རང་མདངས། 2022-10-12
བགྲང་གིས་བསྐལ་པའི་ཉིན་དང་མཚན་མོ་མ་ཡིན། །
འདི་ནས་བརྩིས་པའི་ཉིན་ཞག་ཕྲ་མོ་དེའང་། །
ལོ་དང་ཚེ་རབས་ཤིག་གི་དུས་ཡུན་ཞིག་ལས། །
ཉིན་མཚན་གཅིག་གཉིས་ཙམ་གྱིས་ཚོར་བ་མེད་ཀི །
ཨ་རོགས་བྱམས་པའི་སེམས་སུ་ང་རང་ཡོད་དམ། །
ཁོ་བོའི་བྲང་གཞུང་སྙིང་ཁ་ཟབ་པའི་དབྱིངས་སུ། །
བཅོས་མིན་ཡིད་ལ་བདོ་བས་ཉིན་མཚན་དབྱེར་མེད། །
ལུས་ཀྱི་ཤ་རུས་གྱེས་ཀྱང་སེམས་དང་འབྲལ་མེད། །
མི་རྟག་གློག་ལ་དབང་བའི་རྒྱང་རིང་འཕྲིན་པ། །
མཛའ་ཐག་སྐུད་པ་སྦྲེལ་བའི་རྐང་གླིང་སྐད་བརྡ། །
སྐྱེ་འཇིག་རང་བཞིན་བཙན་པས་དྲྭ་ངན་དེ་གས། །
འཛུམ་པའི་གསུང་གསང་རེ་རེ་ཡུད་ཙམ་བཅད་སོང་། །
འུ་གཉིས་ལས་ཀྱིས་འབྲེལ་ན་ཚེ་གཅིག་མཇལ་ཡང་། །
ཨ་གསར་འཁོར་བའི་གཤིས་ཀྱིས་ཡང་དུ་དེད་པས། །
སྐད་ཅིག་བར་དུ་ཆོད་པའི་དམར་ཆུང་སྙིང་ལ། །
བྲེལ་འཚུབ་འུར་འུར་ངང་གིས་རེ་ཞིག་འདས་སོང་། །
གློག་དེ་སྲོག་ལྡན་སྨྲ་ཤེས་མྱི་ཞིག་ཡིན་ན། །
རང་ནུས་ཚིག་དང་ལུས་ཀྱི་ཁོང་ཁྲོ་བཀོལ་ནས། །
རྒྱལ་ཕམ་གཡུལ་འཐབ་དྲག་པོས་ལས་ཤིག་འདོད་ཀྱང་། །
རྟིང་རྩོད་ཉིན་མཚན་རྫོགས་པའི་བྱ་བས་ཅི་བྱ། །
ཁོ་བོའི་འཕྲིན་ཕྲན་འདི་ཡི་བརྡ་སྐད་རེ་རེ། །
སེམས་པ་སེམས་དང་སྦྲེལ་བའི་རང་གི་ལྷ་མོ། །
ཨེ་ཡིན་ཡིན་ན་བསམ་པའི་ཡ་ཆུང་འདི་ནི། །
མ་ལུས་དབྱངས་མཚོའི་ཕྱོགས་ལ་མཛའ་ཞིང་འཐོར་འདུག །
སྒུག་ཡུན་གྲངས་མེད་བསྐལ་པའི་ཡུན་དུ་འདུག་ཀྱང་། །
ཚེ་སྔོན་ལས་ལ་དབང་བའི་ང་དང་གཅེས་མོའི། །
མཛའ་སེམས་སྐུད་པའི་བར་ཐག་གཅིག་ཏུ་འདྲེས་ནས། །
ནམ་ཞིག་འཛོམས་པའི་སྐལ་བཟང་ཡོད་ན་ལོས་ཆོག །
དབྱངས་གསལ་ངག་ལ་བཀུག་པའི་བརྩེ་བའི་མེ་ཏོག །
གསུང་གསེར་བ་དན་བརྩེགས་པའི་དུང་བའི་ལང་ཚོ། །
ཤག་ཤག་སེམས་ནས་བརྒྱུད་པའི་བརྩེ་དུང་ཕྱུག་མོ། །
དྲན་པ་དྲན་པའི་ཡིད་ཀྱི་མཛེས་མའི་སྐུ་ལུས། །
རྩོམ་གསར། 10