འཆིང་གྲོལ། 2023-09-08
དགེ་རྒན་ལགས།
ཁྱེད་ལ་ཐུགས་མཁྱེན་ཡངས་པའི་བླ་མ་ཇི་བཞིན་འབུལ་བ་མེད་ཅིང་།
ལས་དབང་ཐང་ཅན་གྱི་དཔོན་པོ་ཇི་བཞིན་ངོ་སོ་མེད་ན་ཡང་།
ཁྱེད་ཀྱིས་སློབ་མ་ང་ཚོར།
ཤེས་རིག་གི་བང་མཛོད་ལས་འབྲས་བཟང་གི་ནོར་བུ་ཕངས་མེད་དུ་བསྩལ་ཡོད།
དགེ་རྒན་ལགས།
ཁྱེད་ཀྱི་འདས་མ་ད་གསུམ་དང་། ཕྱི་ནང་གསང་གསུམ།
ཁྱེད་ཀྱི་སྔོན་རྗེས་བར་གསུམ་དང་། ལུས་ངག་ཡིད་གསུམ་ནི།
ལེ་ལོ་དང་བག་ཡངས་ཀྱིས་ཁྱེར་བའི་སློབ་མ་ང་ཚོའི་ཆེད།
སེམས་ཚེགས་དང་དཀའ་སྡུག་གིས་བཞུད་སོང་།
ལོ་ངོ་གཅིག་དང་གཉིས། གསུམ་གྱི་དུས་ཡུན་ནི།
མིག་རྡེབ་ཡུན་གཅིག་གིས་རྫོགས་སོང་ནའང་།
ཁྱེད་ཀྱི་ཐུགས་ཀ་ལས་སློབ་མ་ང་ཚོའི་ཕུགས་བསམ་བོར་མ་མྱོང་ཞིང་།
ཁྱེད་ཀྱི་སློབ་གསོའི་ཁྲོད་སློབ་མ་ང་ཚོའི་མིང་བྱང་བོར་མྱོང་མེད།
དགེ་རྒན་ལགས།
སློབ་མ་ང་ཚོའི་ལེགས་ཚོགས་ཐམས་ཅད་ཀྱི་རྩ་བ་ཁྱེད་ལས་འཁྲུངས་ཤིང་།
སྐྱོན་ཆ་སྣ་ཚོགས་ཀྱི་འགག་འཕྲང་ཁྱོད་ཀྱིས་བཅད་དེ།
གཞོན་དུས་ཀྱི་གཤོག་རླབས་རླུང་བུ་ལ་བསྐྱོན་ཏེ་གྱེན་དུ་འདྲེན།
དགེ་རྒན་ལགས་དེ་རིང་ནི་ཁྱེད་ཀྱི་དུས་ཆེན་ཡིན་པས།
ངས་སྙན་ཚིག་ཅིག་གིས་ཁྱེད་ཀྱི་དུས་སྟོན་བསུས་ཡོད།
དགེ་རྒན་ལགས།
ཁྱེད་ཀྱིས་མཚན་མོའི་མུན་ནག་དང་ཆབས་གཅིག་སློབ་མ་ང་ཚོ་བསྐྱངས་ཤིང་།
སྐྱ་རེངས་དང་ལྷན་ཅིག་གྲང་ངར་མྱོང་བའི་དཀའ་ཚེགས་དེ་དག
ཉམ་ང་བའི་སློབ་མ་ང་ཚོའི་སེམས་ཀྱི་བུ་ག་གང་རུང་ལ་ཐོལ་གྱིས་འཁྱུད།
མཚམས་ལན་རེར་ཁྱེད་ཀྱིས་ང་ཚོར་གནང་བའི་དཀའ་སློབ།
ང་ཚོས་ཕངས་མེད་དུ་གཡུགས་ཤིང་།
མཚམས་ལན་རེར་སློབ་མ་ང་ཚོས་ཁྱེད་ཀྱིས་བཞག་པའི་ལས་བྱ་ཤར་མར་བྲིས་ཀྱང་།
བསམ་མེད་ཀྱི་སློབ་མ་ང་ཚོས།
རྣོ་ལྕགས་ལས་གྲུབ་པའི་ཁྱེད་ཀྱི་ཤེས་རབ་ཀྱི་ཡོན་ཏན་ལ།
སྣང་བ་མཐོན་པོ་ཞིག་གིས་ཁུ་ཚུར་གཡུགས་ཤིང་།
སྐད་གསང་མཐོན་པོ་བྱས་ནས་ཨ་ལན་ལབ་པས།
ཁྱེད་ལ་དཀའ་ལས་བཟོས་སོང་།
འོན་ཀྱང་། ད་དུང་ལྷོག་ལྷོག་ཏུ་ལྡིང་བཞིན་པའི་ཁྱེད་ཀྱི་
སྙིང་དམར་པོ་དེའི་ནང་དུ།
སློབ་མ་ང་ཚོ་དམ་དུ་བཅིངས་འདུག།
རྩོམ་གསར། 10