མཚམས་སྤྲིན་གྱི་ལག་ཟུང་དམར་པོ་

མུན་པའི་ཟོ་བར་ལྷུང་རྗེས།

འོ་མའི་ཐིགས་པ་ཞིག་ཤེལ་ངོས་སུ་

ཟགས་པ།

ལབ་ཙེ་ཉག་ཁའི་ལག་ཕྱིས་ཤིག་

དང་འདྲ་བའི།

འདར་སིག་སིག་གི་དར་ལྕོག་

ཟད་པོས་ཀྱང་མ་ཁེབས་པར།

རེ་བའི་མཁའ་དབྱིངས་སུ།

རྒོད་པོའི་ཚོགས་གཤོག་འགྱུར་

ངོམས་ཤུལ་ནས།

གཤོག་སྒྲོ་རླུང་གིས་ཁུར་བའི་

མཚན་མོར།

དྲག་རླུང་གིས་གཏན་ནས་

ཁུར་མི་སྲིད་པའི་ཁྱེད་ཀྱིས།

ང་རང་ལམ་ལ་མ་ཆས་པའི་སྔུན་དུ།

མདུན་ནས་བསུ་མ་དང་རྒྱབ་

ནས་སྐྱོར་མ་བྱེད་བཞིན།

མིག་མདུན་གྱི་རྐང་ལམ་དུ་བསྐྱལ་

ཞིང་རྒྱང་རིང་གི་གཞུང་ལམ་བསྟན།

གོམ་པ་ཁ་ཤས་ལེན་ནོར་བྱས་སམ།

སྨག་རིམ་སྟོང་གི་ཕ་མཐའ་ན།

དྲག་རླུང་ཁྲོད་གོམ་པའི་འདེགས་

འཇོག་རེ་རེར།

སོ་ལྟ་དང་གཟབ་ཉན་བྱེད་བཞིན།

ལག་པ་གཡུག་གཡུག་གནང་

གིན་པའི་ལོ་ཟླ།

ལོ་ཟླ་རླུང་བཞིན་ལྡང་ཤུལ་ནས།

ཆུ་ཚོད་ཆུ་བཞིན་བཞུར་སོང་ཡང་།

ཁྱེད་དྲན་ན།

སྨག་རིམ་ཁྲོད་ཅི་ཞིག་ལུས་སོང་བ་འདྲ།

ཅི་ཞིག་ལུས་སོང་བ་འདྲ་བས།

གཏམ་རྒྱུད་ཡོད་ཚད་མགོ་

མ་བརྩམས་པའི་སྔ་རོལ་ཏུ།

ཟླ་བ་གཟའ་ཡིས་བཟུང་པའི་

རྨ་ཤུལ་ནག་པོ།

སུ་ཡི་སྙིང་ཁོང་ན་གཏན་དུ་བཞུར་བའི།

ཟུག་གཟེར་གྱི་ཁྲག་ཐིགས་དྭངས་མོ་ཡིན།