2023-09-01
དཔྱིད་ཀྱི་དཔལ་ལ་རོལ་གྱིན།།
ཁུ་བྱུག་ཚངས་མགུར་སྙན་པ།།
སྙིང་གཏམ་གསེར་གྱི་ཐིགས་པས།།
སྙིང་ཤ་ཡང་ཡང་བརླན་མྱོང་།།
དུས་ཀྱི་འགྱུར་བ་རྒོད་པས།།
ཁུ་བྱུག་མོན་གླིང་ཕེབས་སོང་།།
སྙིང་གཏམ་མུན་གླིང་མ་རྫོང་།།
སེམས་པ་སྡུག་གིས་ཁྱབ་འགྲོ།།
དབྱར་གྱི་ལང་ཚོར་ཧད་ཀྱིན།།
རྒྱ་སེའི་རང་ཚུགས་མཛེས་པ།།
མ་བཅོས་དམུལ་ཞལ་སྡུག་མོས།།
མིག་དབང་བདུད་རྩི་སྦྱིན་མྱོང་།།
ལྷགས་རླུང་རྒྱུ་ཕྱོགས་བཙན་པས།།
རྒྱ་སེ་སད་ཀྱིས་བཅོམ་སོང་།།
འཛུམ་ཞལ་གཞན་དུ་མ་ངོམས།།
མིག་མཐའ་མིག་ཆུས་གང་འགྲོ།།
སྟོན་གྱི་ཟང་ཟིང་སྤྱོད་ཀྱིན།།
སྣ་ལྔའི་འབྲུ་རིགས་སྤུངས་པ།།
མ་བསྐུལ་བརྩེ་འདང་དྲག་པོས།།
མཐའ་ན་རྨི་ལམ་བསྒུལ་མྱོང་།།
རྐང་གཉིས་བཀྲེས་མངོན་ཆེ་བས།།
གྲོ་ནས་བཟས་ནས་རྫོགས་སོང་།།
བརྩེ་བ་ལྷོད་ལྷོད་མ་གནང་།།
དམ་བཅའི་རི་མོ་འགྱུར་འགྲོ།།
དགུན་གྱི་ཁ་བ་འབབ་ཀྱིན།།
མུ་ཏིག་གནས་ཁང་གྲུབ་པ།།
རེ་སྒུག་ཆིག་ལབ་མོད་པས།།
རྣ་བར་སུན་སྣང་སྟེར་མྱོང་།།
ཉི་མའི་འོད་ཟེར་ཚ་བས།།
མུ་ཏིག་ཁང་ཆེན་གཏོར་སོང་།།
སེམས་པའི་སྒོ་མོ་མ་རྒྱག།
རེ་བ་སྟོང་པར་ཐིམ་འགྲོ།།
རྩོམ་པ་པོ། གཞི་ཚང་ཟླ་བ་གྲགས་པ།
རྩོམ་སྒྲིག་པ། མགར་རྒྱལ་སྲས།
རྩོམ་གསར། 10