༡

ལྗང་མདོག་ནེའུ་གསིང་གྲང་རེག་རྙི་རུ་ཚུད། །

དྲན་པའི་སྙན་ངག་འཁྱགས་རོམ་སྦུབས་སུ་ནུབ། །

གྲོགས་མེད་ང་རང་སྐྱོ་བས་འགྲམ་ལྕག་གཞུས། །

ཡིན་ཡང་འཁོར་བའི་སྒེའུ་ཁུང་ངོགས་སུ་ཆགས། །

           ༢

ཚོར་བའི་རི་སུལ་བབས་པའི་ཆུ་ཡི་རླབས། །

དཀར་འཇམ་ནང་སེམས་མེ་ཏོག་གསོ་བར་ལྡིང་། །

ཆགས་པས་དུངས་པའི་ཐ་སྙད་མགུར་ཐུང་འདི། །

མ་བྲིས་སེམས་ཀྱི་ངོས་ནས་འཕོས་པ་ཡིན། །

            ༣

བརྗོད་བྱེད་ཚིག་གི་སྙན་ཆ་གཙང་བོའི་རྒྱུན། །

མི་གཙང་འཇིག་རྟེན་མེ་ལོང་ནང་དུ་སད། །

བཅོས་མའི་གཟུགས་སུ་སྤྲུལ་པའི་བདག་གི་ཞལ། །

སྙན་ངག་ལྷ་མོའི་ཁ་ཆུས་བརླན་ན་འདོད། །

           ༤

མཛེས་པའི་ལང་ཚོས་འདོད་པའི་སྦ་བ་དཀྲོགས། །

དོན་དམ་ནང་སེམས་དམར་པོ་སྙིང་ལ་མཆོངས། །

ངེས་མེད་བདག་གི་སྙན་ངག་པུར་ཁང་ནས། །

སྙུག་རྩེ་འཁྱུགས་ཏེ་དགའ་བའི་ཐ་སྙད་སྤྲད། །

          ༥

དོ་ནུབ་ལྐོག་ཏུ་འཕངས་པའི་མིག་ཟུང་དེ། །

ལས་ཀྱི་བར་ཐག་རིང་བས་མུན་པས་བསྣུར།།

མུན་པའི་ངོ་ལྤགས་མནབས་པའི་མཚན་མོའི་གཞུང་།།

གཅིག་པུས་ཆང་དཀར་བཏུང་རྗེས་སྐྱོ་བས་བཟི། །