འདས་མ་ད་གསུམ་གྱི་འཆར་སྒོ་བན་བུན།།

ལུས་ངག་ཡིད་གསུམ་གྱི་མཆད་པ་ཡིན་ན།།

ང་ཡིས་ཡིད་ཆེས་ཀྱི་དད་སེམས་ཀློང་ནས།།

རྣམ་དཀར་དགེ་ཚོགས་ཀྱི་སྨོན་པ་ཞུ་ཆོག།

དབྱངས་གསལ་སོ་བཞི་ཡི་སྐར་མ་འོད་ཆེན།།

རིགས་ཀྱི་སེམས་ཁུང་གི་དྲོད་ཁོལ་ཡིན་ན།།

ང་ཡི་སྙན་ཚིག་གི་ཚིག་རིས་དབར་ནས།།

འདས་དོན་ལོ་རྒྱུས་ཀྱི་རྡོ་རིང་བཞེང་ཆོག།།

མི་ཚེའི་བཤུལ་ལམ་གྱི་ཁུགས་སོ་རིང་མོ།།

ལས་ཀྱི་ཁ་ཡིག་གི་རི་མོ་ཡིན་ན།།

ང་ཡི་ཚེ་སྲོག་གི་དབུགས་རྒྱུན་རེ་རེས།།

ལས་འབྲས་ལམ་བུ་འདི་བདེན་པས་འཕྱོང་ཆོག།

ལན་ཆགས་ལོ་འདོད་ཀྱི་རྟ་ཕོར་ཆིབས་ཏེ།།

འཁོར་བའི་ཉིན་སྲིབ་ནས་ཚང་རག་བཏང་ན།།

ང་ཡིས་མི་ཚེ་ཡི་མེ་ལོང་མཐོངས་ནས།།

མི་བརྟན་ཆོས་ཉིད་ཀྱི་ལྷ་རེག་འཐེན་ཆོག།

ཀུན་རྟོག་བརྒྱད་ཅུ་ཡི་བུ་ཡུག་འཚུབ་དུས།།

ཡིད་ཀྱི་སྡུམ་པ་རུ་ལྷགས་པས་གཙེས་ན།།

ང་ཡིས་ཏིང་འཛིན་གྱི་འཚེད་ཤིང་སྦར་ནས།།

ལྷོད་བདེའི་དྲོད་ཁོལ་གྱིས་སེམས་པ་གསོ་ཆོག།

མི་ཡུལ་ལན་ཆགས་ཀྱི་མཚོ་མོ་བརྒལ་དུས།།

མི་སེམས་ཡིད་སྲུབས་ཀྱི་རླབས་དེས་འཇེན་ན།།

ང་ཡིས་ཞེན་ཆགས་ཀྱི་གྲུ་ལས་བཀྱེད་ནས།།

མི་མཇེད་འཇིག་རྟེན་ལས་ངེས་པར་འབྱུང་ཆོག།

ཚིག་གི་སྲད་བུ་ལ་མཆོད་ཚིག་བསྟར་དུས།།

ཚིག་རྒྱན་ཡིད་སྤྲུལ་གྱིས་མཆོད་སྤྲིན་འཕེར་ན།།

ཚིག་རིས་མེ་ཏོག་གི་མཆོད་རྫས་ཐོགས་ནས།།

ཚིག་འཇེབས་མི་ལང་བའི་མཆོད་པ་འབུལ་ཆོག།