སྟོན་མཚན་ཟླ་འོད་མུན་པའི་ཀློང་དུ་ཡིབ། །

འཛིན་མའི་ཁྱོན་དུ་རབ་དཀར་ཁ་བས་འགེངས། །

སྟོན་མཇུག་རླུང་བུའི་སྐྱོ་སྣང་རུམ་གང་བསྐྱུར། །

གདུང་བའི་སྐྱུར་ཆང་མི་བཏུང་ཁ་མེད་བྱུང་། །

ཟི་ལིང་གྲོང་ནས་སྙན་ངག་པ་ཞིག་གཤེགས། །

དབྱངས་གསལ་གཉིས་ཀར་ཕྱིར་མིག་འཕེན་གྱིན་དུ། །

ཚེ་གཅིག་མི་ཚེ་སྙན་ངག་ལ་བཅོལ་བས། །

ཁོང་ཉིད་བཞུད་པ་བོད་ལ་ཤིན་ཏུ་འཕངས། །

མི་ཚེ་འདི་ཡང་སྟོན་ཀའི་ཤིང་ལོ་བཞིན། །

ངེས་མེད་རླུང་གིས་ཁྱེར་ནས་ཚེ་ཕྱེད་འདས། །

དོན་ལྡན་བྱ་བ་གཅིག་ཀྱང་འགྲུབ་མེད་པས། །

བསམ་ཞིང་བསམས་ན་ཤིན་ཏུ་སྐྱོ་བའི་གནས། །

དབེན་དགོན་འདི་དང་མི་ཚེ་དམ་དུ་སྦྲེལ། །

ཐོག་མར་ཆོས་ཀྱི་སྒོ་གླེགས་འདི་ནས་བརྡུངས། །

བཤེས་གཉེན་དམ་པའི་ཞབས་ཟུང་སྤྱི་བོར་བཀོད། །

བར་དུ་འཆད་རྩོད་རྩོམ་པའི་གཞུང་ཡང་བསླབས། །

དམ་པ་གོང་མའི་རྣམ་ཐར་མང་བལྟས་པས། །

དང་པོ་རྒྱ་ཆེན་ཐོས་པ་བཙལ་སྐབས་སུ། །

སློབ་སྦྱོང་ཕྱིར་དུ་རྒྱང་རིང་ཡུལ་ལ་ཕྱིན། །

དཀའ་སྤྱད་སྡུག་རུས་སྨྲ་བསམ་བརྗོད་ལས་འདས། །

གཉེན་དང་ཕ་མ་ཕུ་ནུ་རྒྱབ་ཏུ་བསྐྱུར། །

དེ་དག་ཡོད་ཚད་ཐོས་པ་དོན་གཉེར་ཕྱིར། །

དེ་ཕྱིར་སྔོན་རབས་དམ་པའི་རྣམ་ཐར་ནི། །

རྗེས་འཇུག་སྐྱེ་བོའི་ཉམས་ལེན་དུ་འཆད་པས། །

བདག་ཀྱང་ཐར་བ་དོན་དུ་གཉེར་ཕྱིར་དུ། །

ཐོས་པ་འཚོལ་ཕྱིར་གྲྭ་སར་འགྲོ་བསམ་མོད། །

རང་དགོན་འདི་ནས་མ་བསྡད་བུད་སོང་ན། །

བླ་མའི་ཐུགས་དང་དགོན་པར་འགལ་འགྲོ་ཟེར། །

གང་དུ་ཕྱིན་ཀྱང་འདི་ལས་ལྷག་ཅིག་མེད། །

དྲན་རྒྱུ་མ་མང་འགྲོ་རྒྱུ་ཉུང་ཉུང་བྱོས། །

ངེས་པར་འགྲོ་དགོས་ཨུ་ཚུགས་མང་བྱས་ཀྱང་། །

ཁོང་ཚོ་མ་འཆི་བར་དུ་མི་ཆོག་ཟེར། །

དེ་ནས་བདག་ཀྱང་ཨུ་ཐུག་ཐབས་ཟད་དེ། །

རང་སེམས་སྟོན་སའི་མི་ཞིག་མ་རྙེད་ལ། །

དབྱར་དང་སྟོན་ཀའི་མཛེས་པ་མ་མཐོང་བར། །

རྒྱང་རིང་སེམས་པར་བཏགས་ཏེ་ཡུན་རིང་ལུས། །

སྟོན་ཆར་ཟམ་ཟིམ་འབབ་པའི་ཞོགས་པ་འདིར། །

ཡིད་ཀྱི་སྨུག་པ་མ་སངས་གཞས་ལ་ཉན། །

ཞེ་ཡི་འདང་ལ་འཁོར་བའི་སེམས་རྟེན་ཏེ། །

ཁེར་རྐྱང་སྙན་ངག་བྲིས་ནས་སྐྱོ་སྣང་བསངས། །

སྟོན་མཇུག་ཁ་བས་མི་སེམས་འཁྱག་ལ་སྦྱར། །

ལོ་མ་ལྡོམ་པོ་ཞིག་གིས་གདུང་དབྱངས་དཀྲོལ། །

དོ་དགོང་ང་ཡི་སྒྲ་འཛིན་དབང་བོ་རུ། །

གཡེར་དྲིལ་སྙན་མོའི་སྒྲ་འདི་རྒྱུས་ཡོད་ཅིག །

གྲོགས་དང་ཆོས་གྲོགས་ཕལ་ཆེར་འཛོམས་བྱུང་ངོ་། །

རྣམ་གཡེང་སྒྱིད་ལུག་གྲོགས་སུ་བསྟེན་པའི་བདག །

འདི་ནས་ཚེ་ཕྱེད་རྫོགས་པའི་ང་རང་ཡང་། །

སྐྱོ་ངལ་དང་བཅས་སླར་ཡང་འདི་རུ་མཆིས། །

ལྷོ་རུ་གཏད་པའི་སྒེའུ་ཁུང་འགྲམ་ཟུར་ནས། །

མིག་ཟུང་རྒྱང་ལ་ཕྱོགས་ཀྱིན་རང་སེམས་གསོས། །

སྟོན་མཇུག་སྨྲེང་བས་སེམས་ནི་རབ་རིབ་ཏུ། །

ཞེ་སྡུག་ངག་ལ་དྲངས་ནས་གླུ་རུ་གྱེར། །