གོས་དཀར་ལྷ་རྗེ་དཀར་པོ་ཆིག་ཐུབ་ཡིན།།

བརྒྱ་གོ་གཅིག་ཆོད་སྲུང་མདུད་ལྗང་ཁུ་ཡིན།།

དེ་བས་མ་ཚད་བདུད་འཇོམས་རིལ་བུ་འོ།།

ནད་ཀྱི་འཕེན་པ་རླུང་གི་འཁོར་ལོ་ཡིས།།

དུས་མཐའི་སེམས་ཅན་མུ་གེའི་མཚོ་རུ་ལྷུང་།།

སྙིང་རྗེའི་སེམས་དཔའ་རྒྱང་ནས་ངུ་འབོད་བྱེད།།

བརྩེ་བའི་སྤྱན་གྱིས་རྒྱང་མིག་ཟིན་ཙམ་མཛད།།

མི་རྟག་མགུར་གྱིས་བྲག་སྒོའི་དར་ཤིང་ཟད།།

ནམ་ཟླའི་སྤྲིན་པ་སྟོང་བའི་མཁའ་མཐར་འཁྱམས།།

དགེ་བའི་རྩ་འཁོར་རྩལ་གྱིས་འཁྱོར་བ་ཡིས།།

ནང་ཕེབས་དགོངས་ཕེབས་གཟུཊ་མེད་བསྟན་སྲུང་ལཊ།།

ཉེ་མེད་རིང་མེད་མཐའ་བྲལ་དབུ་མའི་དཔལ།།

སྤྲོས་པའི་ཀློང་ནས་དཔྲལ་པའི་འཁོར་ལོ་ཡིན།།

སྤྲང་པོའི་ཟས་ཀྱི་ལག་ཡོང་མི་འདུག་གོ།

འཛིན་རེག་བོར་བའི་དངོས་མེད་ཡི་དམ་ལྷ།།

ལྷན་གཅིག་འགྲོགས་ཀྱང་སྐྱིད་སྡུག་ཁ་ཁ་ཡི།།

ཡར་འགྲོ་མར་འགྲོའི་རྟ་ཁ་འཐེན་རོགས་མིན།།

དད་པའི་བྱིན་གྱི་མཐུ་ཡིས་ཟིན་ཙམ་ནས།།

དྲོ་གྲང་གཉིས་ལ་གྲོལ་མོལ་ལོས་ཀྱང་ཞུ།།

ཞུ་ཕུད་གཏམ་ལ་ཚིག་རིང་ཚིག་ཐུང་ཡིན།།

ཐུང་ཐུང་མི་ཚེའི་སྐྱབས་ཀྱི་འགོ་མ་ལགས།།

འགག་མེད་གླུ་ཡིས་ལམ་སྣ་དྲང་དུ་གསོལ།།

དྲོན་པོའི་ཁྱིམ་ནས་ཁྱི་ནད་མི་ནད་ཀྱིས།།

ཚ་གཟེར་ཁྲག་རྩ་མནར་བའི་ངར་ཤུགས་ཀྱིས།།

དབུགས་རྒྱུན་རེ་རེའི་མཐུད་མཚམས་སྦྲེལ་དཀའ་རུ།།

སྐུ་མཁྱེན་བྱང་སེམས་སྨན་གྱི་རྒྱལ་པོ་ཡིས།།

དཀའ་སྤྱད་རུས་པའི་སྙིང་གྱི་མདའ་ཁ་ནས།།

མ་འདོར་ཚེ་འདིའི་འདུ་བྱེད་སངས་ཙམ་མཛད།།

མཛད་པ་འདི་ལ་ཡ་མཚན་མངོན་པར་བསྟོད།།

ཉིན་རྒྱུག་མཚན་རྒྱུག་འདུར་རྒྱུགས་འདྲེས་མ་ཡིས།།

གྲོང་མཐའི་ཕྱི་ནང་སྲོག་གི་ར་མདའ་བྱས།།

གཏོང་ཕོད་སྙིང་སྟོབས་འདི་ལ་ཡི་རང་སྐྱེ།།

དཔུང་གཉེན་དགྲ་ལྷའི་མི་རྟ་དཀར་པོ་འབོད།།

འབུལ་མཆོད་ཐུགས་རྗེའི་སྦར་མོ་ལན་གཅིག་སྦྲེལ།།

སྒྲིབ་བྲལ་ཐུབ་པའི་ཞབས་ལ་ཐེངས་གཅིག་འདུད།།

གཏིང་མཐའ་གཞལ་མེད་ནགས་ཀློང་སྟུག་པོའི་ཁྲོད།།

སེང་ལྡེང་གཡུ་ཡི་སྒྲོལ་མའི་ཕོ་བྲང་གི།

ཚེ་རིང་མཆེད་ལྔའི་ཚུལ་འཆོས་མི་གཟུགས་ཡིན།།

བསྙེན་སྒྲུབ་མ་དགོས་དགོས་ཆེད་སྤྲུལ་པ་ཡིན།།

གསོལ་འདེབས་མ་དགོས་ཐུགས་བཞེད་གནང་བ་ཡིན།།

རྣམ་རིག་བཞིན་བཟང་བུ་མོའི་འཇོ་སྒེག་ལས།།

མཛེས་སྡུག་སྨན་བསུང་དྲི་ཡི་བྱིན་རླབས་མཆེད།།

རླབས་ཆེན་སྤྱོད་པོའི་ཁབ་ཏུ་རོལ་བ་ཡི།།

འཁོར་གྱི་ཐོག་མ་ཀུན་ཏུ་བཟང་པོ་མཆོད།།

འཆི་མེད་ཚེ་རིལ་བདུད་རྩིའི་བུམ་ཆུ་ཡི།།

དོན་ལྔར་ཚ་དྲོད་འཐིབ་ལ་ཕན་ཁ་ཆེ།།

སྣོད་དྲུག་སྣད་སྐྱོན་བྱུང་ལ་ནུས་མཐུ་བཙན།།

མ་གྲང་གྲང་བར་བྱེད་མཛད་འཕྲིན་ལས་མྱུར།།

མ་དྲོས་དྲོ་བར་བྱེད་མཛད་དབང་ཐང་ཆེ།།

དྲི་མེད་ཤེལ་དཀར་འཛིན་པའི་འོད་ཟེར་ཅན།།

མཛའ་གཅུགས་པད་མའི་སྙིང་ལ་ཐོགས་པ་ཡིས།།

བདེ་ལེགས་གསལ་བྱེད་ཉི་མའི་དཀྱིལ་འཁོར་ངོས།།

ཡིད་འཕྲོག་འཇའ་ཚོན་ཟིལ་མའི་ཆར་རྒྱུན་གྱིས།།

ཚེ་རིང་ཚེ་མཐུད་ཚེ་དཔག་མེད་མགོན་གྱི།།

ཚེ་བསོད་ཟླ་བའི་བླ་གོས་དྭངས་པར་བྱས།།