ་ཡུལ་རེད།། གསུང་སྙན་མོའི་ཆ་དར་འཛོམས་ས་རེད།། ༢ རི་མཐོན་པོ་རྨ་རྒྱལ་སྦོམ་ར་རེད།། དེའི་མཐོ་རོགས་ཀླུ་རྒྱལ་ཕྱུག་མོ་རེད།། རི་མཐོན་པོ་བརྒྱ་དང་བརྒྱད་ཀྱིས་བསྐོར།། རི་ཆུང་ཆུང་ཁྲི་མ་འབུམ་གྱིས་བསྐོར།། རི་ཆེན་པོ་མ་ལ་བུ་འཁོར་རེད།། ཆུ་ཆེན་པོ་རྨ་ཆུ་ལི་མ་རེད།། དེའི་ཆུ་རོགས་འབྲི་ཆུ་སྔོན་མོ་རེད།། ཆུ་ཆེན་པོ་བརྒྱ་དང་བརྒྱད་ཀྱིས་བསྐོར།། ཆུ་ཆུང་ཆུང་ཁྲི་མ་འབུམ་གྱིས་བསྐོར།། ཆུ་ཆེན་པོ་མ་ལ་བུ་འཁོར་རེད།། དཔོན་མཐོན་པོ་རྒྱ་ནག་རྒྱལ་པོ་རེད།། དེའི་མཐོ་རོགས་རྒྱ་གར་རྒྱལ་པོ་རེད།། དཔོན་ཆེན་པོ་བརྒྱ་དང་བརྒྱད་ཀྱིས་བསྐོར།། དཔོན་ཆུང་ཆུང་ཁྲི་མ་འབུམ་གྱིས་བསྐོར།། དཔོན་ཆེན་པོ་མ་ལ་བུ་འཁོར་རེད།། ༣ སྟག་ཤར་ལི་ཕོ་ལྷ་དགྲ་བླས་སྲུང་།། མགོ་ཝ་དམར་ཝ་ཡང་སྤྲུལ་སྐུས་སྲུང་།། རྒྱབ་ཁྲ་རིང་སོག་པོའི་མགར་བས་སྲུང་།། དེ་གསུམ་གྱིས་སྲུང་དང་བུད་ལ་འགྲོ།། རྟ་འདོ་བ་རྟ་མགྲིན་དམར་པོས་སྲུང་།། སྲབ་སིལ་མ་ལྷ་ཆེན་ཚངས་པས་སྲུང་།། སྒ་བེ་ཤིང་བེ་ཡུལ་སྤྲུལ་སྐུས་སྲུང་།། དེ་གསུམ་གྱིས་སྲུང་དང་བུད་ལ་འགྲོ།། སྨན་བུ་མོ་རྗེ་བཙུན་སྒྲོལ་མས་སྲུང་།། མགོ་གཡུ་བྱུར་རྒྱ་གར་རྒྱལ་པོས་སྲུང་།། རྒྱབ་ཕྲུག་ཆུང་སོག་པོའི་རྒྱལ་པོས་སྲུང་།། དེ་གསུམ་གྱིས་སྲུང་དང་བུད་ལ་འགྲོ།། ༤ དགོང་ཨ་སྔོན་རས་ལྭ་སྔོ་དཀར་རེད།། གོན་བསམ་ན་ཡང་གོང་བ་མེད་གི།། ཚེ་སྔོན་ཆད་མེད་ནི་མ་རེད་དེ།། རོགས་འུ་གཉིས་སྔོན་ལས་མེད་ནི་རེད།། ཤར་ཉི་ཟླ་དངུལ་དཀར་གའུ་རེད།། བཏགས་བསམ་ན་ཡང་གའུ་ལུང་མེད་གི།། ཚེ་སྔོན་ཆད་མེད་ནི་མ་རེད་དེ།། རོགས་འུ་གཉིས་སྔོན་ལས་མེད་ནི་རེད།། ཆུ་གཙང་བོ་རས་ལྕུག་སྔོ་དཀར་རེད།། བཅིངས་བསམ་ན་ཡང་ཁ་ཚར་མེད་གི།། ཚེ་སྔོན་ཆད་མེད་ནི་མ་རེད་དེ།། རོགས་འུ་གཉིས་སྔོན་ལས་མེད་ནི་རེད།། ༥ བོའུ་ཉོ་ན་ཟི་ལིང་ལྕག་ཁྲ་ཉོས།། མདའ་ཟད་ནའང་ལྕག་ཁྲ་ཟད་མེད་རེད།། རྟ་ཉོ་ན་འཕན་འགྲོས་གྲུག་ཁྲ་ཉོས།། ཤ་ཟད་ནའང་གོམ་པ་ཟད་མེད་རེད།། རོགས་ཉོ་ན་ཕ་ཕྱུག་བུ་མོ་ཉོས།། རིན་ཟད་ནའང་རྫོངས་བ་ཟད་མེད་རེད།། ༦ བེའུ་ཁྲ་རིང་ཁྲ་ཐུང་མང་པོ་མེད།། གཅིག་ཡོད་པ་གནམ་ལྕགས་ཐོག་དང་འདྲ།། ཐོག་འདྲ་བའི་བོའུ་ཞིག་མེད་མོད་ཀྱང་།། བོའུ་གཟུ་འབབ་ཐོག་དང་འདྲ་འདྲ་ཡིན།། རྟ་གྲོ་རྒྱ་སྔོ་རྒྱ་མང་པོ་མེད།། གཅིག་ཡོད་པ་སིལ་མ་རླུང་དང་འདྲ།། རླུང་འདྲ་བའི་རྟ་ཞིག་མེད་མོད་ཀྱང་།། འགྲོས་གོམ་པ་རླུང་དང་འདྲ་འདྲ་ཡིན།། རོགས་ཁ་འདྲིས་ཞེ་འདྲིས་མང་པོ་མེད།། གཅིག་ཡོད་པ་རིན་ཆེན་སྲོག་དང་འདྲ།། སྲོག་འདྲ་བའི་རོགས་ཤིག་མེད་མོད་ཀྱང་།། འགྲོགས་མཛའ་མཐུན་སྲོག་དང་འདྲ་འདྲ་ཡིན།། ༧ ལྷ་བླ་མའི་མགོ་ན་རི་མོ་མེད།། མགོ་གསེར་ཞྭ་གྱོན་དང་རི་མོ་རེད།། སྨན་བུ་མོའི་མགོ་ན་རི་མོ་མེད།། མགོ་ལན་རྐང་སྒྲིག་དང་རི་མོ་རེད།། རྟ་འདོ་བའི་མགོ་ན་རི་མོ་མེད།། མགོ་གསེར་སྲབ་ཞོག་དང་རི་མོ་རེད།། ༨ ལུག་དཀར་ཆུང་ནམ་མཁའི་སྐར་ཚོགས་རེད།། དེའི་ལུག་རྫི་མཚོ་ནང་ནོར་བུ་རེད།། ཟོག་ནག་ཆུང་རྩྭ་མགོའི་མེ་ཏོག་རེད།། དེའི་ཟོག་རྫི་འཛམ་གླིང་ཉི་མ་རེད།། རྟ་འདོ་བ་མཚོ་ཁའི་མེ་ཏོག་རེད།། དེའི་རྟ་རྫི་མཚོ་ནང་ནོར་བུ་རེད།། ༩ ངས་གླུ་ཞིག་བླངས་ན་མཛོ་ཞིག་དགོས།། མཛོ་ཁྱུང་ལིའི་རྭ་ཁ་ལྡེམ་མེ་དགོས།། ངས་གླུ་ཞིག་བླངས་ན་རྟ་ཞིག་དགོས།། རྟ་འདོ་ལིའི་སྲབ་མདའ་ཤིགས་སེ་དགོས།། ངས་གླུ་ཞིག་བླངས་ན་ལུག་རེ་དགོས།། ལུག་ཚེར་མོའི་བལ་ཁ་ཉིལ་ལེ་དགོས།། ༡༠ ང་ཁེ་ཁ་གོང་མས་འབུད་དུས་སུ།། ངའི་རྟ་མགོ་གསེར་གྱི་མཆོད་རྟེན་རེད།། དེའི་ཟེ་བ་སྟོང་སྐུད་མདུད་པ་རེད།། དེའི་རྔ་མ་ལྷོ་སྤྲིན་འཁྱིལ་ཡག་རེད།། རྟ་འདི་ཚོ་རྟ་མགྲིན་དམར་པོས་སྲུང་།། ང་ཁེ་ཁ་བར་མས་འབུད་དུས་སུ།། སྒའི་སྔ་རུ་ཨོ་རྒྱན་པ་ཊ་རེད།། སྒའི་ཕྱི་རུ་ཕྱག་ན་རྡོ་རྗེ་རེད།། དེའི་སྒ་ཁུང་ཉི་མ་རང་ཤར་རེད།། སྒ་འདི་ཚོ་དགའ་ལྡན་གསེར་ཁྲིས་སྲུང་།། ང་ཁེ་ཁ་ཞོལ་མས་འབུད་དུས་སུ།། ངའི་སྐུ་ལུས་མགར་བས་བརྡུང་འདྲ་རེད།། ངའི་ཁ་མིག་ལྷ་བཟོས་བྲིས་འདྲ་རེད།། ངའི་དབུ་སྐྲ་ལྷ་མིས་གཤིབ་འདྲ་རེད།། མི་འདི་ཚོས་ཚེ་ཐག་གནམ་གི་སྲུང་།། ༡༡ ཁ་ཚེ་སྟོད་བསམ་པའི་བསམ་སྒོ་ལ།། མགོ་ཝ་དམར་གྲ་ཁ་ཡག་ན་བསམ།། རྟ་འདོ་ལིའི་གྲུག་ཞེང་ལེབ་ན་བསམ།། བོའུ་ཁྲ་རིང་གཟུ་འབེབ་ཡོད་ན་བསམ།། ཁ་ཚེ་སྟོད་བསམ་པའི་བསམ་སྒོ་རེད།། ཁ་ཚེ་སྐེད་བསམ་པའི་བསམ་སྒོ་ལ།། འབྲི་ཐུལ་མའི་རྡང་ཐག་རིང་ན་བསམ།། སྦྲ་རེ་ལོའི་མཁའ་ཞེང་ཆེ་ན་བསམ།། རོགས་ཆུང་མའི་ཤ་ལོ་དཀར་ན་བསམ།། ཁ་ཚེ་སྐེད་བསམ་པའི་བསམ་སྒོ་རེད།། ཁ་ཚེ་སྨད་བསམ་པའི་བསམ་སྒོ་ལ།། ཇ་ཡང་མར་ཁོལ་མགོ་ཡོད་ན་བསམ།། ཁ་མ་ཎིའི་གྲངས་རྟགས་མཐོ་ན་བསམ།། ལྷ་བླ་མའི་ངོ་སོ་མཐོ་ན་བསམ།། ཁ་ཚེ་སྨད་བསམ་པའི་བསམ་སྒོ་རེད།། ༡༢ སྟོད་གན་གི་གངས་རི་མཐའ་མེད་དེ།། ནམ་ཡར་གསལ་གན་ལ་ཉི་རྩེ་ཕོག། འདི་ཕོག་གིན་གངས་རི་ཇེ་དཀར་རེད།། གངས་མི་ཆགས་ཆགས་ལུགས་དེ་འདྲ་རེད།། བར་གན་གི་ཤུག་པ་སྔོ་ལྡེམ་དེ།། ནམ་ཡར་གསལ་གན་ལ་བསང་ཤུག་བཏུས།། འདི་བཏུས་པས་ཤུག་པ་ཇེ་རྫིག་རེད།། ཤིང་མི་སྐྱེ་སྐྱེ་ལུགས་དེ་འདྲ་རེད།། སྨད་གན་གི་རོགས་ལོ་སྙིང་རྗེ་དེ།། ནམ་ཡར་གསལ་གན་ལ་མཁའ་ཁ་ཕོག། དབྱེན་ཕོག་གིན་རོགས་ལོ་ཇེ་མཐུན་རེད།། རོགས་མི་རྩེ་རྩེ་ལུགས་དེ་འདྲ་རེད།། ༡༣ ངའི་གླུ་མགོ་སངས་རྒྱས་སྟོང་སྐུ་རེད།། ཆོས་སངས་རྒྱས་བསྟན་པ་ཡར་དར་རེད།། ངའི་གླུ་སྐེད་གཞུ་མོ་བཀུགས་འདྲ་རེད།། གླུ་ཡག་པོ་མདའ་མོ་འཕངས་འདྲ་རེད།། ངའི་གླུ་རྔ་མཚོ་མོ་ཡར་འཁྱིལ་རེད།། གླུ་ཡག་པོ་མཚོ་མོ་ཡར་འཁྱིལ་རེད།། ༡༤ སྟོད་གན་ན་ལམ་ཞིག་རིག་རྒྱུ་དེ།། ལམ་ཡག་པོ་དགའ་ལྡན་ལྷ་ལམ་རེད།། བར་གན་ན་ཤིང་ཞིག་རིག་རྒྱུ་དེ།། ཤིང་ཡག་པོ་ཨ་གར་ལྗོན་ཤིང་རེད།། སྨད་མོས་ན་སྡེ་ཞིག་རིག་རྒྱུ་དེ།། སྡེ་ཡག་པོ་གཡུང་དྲུང་སྒོ་བཞི་རེད།། ༡༥ རོགས་ཁྱོད་ཕྱོགས་ཀྱི་ནི་རི་མགོ་ན།། རླུང་ས་མ་སིལ་ཞིག་གཡུག་རྒྱུ་དེ།། ངའི་གངས་དཀར་སེམས་ཀྱི་བྱོལ་མ་རེད།། ཁྱོས་གོ་འུ་ཨེ་ཡོད་ཆུང་འདྲིས་རོགས།། རོགས་ཁྱོད་ཕྱོགས་ཀྱི་ནི་རི་སྐེད་ན།། ཆར་ཟ་མ་ཟིལ་ཞིག་འབབ་རྒྱུ་དེ།། འདི་ཁྲ་ཆུང་མིག་གི་མཆི་མ་རེད།། ཁྱོས་གོ་འུ་ཨེ་ཡོད་ཆུང་འདྲིས་རོགས།། རོགས་ཁྱོད་ཕྱོགས་ཀྱི་ནི་རི་འདབས་ན།། སྨུག་ལ་མ་ལིང་ཞིག་འཐིབ་རྒྱུ་དེ།། ངའི་ཁ་རླངས་སྨུག་གི་བརྡ་རེད།། ཁྱོས་གོ་འུ་ཨེ་ཡོད་ཆུང་འདྲིས་རོགས།། ༡༦ ང་ཁྲམ་པའི་བུ་ལ་འཁོར་བ་མེད།། རྫ་ཁྲ་ཡག་ཁྲམ་པའི་འཁོར་བ་རེད།། ང་ཁྲམ་པའི་བུ་ལ་འགྲོ་རོགས་མེད།། རྟ་འདོ་ལི་ཁྲམ་པའི་འགྲོ་རོགས་རེད།། ང་ཁྲམ་པའི་བུ་ལ་ཚེ་རོགས་མེད།། བོའུ་ཁྲ་རིང་ཁྲམ་པའི་འགྲོ་རོགས་རེད།། ༡༧ ངའི་གླུ་མོ་གསེར་གྱི་པ་ཊ་མ།། དེ་ཡར་ཁྱེར་རྒྱ་གར་དབུས་ལ་ཁྱེར།། བན་སེར་ཆུང་གསུམ་གྱིས་ཁོས་ཉོ་ཟེར།། གོང་དུ་བྱིན་ཟེར་དང་ཐེར་ཆེན་བརྒྱ།། ཁན་ཅི་འཇོག་ཟེར་དང་ཐེར་ཆུང་བརྒྱ། ཕྲུག་ཐེར་ཆེན་ཐེར་ཆུང་ཉིས་བརྒྱ་རེད།། ཚོང་ཁེ་སྤོགས་ཡོད་ནི་གོ་ན་ཡང་།། གླུ་ཁ་མཚར་མ་བཙོང་ཕྱིར་ལ་ཡོང་།། ངའི་གླུ་མོ་གསེར་གྱི་པ་ཊ་མ།། དེ་ཕར་ཁྱེར་སོག