མ་གྲུབ་པ། 2023-09-06
བརྟན་གཡོའི་ཁམས་ཀྱི་གསང་གསུམ་མཛེས་སྡུག་གཅིག་ཏུ་སྤུངས་འདྲའི་གང་
སྐུའི་མཚན་དཔེ་ཉི་ཟླ་འབུམ་གྱི་མདངས་ལས་བརྗིད་ཅིང་དབྱངས་ཀྱི་སྲས་མོ་
རི་དྭགས་མིག་ཅན་ཕྱག་ན་པི་ཝང་འཛིན་པ་མོ།།
ཆུ་ཡི་འོད་ཟེར་ཆེམ་ཆེམ་གཡོ་བའི་དར་འཇམ་གོས་ཀྱིས་རབ་ཏུ་བརྒྱན་པའི་དུང་
གི་མཆོད་སྡོང་གཟུགས་སྐུའི་དཔལ་དུ་སྣ་ཚོགས་རིན་ཆེན་དོ་ཤལ་འཕྱང་བ་
སིལ་སིལ་འཁྲོལ་བའི་གཡེར་སྒྲ་ལས།།
སྙན་པའི་མཐར་ཐུག་དྲི་ཟའི་གླུ་ཡང་ཟིལ་གྱིས་གནོན་པའི་སྭ་ར་སྭ་སྟིའི་ཟག་
མེད་དབྱངས་ཀྱི་སྦྲང་ཆར་འཇོ་བས་ཐོས་ལྡན་ལྷ་མི་སྟོང་ཕྲག་ཚོགས་ལ་ངག་
རིག་བྱིན་རླབས་སྩོལ་མཛད་མ།།
བསྟོད་པའི་ཚིག་གི་ཡོན་ཆབ་དྭངས་མ་བཟང་དགུའི་ཡོན་ཏན་རབ་ཏུ་རྫོགས་
པའི་ཚངས་སྲས་ལྷ་མོའི་སྐུ་གསུང་ཐུགས་ལ་ཐ་སྙད་དུ་མའི་ཉིང་ཁུར་
བསྡེབས་ནས་དབྱངས་གསལ་ཡི་གེའི་གཟུགས་སུ་བསྟར།།
ཆུ་སྐྱེས་པདྨའི་འདབ་བརྒྱ་རང་གྲོལ་རབ་མཛེས་ཞལ་རས་ལྟ་ན་སྡུག་ཅིང་
དཔེ་བྱད་འདབ་མ་སྟོང་གིས་སྒེག་པའི་བཅུ་དྲུག་གཞོན་ནུའི་ཁོ་ལག་རྫོགས་
པའི་མཐོང་གྲོལ་མཚན་དཔེའི་ལང་ཚོ་ཅན།།
ངང་དཀར་མཚོ་ལ་འཇུག་པ་ལྟར་དུ་དཀར་གཙང་འོ་མ་ལན་བརྒྱར་མཆོད་
འདྲའི་མདངས་ལྡན་བཞིན་ལེགས་པད་དཀར་ཚལ་དུ་ཁྲ་བོ་གཟི་ཡི་གྲུང་ཤ་
འཁྱིལ་བའི་སྤྱན་ཟུང་བུང་བ་གར་ལ་རྩེན།།
རྒྱ་སྐྱེགས་ཁུ་བ་ལན་བརྒྱར་བྱུག་འདྲའི་བྱུ་དམར་བིམ་པའི་སྒྲོས་ཆ་དོད་
པའི་དམར་ཆུང་མཆུ་ནི་གདངས་བའི་ཆར་ལས་ལྷུན་སྟུག་མན་ཤེལ་བསྟར་
ལ་བརྒྱུས་འདྲའི་ཚེམས་དཀར་མུ་ཏིག་ཟེར་བརྒྱ་འཛུམ།།
གསུང་དབྱངས་དྲུག་ཅུའི་ཡན་ལག་རེ་རེ་རབ་དམར་ལྗགས་ཀྱི་རྩལ་ལ་བརྒྱུས་
ན་ངག་རིག་གཏེར་གྱི་མཛོད་ཆེན་གྲོལ་བས་འཁོར་འདས་རྟོག་འགྱུར་དལ་
གྱིས་ལེན་པའི་ཚངས་ཆེན་སྲས་མོ་གུས་པས་མཆོད།།
བཟང་དགུའི་རིན་ཆེན་ཅོད་པན་མནབས་པས་རྔམ་བརྗིད་ཟུང་གི་ཆ་ཤས་རྫོགས།།
རྣམ་གཉིས་སྙན་དབང་འདབ་དཀར་སྣེ་རུ་གསེར་གྱི་རྣ་ཆ་མངོན་པར་འཛུམ།།
གང་ཉིད་སྐུ་ཡི་མཆོད་སྡོང་རྒྱབ་ཀྱི་གནག་སྣུམ་སྐྲ་ཡི་ལན་བུ་ཚོགས།།
