གློ་བུར་བཅུ་དྲུག་ལུས་ཀྱི་ལང་ཚོ་ཡལ།།

ཉི་ཤུའི་སྣང་བའི་སྤྲིན་དཀར་དེ་ཡང་རྒུད།།

གདོང་ལ་ཤར་ཤུར་གཉེར་རིས་རེ་ཡང་ལྷུང་།།

མི་ཚེ་ཕྱེད་ཀའི་ན་ཚོད་དོན་མེད་རྫོགས།།

འགོག་མེད་ལས་ཀྱི་རླུང་བུ་རྒྱུ་སྟངས་ཀྱིས།།

རེ་འདུན་ཉི་མ་ཆར་སྤྲིན་ནག་པོས་བསྒྲིབས།།

འདོད་པའི་སྨྱུ་གུ་སད་དང་སེར་བས་བཅོམ།།

ཡིད་ལ་སྐྱོ་བའི་མུན་པ་དགུ་རྩེག་འཁྲིགས།།

རྙོག་འཛིང་བྱ་གཞག་མིག་ལ་རབ་ཏུ་གཟན།།

བབ་ཅོལ་ཚིག་ཚོགས་ཡིད་ལ་ཤིན་ཏུ་གནག།

ནང་སེམས་ནམ་མཁའ་ཆེན་མོའི་ཕང་བ་རུ།།

རྣམ་རྟོག་གངས་ཆར་འདྲེས་མ་ཤེད་ཀྱིས་འཚུབ།།

འཚོ་བའི་ལམ་ཕྲན་གུག་ཀྱོག་གྱ་གྱུ་མང་།།

འཁོར་བའི་རི་དང་ལུང་པ་གཞི་རྒྱ་ཡངས།།

མི་དལ་ལུས་སེམས་བྲེལ་ཟིང་ཀློང་དུ་ཚུད།།

མ་ངེས་དཀའ་སྡུག་འདྲ་མིན་ཕྲག་ཏུ་བབས།།

ཉིན་བཞིན་རྣམ་གཡེང་བུ་མོའི་རུམ་དུ་ཉལ།།

རྣམ་ཀུན་རང་མགོ་སྐོར་བའི་ལས་ལ་ཞུགས།།

སེམས་ལ་ཕུགས་འདུན་ཟེར་བ་ཅི་ཡང་མེད།།

ལྟོ་འགྲངས་རྒྱབ་དྲོས་ཙམ་གྱིས་ལོ་ཟླ་བསྐྱལ།།

བསོད་ནམས་ལས་ཀྱི་རི་མོ་མི་གསལ་འོག།

སྣ་མང་བྱ་བར་འབད་པའི་སེམས་ཤུགས་མེད།།

ལན་གཅིག་མི་ཡུལ་འགྲིམ་པའི་དུས་འདི་ལ།།

སྐྱོ་ངལ་སེམས་ཁྲལ་ཁུར་པོ་རབ་ཏུ་ལྕི།།

ཕྱི་ཡི་ལུས་ལ་ངུར་སྨྲིག་གོས་བཀླུབས་ཀྱང་།།

ནང་གི་སེམས་ལ་ཉོན་མོངས་དུག་ལྔ་འཕེལ།།

གཡོ་འཕྲུལ་ཚིག་གི་རྦ་རླབས་མཁའ་རུ་འཕྱོ།།

ཚུལ་འཆོས་བྱ་སྤྱོད་ཀློང་ནས་མི་ཚེ་ཟད།།