་པོའི་ཡུལ་ལ་ཁྱེར།། སོག་ཚོང་གསུམ་གྱིས་ཁོས་ཉོ་ཟེར།། གོང་དུ་བྱིན་ཟེར་དང་ཐོར་ཆེན་བརྒྱ།། ཁེན་ཅི་འཇོག་ཟེར་དང་ཐོར་ཆུང་བརྒྱ། རྟ་ཐོར་ཆེན་ཐོར་ཆུང་ཉིས་བརྒྱ་རེད།། ཚོང་ཁེ་སྤོགས་ཡོད་ནི་གོ་ན་ཡང་།། གླུ་ཁ་མཚར་མ་བཙོང་ཕྱིར་ལ་ཡོང་།། ངའི་གླུ་མོ་གསེར་གྱི་པ་ཊ་མ།། དེ་མར་ཁྱེར་རྒྱ་ནག་ཡུལ་ལ་ཁྱེར།། རྒྱ་ཁེ་བ་གསུམ་གྱིས་ཁོས་ཉོ་ཟེར།། གོང་དུ་བྱིན་ཟེར་དང་ཁལ་ཆེན་བརྒྱ།། ཁན་ཅི་འཇོག་ཟེར་དང་ཁལ་ཆུང་བརྒྱ། ཇ་ཁལ་ཆེན་ཁལ་ཆུང་ཉིས་བརྒྱ་རེད།། ཚོང་ཁེ་སྤོགས་ཡོད་ནི་གོ་ན་ཡང་།། གླུ་ཁ་མཚར་མ་བཙོང་ཕྱིར་ལ་ཡོང་།། ༡༨ ངའི་ཁྲི་ཐོག་བླ་མས་ཟེར་གི་ད།། རོགས་ཁྱོད་གཉིས་མཛའ་མཐུན་ཕྱེ་དགོས་ཟེར།། ཆགས་བཞག་ན་བླ་ལོ་ལོས་བདེན་ད།། ཁྱེད་མདུན་གྱི་བུམ་པ་ཆ་གཉིས་དེའི།། ཆ་ག་ཡ་མེད་ན་ཅི་འདྲ་རེད།། རོགས་འུ་གཉིས་མཛའ་མཐུན་དེ་འདྲ་རེད།། ངའི་གོང་ཤེས་དཔོན་ལིས་ཟེར་གི་ད།། རོགས་ཁྱོད་གཉིས་མཛའ་མཐུན་ཕྱེ་དགོས་ཟེར།། ཆགས་བཞག་ན་དཔོན་ལོ་ལོས་བདེན་ད།། ཁྱེད་རྒྱབ་ཀྱི་ཁྲ་རིང་རྭ་གཉིས་དེའི།། རྭ་ག་ཡ་མེད་ན་ཅི་འདྲ་རེད།། རོགས་འུ་གཉིས་མཛའ་མཐུན་དེ་འདྲ་རེད།། ངའི་དྲིན་ཅན་མ་ལོས་ཟེར་གི་ད།། རོགས་ཁྱོད་གཉིས་མཛའ་མཐུན་ཕྱེ་དགོས་ཟེར།། ཆགས་བཞག་ན་མ་ལོ་ལོས་བདེན་ད།། ཁྱེད་རྣ་ཡི་རྣ་ལུང་ཆ་མ་དེའི།། ཆ་ག་ཡ་མེད་ན་ཅི་འདྲ་རེད།། རོགས་འུ་གཉིས་མཛའ་མཐུན་དེ་འདྲ་རེད།། ༡༩ རྨ་ཕ་རོལ་རྡོ་ཕྲེང་གོང་མ་ན།། བོའུ་ཨེ་འཕེན་ཟེར་མཁན་མང་པོ་རེད།། བོའུ་མི་འཕེན་དམུ་རྗེ་མགར་གསར་ཡིན།། ལག་སྡིག་སྒྲིབ་འཇོག་སྔ་བྱེད་མི་ཉན།། རྨ་ཕ་རོལ་རྡོ་ཕྲེང་བར་མ་ན།། རྟ་ཨེ་རྒྱུག་ཟེར་མཁན་མང་པོ་རེད།། རྟ་མི་རྒྱུག་ཐོ་རུ་ཆུང་ཆུང་ཡིན།། མགོ་གསེར་ཁྲབ་འཇོག་སྔ་བྱེད་མི་ཉན།། རྨ་ཕ་རོལ་རྡོ་ཕྲེང་འགབ་མ་ན།། རོགས་ཨེ་རྩེ་ཟེར་མཁནན་མང་པོ་རེད།། རོགས་མི་རྩེ་ཞི་མོ་ཆུང་ཆུང་རེད།། ཁ་མི་ཁ་འཇོག་སྔ་བྱེད་མི་ཉན།། ༢༠ རྟ་འདོ་བས་ཐང་ཆེན་འགྲིམས་ནས་སོང་།། རྩྭ་འཇག་མ་ཡིད་ལ་བརྒྱུད་དེ་ཐལ།། རྟ་འདོ་བས་ཟ་བསམ་ཡོད་གི་ད།། སྲབ་སིལ་མས་ཟ་དབང་མི་བྱིན་གི།། རྩྭ་འཇག་མ་ཡིད་ནས་མ་བརྗེད་དང་།། སྲབ་སིལ་མ་ཡུན་གྱི་ཡོད་ནི་མིན།། རྒོད་ཐང་དཀར་ཨ་སྔོན་འགྲིམས་ནས་སོང་།། བྲག་དཀར་ཆུང་ཡིད་ལ་བརྒྱུད་ནས་ཐལ།། རྒོད་ཐང་དཀར་འབབ་བསམ་ཡོད་གི་ད།། རླུང་སིལ་མས་འབབ་དབང་མི་བྱིན་གི།། བྲག་དཀར་ཆུང་ཡིད་ནས་མ་བརྗེད་ད།། རླུང་སིལ་མ་ཡུན་གི་ཡོད་ནི་མིན།། སྐྱེ་ཤར་ལིས་སྡེ་བ་འགྲིམས་ནས་ཐལ།། སྨན་བུ་མོ་ཡིད་ལ་བརྒྱུད་ནས་ཐལ།། སྐྱེ་ཤར་ལི་རྩེ་བསམ་ཡོད་གི་ད།། ཡུལ་སྡེ་བས་རྩེ་དབང་མི་བྱིན་གི།། སྨན་བུ་མོ་ཡིད་ནས་མ་བརྗེད་དང་།། ཡུལ་སྡེ་བ་ཡུན་གི་ཡོད་ནི་མིན།། ༢༡ དགོན་ལྷ་ཁང་ཕྱི་ཡི་ལྕགས་རི་རེད།། གོང་བླ་མ་ནང་གི་ནོར་བུ་རེད།། ཆོས་བསྟན་པ་དར་བའི་རྟེན་འབྲེལ་ཞུ།། སྡེ་ཆེན་པོ་ཕྱི་ཡི་ལྕགས་རི་རེད།། དྲིན་ཕ་མ་ནང་གི་ནོར་བུ་རེད།། འདི་ཚེ་ཐག་རིང་གི་རྟེན་འབྲེལ་ཞུ།། ༢༢ མཁར་སྐྱ་རེངས་ཤིག་ལ་ལྟག་སྒོ་གཉིས།། མགོ་ལབ་ཙེ་ཞིག་གི་སུམ་འཛོམས་རེད།། ངས་མཐོན་པོ་ཀླད་ལ་མངགས་ནི་མིན།། ཤར་ཉི་ཟླ་ཤོར་ན་ཡོག་མེད་རེད།། རྟ་འདོ་བ་ཞིག་ལ་སྲབ་མཐུར་གཉིས།། རྒྱབ་གསེར་སྒ་ཞིག་གི་སུམ་འཛོམས་རེད།། ངས་མགྱོགས་པོ་སྔོན་ལ་མངགས་ནི་མིན།། རླུང་སིལ་མ་ཤོར་ལ་ཡོག་མེད་རེད།། སྨན་བུ་མོ་ཞིག་ལ་གོས་བཅུད་གཉིས།། མགོ་གཡུ་བྱུར་ཞིག་གི་སུམ་འཛོམས་རེད།། ངས་ཡག་པ་ཀླད་ལ་མངགས་ནི་མིན།། འཇའ་ཁ་དོག་ཤོར་ན་ཡོག་མེད་རེད།།