དྲི་གཞོན་རླུང་གི་དལ་བུར་བསྐྱོད་ན་མཉམ་ཉིད་ལྷ་ཡི་སྤོས་ངད་འཐུལ།།
སྨྲ་བའི་འབབ་སྟེགས་པད་དཀར་རྫིང་ལས་ངག་རིག་མེ་ཏོག་འཐོར་བ་དང་།།
ཏིང་འཛིན་གླུ་ཡི་སྟོང་ཆེན་སྒྲ་དབྱངས་འདོད་དགུའི་རྣ་བའི་དཔལ་དུ་བསྒྲོན།།
ཚངས་ཆེན་རྒྱུད་མངས་སོར་རྩེས་བསྒུལ་ན་སྙན་འཇེབས་སྟོང་གི་ཉིང་བཅུད་རྡོལ།།
གསང་གསུམ་མཛེས་སྡུག་ཆ་ཀུན་རྫོགས་པའི་ངག་དབང་དབྱངས་ཅན་ལྷ་མོ་འདུད།།
རྨད་བྱུང་ཐུགས་བསྐྱེད་ལྷ་ལམ་ངོགས་སུ་འཚེ་མེད་ཞི་བའི་བྱ་དཀར་འཕུར།།
ལེགས་བྲིས་ཡིད་འཕྲོག་མཚོ་བྱུང་ངང་མོ་བཅུ་དྲུག་ལང་ཚོའི་སྐྱེ་མཆེད་ཅན།།
མཛེས་སྡུག་ཆུ་སྐྱེས་གེ་སར་གདན་དུ་སྟངས་སྟབས་དུ་མས་འགྱིང་པ་ན།།
ཁམས་གསུམ་ལྷ་དང་མིའམ་ཅི་སྟེ་སྐལ་བཟང་མིག་གི་དགའ་སྟོན་ལྷམ།།
ཚོགས་གཉིས་སྤྲིན་ཕུང་རབ་ཏུ་སྟུག་ཅིང་མཁྱེན་བརྩེ་ཉི་མའི་ཟེར་བརྒྱ་འབར།།
སྐྱེ་འགག་རྡོ་རྗེའི་ཉམས་གླུ་རེ་རེས་འཁོར་འདས་དབྱངས་ལ་འགུག་པ་མོ།།
སྙན་ངག་མཁན་པོའི་མིང་ཚིག་ཀློང་དུ་མཚན་བཟང་གསེར་གྱི་ཉི་མ་འཛུམ།།
ངག་རིག་འཕྲུལ་གྱི་དངོས་གྲུབ་སྩོལ་མཛད་ལྷ་མོ་ཁྱོད་ཉིད་སྐྱབས་སུ་བསྙེན།།
སྐུ་གསུམ་ལང་ཚོ་རབ་ཏུ་རྫོགས་ཤིང་པདྨའི་མདངས་ལྟར་རྨད་དུ་བྱུང་བའི་
དཀར་འཇམ་ཞལ་ཁྱིམ་དཀྱིལ་འཁོར་རབ་རྫོགས་བརྒྱད་གཉིས་བུ་མོ་ས་བཅུའི་
རྐང་སྟེགས་འདོད་དགུར་དབང་སྒྱུར་མཚོ་བྱུང་མ།།
གསུང་དབྱངས་དྲུག་ཅུ་དཔའ་ངར་སྒྲ་ལྡན་སྙན་པའི་གྲགས་པ་སྲིད་ན་མཐོ་
སྟེ་མགྲིན་པ་དུང་གི་པད་ཚལ་ཀློང་ནས་ངག་རིག་ཟེགས་མའི་རླབས་རིས་འཕྱོ་
བས་རིག་བྱེད་དབྱངས་ཀྱི་གྲུ་ཆར་འཇོ།།
ཐུགས་བསྐྱེད་ལྷ་ཡི་ཁང་བཟང་དབུས་སུ་མཁྱེན་བརྩེ་ཉི་མའི་ཟེར་བརྒྱ་འབར་
ཞིང་ཐབས་ཤེས་ནུས་པའི་རྩལ་ཆེན་རྫོགས་པས་སེམས་ཅན་ཀུན་ལ་མ་ལྟར་
བྱམས་པའི་གཞན་ཕན་བློ་ཡི་སྤྲིན་ཕུང་སྟུག།
བདག་སེམས་དད་བརྒྱའི་མཁའ་དབྱིངས་འཛུམ་པའི་རིག་བྱེད་གཏེར་གྱི་མཛོད་
ཆེན་གྲོལ་བའི་དབྱངས་ཀྱི་ལྷ་མོ་ལེགས་བྲིས་མ་ལ་དབྱངས་གསལ་ཚིག་གི་སྦྱོར་
བ་བསྒྲིགས་ཏེ་དགའ་འབོད་སྟོང་གི་མཆོད་པ་འབུལ།།
རྩོམ་གསར། 10